ԾՆՈՂՆԵՐԸ ՏԵՂՅԱԿ ՉԵՆ, ԹԵ ԻՆՉ Է ԿԱՏԱՐՎՈՒՄ ՄԱՆԿԱՊԱՐՏԵԶՆԵՐՈՒՄ՚

ԾՆՈՂՆԵՐԸ ՏԵՂՅԱԿ ՉԵՆ, ԹԵ ԻՆՉ Է ԿԱՏԱՐՎՈՒՄ ՄԱՆԿԱՊԱՐՏԵԶՆԵՐՈՒՄ՚

Մայրաքաղաքի մանկապարտեզներին մատակարարվող սննդի հետ կապված` կան բազմաթիվ մտահոգություններ, որոնք ի հայտ են եկել մի շարք կոնկրետ ուսումնասիրություններից եւ բացահայտված աղաղակող խախտումներից հետո: Այս ուղղությամբ ուսումնասիրությունները կատարել է ՙԻրազեկ եւ պաշտպանված սպառող՚ հասարակական կազմակերպությունը:
Ըստ այդ ուսումնասիրությունների` մի դեպքում մանկապարտեզին մատակարարվել է շուկայականից ցածր գներով սնունդ, մի այլ դեպքում` բարձր: ՀԿ-ի նախագահ Բաբկեն Պիպոյանի խոսքով` մանկապարտեզներում ուսումնասիրվել են ամենառիսկային համարվող սննդամթերքները` կաթնամթերք, միս, ձու, ինչպես նաեւ հաց, շաքարավազ, բուսայուղ, մրգահյութ: ՙՄանկապարտեզներին մրգահյութ մատակարարող ընկերություններից մեկը մրցույթում շահել է եւ իր արտադրանքը տալիս է 250 դրամով, իսկ մյուս ընկերությունը` 550 դրամով: Եթե 250 դրամանոց մրգահյութը խմելու համար պիտանի է, ինչո±ւ Է շահել 550 դրամանոցը, իսկ եթե պիտանի չէ, ինչո±ւ Է մուտք գործել մանկապարտեզ՚,- նշեց Բ. Պիպոյանը:
Իսկ ահա մսամթերքի դեպքում տեղի է ունեցել ճիշտ հակառակը. մատակարարող ընկերությունը պարտավորվել է մանկապարտեզներին 1800 դրամով տավարի փափուկ միս տալ, երբ նման միսը շուկայում կարելի է ձեռք բերել 3 հազար դրամով: Եթե հանկարծ պարզվի, որ այդ միսը սատկած անասունի է, ապա, ըստ Բ. Պիպոյանի, զարմանալ պետք չէ: Մանավանդ օրեր առաջ հայտնաբերվեց, որ մանկապարտեզներին մատակարարվել է հավի նեխած միս: Իհարկեª 1800 դրամով կարելի է նաեւ մատակարարել ներմուծված սառեցված տավարի միս: Սակայն դա էլ որակական չափանիշներով միանշանակ չի կարող բավարար համարվել, առավել եւս, երբ նախատեսված է երեխաների համար: Եվ, վերջապես չմոռանանք, որ ներկրվածի պարագայում միսը կարող է լինել նաեւ գոմեշի, որը ժամակին բանակին մատակարարելու համար մինչեւ իսկ աղմկահարույց քրեական գործ հարուցվեց:
Մանկապարտեզներին սնունդ մատակարարող ընկերությունների հետ Երեւանի քաղաքապետարանի կողմից կնքած 1000  էջանոց պայմանագրերի ուսումնասիրությունից հետո ՙԻրազեկ եւ պաշտպանված սպառող՚ ՀԿ-ն հանգել է այն եզրակացության, որ ՙպետության փողերի հետ խաղ են անում՚:
ՙՄեր երկրում սննդի հետ կապված աշխատանքները կատարվում է սիրողական մակարդակով. ով ցանկանա խորհուրդներ է տալիս` սա վտանգավոր է, այ սա վտանգավոր չէ, որի արդյունքում էլ հասարակությանը տրվում է ոչ պատշաճ տեղեկատվություն՚,- ընդգծեց պրն. Պիպոյանը: Իրավիճակին լուծում տալու համար նա տեղեկացրեց, որ դիմել են ՀՀ կառավարությանը, որպեսզի սահմանվի հատուկ կարգ, որով կպահպանվի մանկապարտեզներում սննդի տեղափոխման եւ պահպանման անվտանգության պայմանները: Բացի այդ կարգիցª պետք է ստեղծվի նաեւ անկախ փորձագիտական խումբ, որտեղ ներգրավված կլինեն լրագրողներ եւ հասարակական կազմակերպությունների ներկայացուցիչներ, որոնք իրավունք կունենան ցանկացած պահի մուտք գործել մանկապարտեզ եւ ուսումնասիրել, թե ինչ սնունդ են ընդունում երեխաները: ՙՄենք առաջարկել ենք նաեւ, որ յուրաքանչյուր մանկապարտեզ ունենա ծնողական խումբ, որպեսզի ամեն օր ստուգեն իրենց երեխաների սնունդը: Ծնողների 99 տոկոսը տեղյակ չէ, թե ինչ է կատարվում մանկապարտեզներում՚,- ավելացրեց մեր զրուցակիցը:
Իսկ թե ինչ է կատարվում մարզերի մանկապարտեզներում, Բ. Պիպոյանը դժվարացավ պատասխանել, քանի որ ուսումնասիրություններ չեն իրականացվել:

ԶՎԱՐԹ ԽԱՉԱՏՐՅԱՆ