ՙՙՀՆԱՐԱՎՈՐ ՉԷ 23 ՏԱՐՈՒՄ ԿԱՌՈՒՑԵԼ ԱՅՆ ՀԱՅԱՍՏԱՆԸ, ՈՐԸ ՄԵՆՔ ԵՐԱԶՈՒՄ ԵՆՔ

ՀՆԱՐԱՎՈՐ ՉԷ 23 ՏԱՐՈՒՄ ԿԱՌՈՒՑԵԼ ԱՅՆ ՀԱՅԱՍՏԱՆԸ, ՈՐԸ ՄԵՆՔ ԵՐԱԶՈՒՄ ԵՆՔ

Երեւանի մարզահամերգային համալիրում տեղի ունեցավ մեծ միջոցառում` նվիրված Հայաստանի Հանրապետության անկախության 23 ամյակին: ՙԻրավունքը՚ քաղաքական գործիչներից հետաքրքրվեց, թե որն է անկախության այս տարիների ամենամեծ ձեռքբերումը եւ ինչու չէ նաեւ բացթողումներն ու թերությունները:
Ըստ Սփյուռքի նախարար ՀՐԱՆՈՒՇ ՀԱԿՈԲՅԱՆԻ. ՙԴա մեր պետականության կառուցումն է, հայոց բանակը, պետական ինստիտուտների կայացումը, Հայաստանի` միջազգային ասպարեզում իր տեղի ու դերի որոշակիությունը եւ ամենագլխավորը` այդ ամենի խաղաղ ընթացքը: Ինչ վերաբերում է բացթողումներին, իհարկե, դրանք կան, առանց դրա չի լինի: Հնարավոր չէ 23 տարում կառուցել այն Հայաստանը, որը մենք ուզում ենք: Աշխարհասփյուռ հայությունը Հայաստանը համեմատում է իր զարգացած երկրի հետ եւ ցանկանում, որ մեր պետությունը եւս այդպիսին տեսնի, կարծում եմ, որ դրան էլ կհասնենք՚:
ԱԺ փոխնախագահ ՀԵՐՄԻՆԵ ՆԱՂԴԱԼՅԱՆԻ կարծիքով. ՙՄեր պետականությունն ինքն իրենով ամենամեծ ձեռքբերումն է: Մեր բոլորի միահամուռ կամքով, աշխատանքով, վստահությամբ ու նվիրվածությամբ պետք է գնանք էլ ավելի հզոր պետականության կայացման, որը շատ կարեւոր է թե° հայ ժողովրդի, թե° Սփյուռքի համար: Ամենամեծ բացթողումը կամ թերությունն, ըստ իս, դա ոչ այդքան միասնական լինելն է: Պետք է ավելի շատ աշխատենք, միասնական եւ ձեռք ձեռքի տված լինենք՚:
Մեր հաջորդ զրուցակից ԱԳ փոխնախարար ՇԱՎԱՐՇ ՔՈՉԱՐՅԱՆԻ համար, ի տարբերություն ԱԺ փոխնախագահի, անկախության տարիների ամենամեծ ձեռքբերումը մեր միասնականությունն է եղել. ՙՄեր միասնականությունը դրսեւորվեց շարժման ժամանակ, եւ ամեն անգամ, երբ դա անհրաժեշտ է, համոզված եմ, որ այդ միասնականությունը միշտ էլ կդրսեւորվի: Իսկ 23 տարին այդքան էլ շատ չէ, եւ դեռ կհասցնենք ավելի արդյունավետ աշխատել՚:
Հայաստանի անկախության 23 ամյակի կապակցությամբ Հայաստան էին ժամանել նաեւ Արցախի Հանրապետության իշխանությունները, ուստի եւ ԼՂՀ նախագահի մամուլի պատասխանատու ԴԱՎԻԹ ԲԱԲԱՅԱՆԻՑ հետաքրքրվեցինք, թե ինչ է Արցախի համար ՀՀ անկախությունը. ՙԴա մեր պետականության անկախությունն է: Այսինքն` մենք չենք տարանջատում ԼՂՀ կազմավորման օրը եւ ՀՀ անկախությունը: Սրանք երկու տարբեր գործընթացներ են, բայց նույն դրսեւորումներով: Մենք ապրում ենք նույն ուրախությունը, նույն ապրումները եւ տալիս ենք նույն կարեւորությունը` թե Հայաստանի, թե° Արցախի համար: Բացթողումներ ու թերություններ կան բոլորի մոտ, պետք է աշխատենք` դրանք վերացնենք, քանզի դրանք ծնվում են օբյեկտիվորեն, քանի որ նոր փուլ մտնելուց` նոր դժվարություններ ենք ապրում: Կարեւորն այն է, որ կան ձեռքբերումներ, եւ ամենակարեւորն այն է, որ շարունակենք մեր անկախ պետականության զորացումը, ամրապնդենք Հայաստան-Արցախ-Սփյուռք միասնությունը՚:
ՀԴԿ նախագահ ԱՐԱՄ ՍԱՐԳՍՅԱՆՆ էլ, կարծում է. ՙԱմենամեծ ձեռքբերումը եռամիասնության` Հայաստան-Սփյուռք-Արցախ կապի ապահովումն ու պահպանումն է: Շատ կուզենայի ասել, որ անկախությունը մեզ հնարավորություն տվեց զարգացնել ստեղծագործական հնարավորությունները, բայց ցավոք այդպես չէ: Իսկ մեր լավագույն կարողությունը մեր մտավոր կարողությունն է, եւ այդ առումով շատ չօգտագործված միջոցներ ունենք: Մի լավ բան կա, որ կցանկանայի նշել. մեր ազգային արժեքները, որոնք ամեն առումով պահպանվում են եւ այս պարագայում թե° ընդդիմության, թե° իշխանության միջեւ հակասություն չկա: Թերությունները շատ են, սակայն չէի ցանկանա, այս գեղեցիկ օրով խոսել դրանց մասին: Այնուամենայնիվ, բոլոր հեռանկարները մեր առջեւ բացված են, ու հատկապես որ` Հայաստանը գնում է դեպի ԵՏՄ, եւ ինչպես ասաց ՀՀ նախագահը` եթե հմտորեն մոտենանք այս հարցին մեզ համար շատ մեծ հեռանկարներ են բացվում՚:

ԱՐՄԵՆՈՒՀԻ ՀԱԿՈԲՅԱՆ