«ԱՍՏՂԵՐՈՎ ՃԱԿԱՏԱԳԻՐ ԳՈՒՇԱԿԵԼԸ ԹՅՈՒՐԻՄԱՑՈՒԹՅՈՒՆ Է». ԳԻՏՆԱԿԱՆ

«ԱՍՏՂԵՐՈՎ ՃԱԿԱՏԱԳԻՐ ԳՈՒՇԱԿԵԼԸ  ԹՅՈՒՐԻՄԱՑՈՒԹՅՈՒՆ Է». ԳԻՏՆԱԿԱՆ

Երբեմն մեր քաղաքացիները «աստղագիտություն» եւ  «աստղագուշակություն» հասկացությունները նույնացնում եւ շփոթում են՝ ավելին՝ քաղաքացիներից շատերը  լուրջ են վերաբերվում աստղագուշակությանը: «Իրավունքի» հետ զրույցում Հայկական աստղագիտական ընկերության համանախագահ, գիտնական Արեգ Միքայելյանը աստղագուշակությունը  կեղծ գիտություն է համարում: Հայոց լեզուն  գիտնականի խոսքով ճկուն է, որի շնորհիվ ունենք «աստղաբանություն» հասկացությունը, որը նշանակում է երկնային երեւույթների  ազդեցությունը   կենդանի օրգանիզմների  վրա: «Նախ շատ ուժեղ է լուսնի ու արեգակի ազդեցությունը, դրանց գրավիտացիոն դաշտն է շատ ուժեղ: Լուսնով են պայմանավորված ծովերի ու օվկիանոսների մակընթացություններն ու տեղատվությունները, որը հայտնի փաստ է: Լուսինը մարդու վրա եւս ուժեղ ազդեցություն ունի: Շատերն են ասում՝ լիալուսնի ժամանակ իրենց վատ են զգում»:

Արեգակնային բռնկումների ժամանակ ըստ աստղագետի, լուրջ հետեւանքներ են  առաջանում երկրի վրա: «Սրտանոթային  հիվանդություններ ունեցող մարդիկ մահանում են կամ լուրջ խնդիրներ են ունենում: Այնպես որ  պետք է համատեղ՝բժշկությունն ու աստղագիտությունը  ուսումնասիրեն այդ երեւույթները»,- մանրամասնեց Արեգ Միքայելյանը՝ հավելելով, որ մոլորակները եւս որոշակի ազդեցություն ունեն կենդանի օրգանիզմների վրա:

Ինչ վերաբերում է  աստղերով ապագան կանխագուշակելուն, դա ըստ գիտնականի, զեղծարարություն է, անգամ այդ հորոսկոպներն են անհեթեթություն: «Համաստեղությունը երեւակայելի պատկեր է, իրենից ոչինչ չի ներկայացնում: Եթե մի որեւէ աստղագուշակ դա իմանար, որեւէ հորոսկոպ չէր կարող կազմել»,-եզրափակեց Հայկական աստղագիտական ընկերության համանախագահը:

Սոնա Դավթյան