ԱՈՒԴԻՏՈՐԱԿԱՆ ԳՈՐԾՈԻՆԵՈՒԹՅԱՆ ՄԱՍԻՆ ՆԱԽԱԳԻԾԸ՝ ԲՈՒՌՆ ՔՆՆԱՐԿՄԱՆ ԹԵՄԱ ԱԺ-ՈՒՄ

ԱՈՒԴԻՏՈՐԱԿԱՆ ԳՈՐԾՈԻՆԵՈՒԹՅԱՆ ՄԱՍԻՆ ՆԱԽԱԳԻԾԸ՝  ԲՈՒՌՆ ՔՆՆԱՐԿՄԱՆ ԹԵՄԱ ԱԺ-ՈՒՄ

ՀՀ ԱԺ  ֆինանսավարկային եւ բյուջետային  հարցերի մշտական հանձնաժողովում այսօր քննարկման էր դրվել  ՀՀ կառավարության հեղինակած «Աուդիտորական գործունեության» մասին ՀՀ  օրենքում փոփոխություններ կատարելու նախագիծը:

«Աուդիտորական գործունեության» մասին օրենքի քննարկման ժամանակ որոշակի տարակարծություններ առաջացան: Հարակից զեկուցող պատգամավոր Խոսրով Հարությունյանի կարծիքով նախագծի մի դրույթ հայերեն ձեւակերպած չէ: «Պետք է նախագծի դրույթները հայերեն ձեւակերպած լինի»,- ասաց պատգամավորը:

ՀՀ ԱԺ  ֆինանսավարկային եւ բյուջետային  հարցերի մշտական հանձնաժողովի նախագահ, հիմնական զեկուցող Գագիկ Մինասյանը համաձայնելով Խ. Հարությունյանի դիտարկումներին ասաց, որ եթե նախագծում փոփոխություն պետք է արվի, ապա պետք է մայր օրենքում եւս փոփոխություն արվի:

Դիտարկումներին պատասխանող ՀՀ ֆինանսների նախարարի տեղակալ Վարդան Միրումյանն էլ ասաց, որ  եթե փոփոխություններ են արվում օրենքում, այդ փոփոխությունները պետք է արտացոլվեն նաեւ մայր օրենքում, որպեսզի ինկորպորացիայի ժամանակ խնդիր չառաջանա: «Մայր օրենքում փոփոխվող  հոդվածները չեն հայտնվելու, քանի որ   փոփոխություն ենք կատարում  օրենքի 26. 2-րդ հոդվածում՝ 2-րդ, 4-րդ, 5-րդ մասերը խմբագրելով»,-  պարզաբանեց փոխնախարարը:

«Պրն Միրումյան, որևէ մի  պետական կառավարման մարմնի  ներկայացուցիչ ցանկանում է այս հոդվածով առաջնորդվել, ինքը  պետք է վերցնի 2002 թ-ի օրենքը եւ նրանում արված ասենք թե 26 փոփոխությունները… դրա մեջ գոյություն ունի ինկորպորացիա»,- հակադարձեց Գ.Մինասյանը:

«Չէ, չէ պրն Մինասյան, եթե մենք գրում ենք սույն օրենքն ուժի մեջ է մտնում 2015 թ-ի հունվարի մեկից արժե՞, որ  էս օրենքի էս   հոդվածը տանենք մտցնենք մայր օրենք»,-բանավիճում էր Վ. Միրումյանը:

«Չէ,իհարկե, չէ»,- պատասխանեց հանձնաժողովի նախագահը:

«Ահա, նույն էլ  էլ սա է,  ինչ տարբերություն: Հետեւաբար, մայր օրենք կարդացողը պետք է իմանա՝ այս օրենքը կիրառվում է 2015 թ-իհունվարի մեկից հետո ինչ-որ մի օրենքում կատարվող փոփոխությունով, որը ուժի մեջ է մտնում 2015-ի հունվարի մեկից»,- ասաց Միրումյանը:

Որոշակի  ընդհանուր հայտարարի գալով՝ ձայների մեծամասնությամբ ընդունվեց  նախագիծը  քառօրյա նիստերում քննարկելու համար:

ՍՈՆԱ ԴԱՎԹՅԱՆ