«ԻՆՉՊԵ՞Ս ԿԱՐՈՂ ԵՄ ՄՏԵՐՄՈՒԹՅՈՒՆ ՈՒՆԵՆԱԼ ԱՅՆ ԱՆՁԻ ՀԵՏ, ՈՎ ՔՐԻՍՏՈՍԻ ԱՆՈՒՆՈՎ ԱՏԵԼՈՒԹՅՈՒՆ Է ՍԵՐՄԱՆՈՒՄ»

«ԻՆՉՊԵ՞Ս ԿԱՐՈՂ ԵՄ ՄՏԵՐՄՈՒԹՅՈՒՆ ՈՒՆԵՆԱԼ ԱՅՆ ԱՆՁԻ ՀԵՏ, ՈՎ ՔՐԻՍՏՈՍԻ ԱՆՈՒՆՈՎ ԳԱԼԻՍ Է` ԱՏԵԼՈՒԹՅՈՒՆ ՍԵՐՄԱՆԵԼՈՒ»

Երեկ Երեւանի Քանաքեռ-Զեյթուն ընդհանուր իրավասության դատարանում տեղի ունեցավ Երեւանի Ավետարանական եկեղեցու խորհրդի նախագահ Լեւոն Բարդակչյանի հայցն ընդդեմ «Իրավունք մեդիա» ՍՊԸ-ի դատական երկրորդ նիստը: Հայցորդ Ավետարանական եկեղեցու հովիվ Լեւոն Բարդակչյանը շարունակում է պնդել, որ iravunk.com կայքում 2014 թ. մայիսի 28-ին հրապարակված հոդվածում նշված «նողկալի հայտարարություն» արտահայտությունը պարունակում է վիրավորանք եւ զրպարտանք իր անձի նկատմամբ: Հիշեցնենք, որ «նողկալի հայտարարություն» ասելով` լրատվամիջոցը նկատի է ունեցել այն, որ Լ. Բարդակչյանը իր դեմ կատարված մահափորձից հետո ամենուր հայտարարում էր, թե Տ. Կոմիտաս վարդապետ Հովնանյանի հեռուստատեսային եթերից հետո, որտեղ անդրադարձել է Ավետարանական եկեղեցուն, իր դեմ մահափորձ են կատարել:

