«ԲԱՑԱՌՈՒՄ ԵՄ, ՈՐ ԱՐԱ ԱՎԵՏԻՍՅԱՆԸ ԹՈՔՄԱՋՅԱՆԻ ՍԿԱՆԴԱԼԻ ՀԵՏ ՈՐԵՎԷ ԿԱՊ ՈՒՆԵՆԱ»

«ԲԱՑԱՌՈՒՄ ԵՄ, ՈՐ ԱՐԱ ԱՎԵՏԻՍՅԱՆԸ  ԹՈՔՄԱՋՅԱՆԻ  ՍԿԱՆԴԱԼԻ ՀԵՏ ՈՐԵՎԷ ԿԱՊ ՈՒՆԵՆԱ»

Պոլիտեխնիկի ռեկտորի պաշտոնակատար Հովհաննես Թոքմաջյանի անվան շուրջ առաջած սեքս- սկանդալը շարունակում է  մնալ մամուլի ուշադրության կենտրոնում: Ինչպես  Թոքմաջյանը, այնպես  էլ ՀՊՃՀ ֆիզիկայի ամբիոնի վարիչ Աշոտ Խաչատրյանը, ում ի դեպ, խոստացել են պրոռեկտորի պաշտոնը, վստահեցնում են՝  այս ամենը կեղտոտ ու  շինծու գործ է: «Այս սկանդալը  մեծ հարված էր  մեր համալսարանի հեղինակությանը, այդպես են մտածում թե՛ուսանողները, թե՛ կոլեկտիվը»,-«Իրավունքի » հետ զրույցում ասաց  դասախոսը:

Թե ում էր ձեռնտու այս ամենը, Աշոտ Խաչատրյանը դժվարացավ պատասխանել, միայն ասաց, որ գործն իրավական դաշտում է է եւ պետք է սպասել արդյունքներին: «Շրջանառվող լուրերը երբեմն անհեթեթության են հասնում. նույնիսկ ասում են՝ այս ամենը գուցե Թոքմաջյանն  ու ֆեյսբուքյան երկխոսության մյուս երկու  աշխատակիցներին է ձեռնտու եւ իրենք են կազմակերպել:Սա այն դեպքն է, երբ ասում են՝ դուռդ փակ պահի,  հարեւանին գող մի ասա»,-  մանրամասնում է  ամբիոնի վարիչը:

Աշոտ Խաչատրյանից նաեւ հետաքրքրվեցինք՝ հնարավո՞ր է այս ամենը ձեռնտու ու կազմակերպված լիներ նախկին ռեկտոր Արա Ավետիսյանի կողմից, քանի որ շրջանառվող լուրերի համաձայն, նախկին ռեկտորը ցանկանում է ետ վերադառնալ: «Գրեթե բացառում եմ այդ տարբերակը: Նա ուրիշ դարդ ու ցավ  չունի եւ Թոքմաջյանին պիտի վարկաբեկի այն դեպքում, երբ  վերջինս Արա Ավետիսյանի մասի  երբեւէ վատ բան չի ասել»,- պատասխանեց  մեր զրուցակիցը, ապա հավելեց, որ բացառում է՝ Արա Ավետիսյանը նորից նշանակվի ՀՊՃՀ ռեկտոր, քանի որ ազատվել է իր դիմումի համաձայն:

ՀՊՀՃ-ի դասախոսի տեղեկացմամբ  սկանդալից հետո  իր կամքով աշխատանքից ազատվեց  պոլիտեխնիկի աշխատակազմի ղեկավարը՝ Լիլիթ Դաշտոյանը, ով եւս  ներգրավված էր այդ սկանդալում, իսկ  վարչության պետերից մեկը՝ Ռուզան Հայրապետյանը, ում  Թոքմաջյանն ինքն է իր հետ բերել, շարունակում է աշխատել:

Աշոտ Խաչատրյանից նաեւ  պարզեցինք՝ հնարավոր է  այս սկանդալը խոչընդոտի Հովհաննես Թոքմաջյանի ռեկտորի պաշտոնում  ընտրվելուն: «Ես ոչինչ չեմ բացառում: Մի բան կարող եմ ասել՝ Թոքմաջյանը տուժող է ճանաչվել»,-եզրափակեց Աշոտ Խաչատրյանը:

Սոնա Դավթյան