ՙԿՅԱՆՔԻ ԽՈՍՔ՚ ԱՂԱՆԴԻ ԴՊՐՈՑԸ ՓԱԿՎԵՑ

ՙԿՅԱՆՔԻ ԽՈՍՔ՚ ԱՂԱՆԴԻ ԴՊՐՈՑԸ ՓԱԿՎԵՑ

ՙԻրավունքի՚ հավաստի տեղեկություններով` այս օրերին փակվել է ՙԿյանքի խոսք՚-ի տարրական դպրոցը: Հիշեցնենք, որ վերոնշյալ դպրոցը պատկանում է ՙԿյանքի խոսք՚ աղանդին` պարագլուխ Արթուր Սիմոնյանի հովանավորչությամբ, որտեղ բացի հանրակրթական ուսումնական ծրագրերից, մատուցվում էր ՙԿյանքի խոսք՚ աղանդի կրոնական ուղղվածությունը` դպրոց հաճախող երեխաներին, իսկ դպրոցն էլ գտնվում էր հենց աղանդի հավաքատեղիի շենքում` Թբիլիսյան խճուղու վրա:
Այս հարցի հետ կապված` ՍԻՄ կուսակցությունը եւ ՙԻրավունք՚ թերթը բազմիցս բարձրաձայնել են եւ ահազանգել: Առավել մանրամասն` դպրոցի փակման մասին տեղեկություններ ստանալու համար դիմեցինք ՀՀ ԿԳ նախարարություն, որտեղից ստացանք հետեւյալ պատասխանը. ՙԻ պատասխան Ձեր 09.09.2014 թ. գրության, տեղեկացնում ենք, որ ՙԿյանքի խոսք դպրոց՚ ՍՊԸ-ի տնօրենի 2014թ. սեպտեմբերի 1-ին դիմումի համաձայն` դպրոցի միջնակարգ հանրակրթական ծրագրերով գործունեության լիցենզիան կասեցվել է մինչեւ 2015 թ. օգոստոսի 25-ը:
Միաժամանակ տեղեկացնում ենք, որ ՙԿյանքի խոսք դպրոց՚ ՍՊԸ-ի տարրական, հանրակրթական ծրագրերով գործունեության լիցենզիան կասեցվել է 2010թ. ՀՀ ԿԳ նախարարության աշխատակազմի լիցենզավորման գործակալության լիցենզավորման պարտադիր պայմանների ու պահանջների պահպանման նպատակով իրականացված ուսումնասիրության արդյունքում՚:
Առնվազն տարօրինակ մտածելակերպ պետք է ունենա դպրոցի տնօրինությունը, որպեսզի ուսումնական տարվա հենց առաջին օրը կասեցնի դպրոցի գործունեությունը, այն դեպքում, երբ դպրոց հաճախող աշակերտները եւ իրենց ծնողներն արդեն իսկ ծախս են տեսել ուսումնական տարվան նախապատրաստվելու համար: Իսկ թե որն է եղել պատճառը` դպրոցի գործունեությունը մեկ տարի հետաձգելու համար, կփորձենք ճշտել առաջիկայում:

ԱՐՄԵՆՈՒՀԻ ՀԱԿՈԲՅԱՆ