Այսինքն` դրանով Լ. Բարդակչյանը փորձել էր ոչ միայն մեղադրել Հայր սուրբին, այլեւ հենց ինքը վարկաբեկել նրա բարի անունն ու համբավը: Ինչեւէ, որ եղել է նման հայտարարություն, այլեւս ապացույցի կարիք էլ չկա, քանի որ հենց Լ. Բարդակչյանը եւս մեկ անգամ կրկնեց` անդրադառնալով ինչ-որ անձի կողմից իր վրա կատարված մահափորձին. «Կոմիտաս վարդապետի հայտարարությունից երկրորդ օրը, այդ մարդը…»:
Դատական նիստի որոշ ուշագրավ հայտարարությունների շուրջ «Իրավունքը» զրուցեց Մայր Աթոռ Սուրբ Էջմիածնի Հայորդաց տների տեսուչ-տնօրեն Հոգեշնորհ Տ. ԿՈՄԻՏԱՍ վարդապետ ՀՈՎՆԱՆՅԱՆԻ հետ:
-Հայր սուրբ, դատական նիստի ժամանակ Երեւանի Ավետարանական եկեղեցու խորհրդի նախագահ Լ. Բարդակչյանը անսպասելի հայտարարություն արեց` նշելով. «Մենք Կոմիտաս Վարդապետի հետ շատ մտերիմ ընկերներ ենք»: Երբեւէ մտերիմ ընկերներ եղե՞լ եք նրա հետ:
- Բարդակչյանը, երբ նոր էր եկել Հայաստան, ներկայացնում էր իր անձը այնպես, որ ինքը համագործակցում է Հայ առաքելական եկեղեցու հետ: Եվ այդ ծիրից ներս նա մտերմություն էր հաստատել Տ. Արսեն արքեպիսկոպոս Բերբերյանի եւ Տ. Գրիգորիս արքեպիսկոպոս Բունիաթյանի հետ, որն այսօր Ուկրաինայի Հայոց թեմի առաջնորդն է. այդ ժամանակ 1990-ականների սկիզբն էր: Նրանց հետ միասին կամ ավելին` նրանց միջոցով է, որ ես մի երկու-երեք անգամ շփվել եմ Բարդակչյանի հետ: Բայց նա, ինչպես այսօր է իր խոսքը ձեւափոխում եւ մատուցում, ինչ-որ ինքն է պահի ազդեցության տակ ուզում ասել, այն ժամանակ էլ ճշմարտությունը չխոստովանեց: Ասաց, որ պատրաստում է հավատացյալներ, որոնք վաղը կծառայեն Հայ առաքելական եկեղեցուն, այսինքն` խոսքը ոչ թե բողոքականություն ձեւավորող կառույցի մասին էր, այլ Հայ առաքելական եկեղեցու գիտակից, բանական եւ նվիրյալ անհատ ձեւավորելու մասին: Այսինքն` այն ժամանակ ես նրա հետ հարաբերվում էի` այդ խոսքերին հավատալով, թե Բարդակչյանը օգնում է հայ հավատացյալին` 70 տարի իր եկեղեցուց, կրոնից հեռացած լինելով` վերադառնալ իր արմատներին եւ քրիստոնեական արժեքներին:
- Ամեն դեպքում, նրա հետ ընկերային հարաբերություններ այսօ՞ր էլ չկան:
- Բացարձակապես, որեւիցե անգամ քաղաքավարությունից դրդված` կարող է  տեսնես մարդուն ու չզրկես Աստծո ողջույնից, բայց մեկին բարեւել` դեռ չի նշանակում մտերմություն ունենալ: Եվ ինչպե՞ս կարող եմ մտերմություն ունենալ այն անձի հետ, ով Քրիստոսի անունով գալիս է` ատելություն սերմանելու, ով Քրիստոսի անունով գալիս է պառակտում ու բաժանում մտցնելու մեր հավաքական հարաբերությունների մեջ:
- Ի դեպ, դատական նիստի ժամանակ դատավորն ակնարկեց, թե Հայ Առաքելական եւ Ավետարանական եկեղեցիները քույր եկեղեցիներ են...
- Քանի որ Ավետարանական եկեղեցին եւ Հայ առաքելական սուրբ եկեղեցին անդամ են եկեղեցիների համաշխարհային խորհրդի, որպես անդամներ` նրանք պետք է մեկը մյուսին նկատեն` որպես քույր եկեղեցի: Բայց ոչ մի քույր թույլ չի տա իր քրոջ զավակներին գողանալ: Չեմ կարող հասկանալ մեկ բան` ինչպես մեկը կարող է հայտարարվել քույր եկեղեցի` գողանալով իր քույր եկեղեցու անդամներին` դարձնելով իր եկեղեցու անդամ: Այստեղ ես քույրություն չեմ տեսնում: Բառը օգտագործելուց առաջ նախ պետք է անդրադառնանք, թե գործն ինչպիսի ընթացքով է զարգանում: Դժբախտաբար, գործը բացասաբար է զարգամում:

ՀՐԱՆՏ ՍԱՐԱՖՅԱՆ

Հ.Գ.- Նշենք, որ Երեւանի Ավետարանական եկեղեցու խորհրդի նախագահ Լեւոն Բարդակչյանի հայցն ընդդեմ «Իրավունք մեդիա» ՍՊԸ-ի դատական երրորդ նիստը կկայանա դեկտեմբերի 4-ին` ժամը 14:00-ին` Երեւանի Քանաքեռ-Զեյթուն ընդհանուր իրավասության դատարանում: