ՙՀԱՅԱՍՏԱՆԸ ՉԻ ԿԱՐՈՂ ՈՒԿՐԱԻՆԱՅԻ ՆՄԱՆ ԹԱՏԵՐԱԲԵՄ ԼԻՆԵԼ՚

ՙՀԱՅԱՍՏԱՆԸ ՉԻ ԿԱՐՈՂ ՈՒԿՐԱԻՆԱՅԻ ՆՄԱՆ ԹԱՏԵՐԱԲԵՄ ԼԻՆԵԼ՚

ՙԱզդակ՚ լրագրողական ակումբում, ԱԺ ՀՀԿ խմբակցության պատգամավոր ՍՈՒՔԻԱՍ ԱՎԵՏԻՍՅԱՆԸ խոսելով նախօրեին արդեն ոչ թե ՙքառյակի՚, այլ ՙեռյակի՚ կողմից հանրահավաք անցկացնելու որոշման մասին` ասաց.

ՙՀԱՆՐԱՀԱՎԱՔԸ ԵՐԲԵՔ ՍՊԱՌՆԱԼԻՔ ՉԻ ԵՂԵԼ
ՀՀԿ-Ի ՀԱՄԱՐ՚

-Ես չէի ցանկանա մեկնաբանել, թե քառյակը ինչու է եռյակ դարձել, կամ կարող է հնգյակ դառնալ, դա իրենց որոշումն է, չնայած որ, ցանկալի է, որ քառյակը որպես այդպիսին մնար, որոնց աշխատանքը մեզ ավելի զգաստ էր պահում, ավելի արդյունավետ էինք աշխատում: Համենայնդեպս փաստն այն է, որ երկու օր առաջ ՙքառյակում՚ ՙեռյակը՚ որոշում է կայացրել` հանրահավաքին մասնակցելու համար, բայց հետաքրքիրն այն է, որ հանրահավաքին մասնակցելու է ՙեռյակը՚, չնայած հանդես են գալիս ՙքառյակի՚ անունից: Դա պատճառաբանում են նրանով, որ նախօրոք բարձրացրած 12 կետերի մասին հանրահավաքի ժամանակ կխոսեն ՙքառյակի՚ անունից: Դաշնակցությունը ժամանակին հայտարարել էր, որ կողմ են սահմանադրական բարեփոխումներին, իսկ ՙԺառանգությունը՚ իր մոտ քննարկումներ կատարեց, որոնց առաջարկությունները կարելի է քննարկել սահմանադրական բարեփոխումներից հետո: Բայց ես իրենց էլ չեմ հասկանում. ինչպես կարելի է` առանց սահմանադրական բարեփոխումների, անցնել կառավարման այս կամ այն համակարգին, քանի որ ամեն բան արվում է Սահմանադրությամբ: Որեւիցե քաղաքագիտական պատմության մեջ ես նման բան չեմ տեսել:
- Ստացվում է, որ եթե ՙքառյակը՚ դառնա ՙեռյակ՚, ՀՀԿ-ի վիճակը բարդանո±ւմ է:
- ՀՀԿ-ի վիճակը երբեւէ չի բարդացել եւ չի բարդանալու, պարզապես, մեզ համար ձեռնտու է առողջ ընդդիմություն ունենալը:
- Իսկ առողջ է մեր ընդդիմությունը:
- Դե, եթե իրենք իրենց հրաշալի են անվանում, նշանակում է, որ իրենք իրենց առողջ են տեսնում, իսկ թե հիմա եռյակը ինչ ձեւով կկոչվի, դա էլ իրենք կորոշեն:
- Ձեր կարծիքով` ՀՅԴ-ն կհամալրի կոալիցիայի շարքերը` ինչի մասին խոսում էին տարիներ շարունակ:
- Ես տեղյակ չեմ իրենց առաջարկներից, միգուցե, սահմանադրական բարեփոխումների մասով կլինեն, չգիտեմ: Երբ ժամանակը գա, կերեւա, պետք չի գուշակություններով առաջնորդվել:
- Ընդդիմադիրների կողմից իրականացվելիք հանրահավաքը դարձյալ հուժկու եւ սպառնալի±ց է ՀՀԿ-ի համար, թե հույս կա, որ մինչ հոկտեմբերի 10-ը ինչ-որ բաներ կփոխվեն:
- Հանրահավաքը երբեք սպառնալիք չի եղել ՀՀԿ-ի համար...
- Իսկ մարտի մեկը...
