ՙՄԻԱԿ ՓՐԿՈՒԹՅՈՒՆՆ ԱՅՆ Է, ՈՐ ՀԱՅ ԷՍՏՐԱԴԱՆ ԱՆՑՆԻ ՊԵՏԱԿԱՆ ՀՈՎԱՆՈՒ ՏԱԿ՚

«ՄԻԱԿ ՓՐԿՈՒԹՅՈՒՆՆ ԱՅՆ Է, ՈՐ ՀԱՅ ԷՍՏՐԱԴԱՆ

ԱՆՑՆԻ ՊԵՏԱԿԱՆ ՀՈՎԱՆՈՒ ՏԱԿ»

Օրերս երգիչ ՆԱՐԵԿ ԲԱՎԵՅԱՆԸ ներկայացավ նոր ոճով ու նոր տեսահոլովակով: «Մեր մեծերը» երգի հեղինակը հենց Նարեկն է, իսկ գործիքավորումը վստահել է Մարտին Միրզոյանին: Տեսահոլովակի բարդ ու դժվարին աշխատանքը` ռեժիսուրան, իրականացրել է ռեժիսոր Արամայիս Հայրապետյանը: Նարեկը հատուկ է ցանկացել երգը նվիրել մեծերին` ոչ այն պատճառով, որ երիտասարդները դադարել են հարգել մեծերին, այլ թե ինչպես կարող են ականջ չդնելով մեծերի խոսքին` ոտքներն առնի քարին:

«ՑԱՎՈՔ, ՈՒՇԱՑՈՒՄՈՎ ԵՆՔ ՍԿՍՈՒՄ ԳՆԱՀԱՏԵԼ»

- Երգը նվիրվում է մեր մեծերին` ծնողներին ու տատիկ-պապիկներին: Ուստի որոշեցի հենց այդպես էլ վերնագրել` «Մեր մեծերը»:

Չէի ասի, թե ժամանակակից երիտասարդությունը չի հարգում մեծերին: Ուղղակի, մի տեսակ օրինաչափ է, որ պատանեկության տարիներին այդքան էլ չենք հասկանում մեծերի խորհուրդներն ու ճիշտ հակառակն ենք անում: Դրան հետեւում է մի ուրիշ օրինաչափություն, գալիս է մի ժամանակ ու հասկանում ենք, թե ինչքան ճիշտ էին մեր մեծերը: Ցավոք, ուշացումով ենք սկսում գնահատել ու հասկանալ նրանց խոսքերը:
- Հիմա շատերին կթվա, թե այս տեսահոլովակով վերջ եք դնում երգացանկում եղած նախորդ ոճերին: Սա նո՞ր կերպար է ու ավարտվելու է այս տեսահոլովակո՞վ:
- Իհարկե` ոչ: Անկեղծ ասած, ինքս էլ չգիտեմ` ինչ սպասեմ ինձնից (ծիծաղում է- Լ.Ե.): Ուրեմն, սպասենք անակնկալների:

Ո՞ՒՐ Է ԳՆՈՒՄ ՀԱՅԿԱԿԱՆ ԵՐԳԱՐՎԵՍՏԸ

- Նարեկ, որպես արդեն հայկական շոու-բիզնեսում հաստատուն դիրքեր զբաղեցրած  երգիչ, ըստ Ձեզ, ո՞ւր է գնում հայկական երգարվեստը: Ինչո՞ւ նախկինի նման հաճախ չեն լինում համերգներ, մենահամերգներ, ձայնասկավառակի շնորհանդեսներ...
- Չգիտեմ, թե ուր է գնում հայկական երգարվեստը, իրոք չգիտեմ: Համերգներ չկան, որովհետեւ, դրանք անհետաքրքիր են դարձել: Հանդիսատեսի համար արդեն քիչ է, երբ երգիչը մենակ կանգում է բեմում ու երգում է: Մարդիկ ուզում են  կենդանի նվագախումբ, հետաքրքիր շոուներ տեսնել բեմում: Իսկ այդ ամենը կբերի նրան, որ տոմսերը շատ թանկ կլինեն: Իսկ եթե տոմսերն էլ թանկ եղան, մարդիկ չեն կարող գալ, որովհետեւ վճարունակ չեն: Ստացվում է, որ փակուղում ենք հայտնվել: Իսկ ձայնասկավառակներն արդեն ակտուալ չեն, ցանկացած երգ կարելի է ներբեռնել  համացանցից ու վայելել առանց լումա ծախսելու:

«ՎԼԱԴԻ ՀԵՏ ԿՈՆՖԼԻԿՏ ՈՒՆԵՆՈՒՄ ԵՄ ՄԻԱՅՆ ԲԵՄՈՒՄ»

-Արդեն վերսկսվել են «Սիրո կամուրջ» մյուզիքլի ներկայացումները, որտեղ գլխավոր հերոսներց մեկին եք մարմնավորում: Մի փոքր կխոսե՞ք այդ ներկայացման հաջողությունների ու թերությունների մասին:
- Այո, սեպտեմբերի 14-ից կրկին խաղացինք «Սիրո կամուրջ» մյուզիքլը, ինչի համար շատ ուրախ եմ: Ներկայացման հաջողություններից շատ կարող եմ խոսել` նոր շունչ, նոր պարային, լուսային, դեկորացիոն ու բեմադրական լուծումներ: Մի խոսքով, նոր ու գեղեցիկ, հետաքրքիր ու սիրված ներկայացում, որտեղ կա թե՛ սեր, թե՛ հումոր եւ թե՛ նենգ ու չար գործեր, որոնք իրականացնում է իմ հերոսը: Իսկ թերություն ունի ամեն բան, բայց ես դրա մասին չեմ խոսի, որովհետեւ սիրում եմ մեր ներկայացումը ու չեմ պատրաստվում թերությունները բացահայտել:
- Ի վերջո, կոնֆլիկտ ունեցե՞լ էիք նույն ներկայացման մեջ մեկ այլ գլխավոր դերակատարի` երգիչ Վլադիմիր Բարխոյանի հետ, թե՞ այն մտածված PR էր նախագծի շրջանակներում:
- Վլադի հետ կոնֆլիկտներ ունենում եմ միայն  բեմում` ներկայացման շրջանակներում:

«...ՈՐ ՀԱՄԵՐԳՆԵՐՆ ԻՐԱԿԱՆԱՑՎԵՆ ՊԵՏԱԿԱՆ ՄԱԿԱՐԴԱԿՈՎ»

-Նարեկ, շատերի կարծիքով այսօր հայկական շոու-բիզնեսը սկսվում եւ ավարտվում է տարբեր տեսակի ակումբներից, ի՞նչ անել, որ այն նախկինի նման վերադառնա համերգասրահ:
- Կարծում եմ` միակ փրկությունն այն է, որ հայ էստրադան անցնի պետական հովանու տակ ու այդ համերգներն իրականացվեն պետական մակարդակով: Այսինքն` ինչպես նախկինում էր` կային պետական կոլեկտիվներ, էստրադային նվագախմբեր` իրենց երգիչներով, որոնք շատ հաճախ ունենում էին շատ հետաքրքիր ու որակյալ համերգներ:

Զրույցը` ԼԻԼԻԹ ԵՂԻԱԶԱՐՅԱՆԻ