ԻՆՉՈՒ ԵՆ ՀԱՅԱՍՏԱՆՈՒՄ ՊԱԿԱՍԵԼ ՀԱՄԵՐԳՆԵՐՆ ՈՒ ՄԵՆԱՀԱՄԵՐԳՆԵՐԸ

ԻՆՉՈՒ ԵՆ ՀԱՅԱՍՏԱՆՈՒՄ ՊԱԿԱՍԵԼ ՀԱՄԵՐԳՆԵՐՆ ՈՒ ՄԵՆԱՀԱՄԵՐԳՆԵՐԸ

Երգարվեստում դեպի հայտնիություն ու ճանաչում տանող ճանապարհին էական ու նշանակալի են արտիստների համերգային ծրագրերը, լինեն դրանք մենահամերգների, թե հավաքական համերգների տեսքով:

Հայ շոուբիզնեսյան երգիչ-երգչուհիները, իհարկե, փորձում են այնպես անել, որ երեւանյան ու մարզային հայ հանդիսատեսը բեմից իրենց լսելուն կարոտ չմնա, բայց համերգային հիմնական շրջայցերը կատարվում են դրսում:

«...ՈՐ ՄԵՐ ԵՐԳԻՉՆԵՐԸ ՉԴԱԴԱՐԵՆ ՄԱՐԶԵՐՈՒՄ
ԵԼՈՒՅԹ ՈՒՆԵՆԱԼ»

«Հայաստանյան համերգները համեմատաբար քիչ են` պահանջվող պայմանները չապահովելու, տոմսերի վաճառքի ու ֆինանսական խնդիրների պատճառով, հատկապես մարզային համերգները, որոնք երգչի կողմից լինում են ուղղակի համերգ-նվեր ժողովրդի համար: Այնուամենայնիվ, այդ ամենը հասկանալով հանդերձ, կուզենամ, որ մեր երգիչները չդադարեն մարզերում ելույթներ ունենալ, որ մարդիկ իրենց լավ զգան: Առանց այդ էլ մարզերը կտրված են շատ բաներից» ,- «Իրավունքի» հետ զրույցում ասաց ԳՈՒՐԳԵՆ ԴԱԲԱՂՅԱՆԸ եւ հավելեց, որ իրենից էլ է հաճախ հայ հանդիսատեսը նեղանում ու հանդիպումներ պահանջում, քանի որ ստացվում է այնպես, որ երգում են միայն արտասահմանի համար:

«ՑԱՎՈՔ, ԱՅՍՕՐ ՀԱՅԱՍՏԱՆՈՒՄ ԴԺՎԱՐ ԵՆ ՏՈՄՍ ԳՆՈՒՄ»

ԷՐԻԿՆ էլ շարունակում է հավաքական համերգներով ներկայանալ, սակայն մենահամերգ դեռեւս չի նախատեսում, որովհետեւ.«Մենահամերգ ունենալու ցանկություն, իհարկե, շատ-շատ ունեմ, բայց ցանկություն ունեմ նաեւ մարդկանց կրկին լավ կերպով ներկայանալու. ինձ այդպիսին են սովոր տեսնել: Մենահամերգս պետք է այնքան անմոռանալի լինի, որ հետագայում եւս մարդիկ սիրով գան, ոչ թե ասեն` լա¯վ, դե գիտենք` ինչ է լինելու: Եվ առհասարակ այն ամենը, ինչ կատարվում է երգչի կյանքում, բերում է, ի վերջո, համերգ-աշխատանքի: Ցավոք, այսօր Հայաստանում դժվար են տոմս գնում, միգուցե գումարային խնդիրն է, միգուցե մարդիկ հոգնել են, չգիտեմ: Ամեն դեպքում, տարբերվող բան անելը շատ դժվար է. թանկ է ամեն ինչ, լավ շոուն հսկայական միջոցներ է պահանջում եւ երգչին նաեւ ֆինանսական հասունություն պարտադրում»:
Անկախ առկա խնդիրներից` բոլոր պարագաներում էլ հաճելի է սիրված երգը լսել սիրելի երգչի կենդանի կատարմամբ` իրական բեմից:

«ԱՌԱՆՑ ՏԵՍԱՀՈԼՈՎԱԿԻ ԿՄՈՌԱՑՎԵՍ»

Երգիչ ՄԻՀՐԱՆ ԾԱՌՈՒԿՅԱՆԻ համար էլ համերգները ոգեւորության, աշխատելու ուժի սկզբնաղբյուր են. «Առանց տեսահոլովակի կմոռացվես, այն հրաշալի հնարավորություն է հանդիսատեսին աշխատանքային նորություններդ ներկայացնելու, իսկ համերգները այնքա¯ն էներգիա են տալիս, օգնում հասկանալ, որ այն, ինչ դու անում ես, ծափահարողներ ունի... Ես ամեն համերգից հետո անքա¯ն եմ ոգեւորվում ու հասկանում, որ պիտի աշխատեմ»:

ԷԹԵՐԻ ՄԱՄՈՒԼՅԱՆ