ՀԱՇՄԱՆԴԱՄ ԱԶԱՏԱՄԱՐՏԻԿԸ ԱՆՏՈԿՈՍ ՎԱՐԿ Է ԽՆԴՐՈՒՄ ԿԱՌԱՎԱՐՈՒԹՅՈՒՆԻՑ ՍԵՓԱԿԱՆ ԳՈՐԾԸ ՍԿՍԵԼՈՒ ՀԱՄԱՐ

ՀԱՇՄԱՆԴԱՄ ԱԶԱՏԱՄԱՐՏԻԿԸ ԱՆՏՈԿՈՍ ՎԱՐԿ  Է ԽՆԴՐՈՒՄ ԿԱՌԱՎԱՐՈՒԹՅՈՒՆԻՑ ՍԵՓԱԿԱՆ ԳՈՐԾԸ ՍԿՍԵԼՈՒ ՀԱՄԱՐ

Երկրորդ կարգի հաշմանդամ, մարտի դաշտում երկու անգամ վիրավորված  ազատամարտիկ Սամվել Մինասյանը  արցախյան  ազատամարտի շատ մասնակիցների նման ապրում է սոցիալ-տնտեսական ծանր պայմաններում: Մոտ 14-15 տարի է, ազատամարտիկը պարբերաբար գրավոր դիմել է տարբեր պատկան մարմիններին իրեն աշխատանքի տեղավորելու խնդրանքով, սակայն որեւէ պատասխան չի ստացել: «Չեմ ցանկանում որեւէ կազմակերպությունից կամ անհատներից փող մուրալ, ցանկանում եմ ինքնուրույն վաստակել  օրվա հացս, հոգալ ընտանիքիս խնդիրները: Ֆիզիկական աշխատանք չեմ կարող անել, քանի որ կանտուզիայից ձեռքերս դողում են: Եթե առողջականս ներեր, Վայքի հետախուզական վաշտի հրամանատարի  պաշտոնում կշարունակեի աշխատել»,-  «Իրավունքի» հետ զրույցում անկեղծանում է Եղեգնաձոր Նորավան թաղամաս,Պռոշյան փողոց, 1-ին նրբանցք, 24 տանը  բնակվող, երեք անչափահաս երեխաների հայրը:

Վերջինս վաղը՝ երկրորդ անգամ, Եռաբլուրում մոտենալու  է ՀՀ վարչապետ Հովիկ Աբրահամյանին եւ խնդրելու նրանից ընդունելություն: «Թեւ հաշմանդության թոշակ ու նպաստ եմ ստանում, բայց դա բավարար չէ ընտանիքիս հոգսերը հոգալու համար: Տանս մեջ ոչ մի գույք չունեմ՝ ո՛չ սառնարան, ո՛չ լվացքի մեքենա, ո՛չ զգեստապահարան: Այս բոլորը թոշակով ու նպաստով չեմ կարող գնել: Խնդրում եմ  վարչապետին ու կառավարությանը, որ ինձ անտոկոս երկարաժամկետ վարկ տրամադրի՝սեփական գործ սկսելու համար: Ցանկանում եմ տանս կից մի փոքրիկ հագուստի խանութ բացել եւ մի վարսահարդարման կենտրոն, որ  եթե ինձ  մի բան պատահի, կինս ու երեխաներս քաղցած չմնան»,- մանրամասնեց ազատամարտիկը:

Մանրամասները՝տեսանյութում

Սոնա Դավթյան