ԶԳՈՒՇԱՑԵՔ, ԳԱՅԼԵՐ ԵՆ

ԶԳՈՒՇԱՑԵՔ, ԳԱՅԼԵՐ ԵՆ

- Կառավարության կողմից արգելված է գայլերի որսը: Այսօր ավելի շատ գայլ կա, քան վարազ ու եղնիկ: Դա է պատճառը, որ գայլերը դուրս են եկել ընտանի կենդանիների վրա: Դրա ահից երեկոները դուրս չենք գալիս տնից, քանի որ պետության կողմից դրանց վերացնելու արգելք կա:
Մի խումբ լոռեցիներ` Ավո, Սամվել, Ռուբիկ...
Պետության կողմից գայլերի որսի արգելումը պետք է տարբերել գայլերի ոհմակի կողմից իրական վտանգի պայմաններում, ելնելով անձի կամ անձի գույքի անվտանգությունից եւ կորստից, տվյալ անձի կամ երրորդ անձի կողմից ակտիվ գործողությունների իրականացումից, ընդհուպ` գայլերի ոչնչացման ելքով: Այսինքն, եթե գայլերը հարձակվել են կամ ռեալ հարձակման վտանգ կա քաղաքացու կամ քաղաքացու գույքի վրա, ապա տվյալ քաղաքացու կամ երրորդ անձի, օրինակ` որսորդի, գործողությունը` ընդհուպ գայլերին ոչնչացնելու եղանակով, պետք է դիտել իրավաչափ: Ինչ վերաբերում է պետության կողմից արգելքի սահմանմանը` գայլերին զանգվածաբար ոչնչացնելու ուղղությամբ, ապա այն օրինաչափ է այնքանով, որքանով բնության մեջ ամեն կենդանի իր ուրույն դերն ու նշանակությունն ունի: Այլ խնդիր է, որ պետությունը պարտավոր է ապահովել շրջակա միջավայրի պահպանությունը եւ վերականգնումը: Դրանք չապահովելու պատճառով է, որ այսօր գայլերն են քաղաքացիների տները խուժում, վաղը` օձերն ու կարիճները: Պետության շրջակա միջավայրի պահպանության եւ վերականգման ուղղակի պարտավորությունն ամրագրված է ՀՀ հիմնական օրենքի 10-րդ հոդվածում:
Գալով բուն թեմային եւ արձանագրելով կոնկրետ փաստ` քաղաքացիների անվտանգության, պաշտպանության, ինչպես նաեւ գայլերի կողմից գույքային վնաս պատճառելու հանգամանքին, ապա կարծում եմ` պետական լիազոր մարմինները` ի դեմս տեղական ինքնակառավարման մարմինների, մարզպետարանների, սույն դրվագով պետք է այն բնակավայրերում, որտեղ առկա է գայլերի կողմից հարձակման ռիսկ, պայմանագրեր կնքեն որսորդների, իսկ անբավարարության դեպքում` ոստիկանության կամ այլ ուժային կառույցների հետ, որպեսզի բացառվի կամ մինիմումի հասնի գայլերի հարձակման հետեւանքով անձի գույքի կորուստը, ինչպես նաեւ մաքսիմալ ապահովվի վերջինիս անվտանգության պահպանությունը:
Ինչ վերաբերում է գայլերի հարձակման հետեւանքով անձի կրած գույքային կորստին, ապա պետության կողմից արդյունավետ ծրագրերի իրականացման եւ դրական արդյունքների բացակայության պայմաններում վնաս կրած անձը կարող է եւ պետք է վնասի հատուցումը պահանջի պետությունից:
Այսօր ՀՀ քաղաքացու ունեցվածքը ռեալ կորստի վտանգի տակ է: ՀՀ-ում գործող իրավանորմերը եւ պետական ռեսուրսները բավարար են` կանխելու եւ պաշտպանելու քաղաքացուն եւ նրա ունեցվածքը, հակառակ պարագայում վաղն այդ պաշտպանությունը իրականացվելու է իրավապաշտպան կառույցների կողմից, ընդդեմ պետության:

ԼԵՎՈՆ ՍՈԽԱԿԻ ԲԱՂԴԱՍԱՐՅԱՆ
ՙԼեւ գրուպ՚ փաստաբանական
գրասենյակի հիմնադիր նախագահ
www.levgroup.am
Հարցեր կարող եք ուղարկել նաեւ
[email protected] հասցեով