- Մարտի մեկը այլ բան է, ու տա Աստված, որ դրա հետ կապված` ամեն ինչ բացահայտվի, մեղավորները գտնվեն, եւ հաստատ համոզված եմ, որ կգտնվեն մեղավորներ` բոլոր ճամբարներում: Դրա համար այն մարդիկ, ովքեր հանրահավաք են անցկացնելու, մինչեւ վերջ պատասխանատու են` թե° մասնակիցների համար, թե° կազմակերպչական առումով, քանի որ լինում են դեպքեր, երբ կազմակերպիչները հանրահավաքին տեսնում են մի քանի հարյուր մարդ, ոգեւորվում են ու սկսում սահմաններից դուրս գալ, ավել-պակաս բաներ հայտարարել, երթեր կազմակերպել, գնալ նախագահական, ԱԺ-ի շենքի մոտ եւ այլն:
- Մի քանի օր առաջ հանրահավաք անցկացնելու հետ կապված` ՀՀ ոստիկանապետը սպառնալիք է հնչեցրել, սրա մասին ի±նչ կասեք:
- Ես չգիտեմ, թե ինչ է սպառնացել ոստիկանապետը, բայց եթե այդ հանրահավաքը թույլատրվել է, ապա համապատասխան կառույցներն ունեն իրենց պատասխանատվությունը` հանրավահաքի հետ կապված:
- Պարոն Ավետիսյան, Դուք կառավարման ո±ր համակարգի կողմնակիցն եք:
- ՀՀԿ-ն եւ առավել եւս երկրի նախագահը կողմնակից են այնպիսի կառավարման համակարգի, որ փոխադարձ վերահսկողության եւ տարանջատման համակարգ լինի: Այսինքն` իշխանության մի համակարգը մյուսի նկատմամբ ավելի շատ լիազորություններ չունենա: Բայց եւ այնպես, ես կողմնակից եմ կիսանախագահական համակարգին: Բայց  քանի որ խորհրդարանը ներկայացնում է մեր երկրի քաղաքական հիմնական ուժերին, հետեւաբար ճիշտ կլինի, որ խորհրդարանը ավելի շատ լիազորություններ ունենա:
Սահմանադրական բարեփոխումներով մենք ցանկանում ենք երեք հիմնական հարցի պատասխան ունենալ. նախ` մարդու իրավունքները, այսինքն` ոչ մի չինովնիկ չկարողանա որեւէ քաղաքացու իրավունքներ ոտնահարել, այսինքն` մարդակենտրոն սահմանադրություն ունենալ: Երկրորդ. բոլորը ամեն տեղ խոսում են դատական իշխանությունների անօրինականությունների մասին, իսկ մենք առաջարկում ենք դրա դեմն առնելու համար սահմանադրական բարեփոխումների արդյունքում ունենալ դատական անկախ իշխանություն, եւ երրորդը` արդեն ասացի, իշխանության թեւերի տարանջատում եւ վերահսկելիություն իրականացնելն է: Հիմա ուզում եմ հասկանալ, սրա ինչի±ն է  դեմառհասարակ ընդդիմությունը, կամ ասում են` դրա ժամանակը չէ, բա էդ դեպքում ե±րբ է ժամանակը:
- 12 կետանոց ընդդիմության պահանջին հասարակությունը արդյոք ծանո±թ է, Դուք մարզային այցելությունների ժամանակ նկատո±ւմ եք դա:
- Ինչ խոսք, այդ պահանջներից հասարակության մի մասն է տեղյակ, իսկ մյուս մասին, հատկապես մարզերում, հետաքրիր են իրենց սոցիալական հարցերը: Այդ 12 կետերից կան կետեր, որոնք կառավարության ծրագրերում արդեն ներկայացված են, կան կետեր, որոնք անիրականանալի են, եւ միգուցե 10 կետ իրականանա, բայց այդ երկուսը` ոչ, որի հետ կապված էլ, նրանք կարող են ասել, որ տեսաք` իշխանությունը չկատարեց մեր պահանջը: Ընդդիմությունը կարող է ամեն ինչ ասել` առանց հիմնավորման, իսկ իշխանությունները նման քայլով չեն կարող առաջնորդվել:

ՄԻԳՈՒՑԵ, ԱՅՍ ԱՆԳԱՄ ԴԱՍԵՐԸ ՀԱԿԱՌԱԿՆ ԵՆ ԱԶԴԵԼ
Զ. ՓՈՍՏԱՆՋՅԱՆԻ ՎՐԱ

-Ինչով է, ըստ Ձեզ, պայմանավորված ՙԺառանգություն՚ խմբակցության պատգամավոր Զարուհի Փոստանջյանի լռակյաց պահվածքը խորհրդարանում, եթե համեմատենք վերջինիս ագրեսիվ ու հիսթերիայի հասնող ելույթները առհասարակ, մինչ ԱՄՆ մեկնելն ու դասընթացներ անցնելը:
- Միգուցե, Ամերիկան հակառակ ազդեցությո±ւնն է ունեցել, որովհետեւ ով գալիս է այնտեղից, փորձում է ավելի շատ քննադատել իշխանություններին, միգուցե, այս անգամ հակառակն է ազդել Զ. Փոստանջյանի վրա:
- Պարոն Ավետիսյան, արդեն խոսում են ՄՄ-ին անդամակցելու ժամկետների մասին` նշելով հոկտեմբերի 10-15: Կարծում եք, որ արդեն ՀՀ-ն կգնա դրան:
- 10-15-ը, ըստ իս` բանակցությունների վերջնական ավարտը կլինի, իսկ ստորագրումը երբ կլինի, դեռ պարզ չէ, չնայած արդեն որեւէ հակասություն չկա չստորագրման համար:
- Ձեր կարծիքով` ՙեռյակի՚` հոկտեմբերի 10-ին անցկացվելիք հանրահավաքի օրը պատահական ընտրված չէ±ր:
- Հավանաբար` այո, մտածում են, որ այդ կերպ կարող են ինչ-որ ազդեցություն ունենալ գործընթացի վրա, բայց դա չի լինի:
- Վերջերս տողերիս հեղինակը գտնվում էր Ղրիմում, որտեղ զրուցելով հայտնի ռուս լրագրող Դմիտրի Կիսելյովի հետ, նա ասաց, որ Հայաստանում մայդան են նախապատրաստում, դուք կիսո±ւմ եք այդ տեսակետը:
- Մի շարք քաղաքական ուժեր Հայաստանում ոգեւորվել էին մայդանով: Իսկ ես ասել եմ ու կասեմ` ով մտածում է, որ Հայաստանում կարող են մայդան անել, ուրեմն` նա առաջինը պատասխան է տալու ժողովրդին: Թող մարդիկ չմտածեն, որ Հայաստանը Ուկրաինայի նման կարող է թատերաբեմ լինել: Ես մայդանի նախադեպեր չեմ տեսնում: Մայդանը Ուկրաինայի կործանումն է, իսկ ՀՀ ցանկացած քաղաքական ուժ գիտակցում է, որ չպետք է անել այնպիսի բան, որ երկիրը գնա կործանման:
- Չեք գտնում, որ մեզ մոտ կան քաղաքական ուժեր, ովքեր այդքան էլ սրտացավ չեն մեր երկրի համար:
- Եթե անգամ կան, ինչի մասին չեմ ցանկանում մտածել, ապա անպայման պատասխան կտան ժողովրդին:

ԱՐՄԵՆՈՒՀԻ ՀԱԿՈԲՅԱՆ