ՀԱՅԱՍՏԱՆԻ ՊԱՏՄՈՒԹՅԱՆ ԹԱՆԳԱՐԱՆԸ` ՆՅՈՒ ՅՈՐՔԻ «ԱՍՈՐԵՍՏԱՆԻՑ ՄԻՆՉԵՎ ԻԲԵՐԻԱ» ՄԻՋԱԶԳԱՅԻՆ ՑՈՒՑԱՀԱՆԴԵՍՈՒՄ

ՀԱՅԱՍՏԱՆԻ ՊԱՏՄՈՒԹՅԱՆ ԹԱՆԳԱՐԱՆԸ` ՆՅՈՒ ՅՈՐՔԻ «ԱՍՈՐԵՍՏԱՆԻՑ ՄԻՆՉԵՎ ԻԲԵՐԻԱ» ՄԻՋԱԶԳԱՅԻՆ ՑՈՒՑԱՀԱՆԴԵՍՈՒՄ

Սեպտեմբերի 15-ին Հայաստանի պատմության թանգարանի մասնակցությամբ Նյու Յորքի Մետրոպոլիտեն թանգարանում բացվել է «Ասորեստանից մինչեւ Իբերիա. մայրցամաքների քառուղիներով դասական դարաշրջանի արշալույսին» միջազգային ցուցահանդեսը, որը կտեւի մինչեւ 2015 թվականի հունվարի 4-ը:

Ինչպես տեղեկացանք ՀՀ մշակույթի նախարարությունից, ցուցահանդեսը մի մեծ նախագծի շարունակություն է, որի երկու փուլերը կայացել են  2003 թվականին. ««Առաջին քաղաքների արվեստը. Ք.ա. III հազարամյակը Միջերկրական ծովից մինչեւ Հնդկաստան» եւ 2008 թ. «Բաբելոնից անդին. արվեստը, առեւտուրը եւ դիվանագիտությունը Ք. ա. II հազարամյակում» խորագրերով: Հայաստանի պատմության թանգարանը մասնակցել 2008 թվականին կայացած ցուցահանդեսին՝ բրոնզեդարյան մշակույթի եզակի նմուշով:
Ներկայիս ցուցահանդեսի նպատակն է ցուցադրել Արեւմուտքի  գեղարվեստական ավանդույթների ակունքներն ու զարգացումը, որոնց արմատները սերում են Հին Մերձավոր Արեւելքի եւ Միջերկրականի երկրների մշակույթների փոխազադեցություններից Ք. ա. I հազարամյակում: Ցուցահանդեսում ներկայացված 300 նմուշները փոխառված են Արեւմտյան Եվրոպայի, Կովկասի, Միջին Արեւելքի, Հյուսիսային Աֆրիկայի եւ Միացյալ Նահանգների հայտնի թանգարաններից: Ցուցահանդեսին մասնակցում են 14 երկրների թանգարաններ` Լոնդոնի Բրիտանական թանգարանը, Փարիզի՝ Լուվրը, Բեռլինի պետական, Վատիկանի թանգարանները, Հայաստանի պատմության, Կահիրեի Հնությունների, Աթենքի Ազգային հնագիտական, Կիպրոսի ազգային, Հռոմի Էտրուսկների, Բեյրութի ազգային, Մետրոպոլիտենի արվեստի թանգարանները, ինչպես նաեւ թանգարաններ՝ Իսպանիայից, ԱՄՆ-ից եւ Իսրայելից: Հայաստանի պատմության թանգարանը ցուցահանդեսին ներկայացրել է ուրարտական արվեստի ինը բացառիկ նմուշներ, որոնք առանձնահատուկ կարեւորություն ունեն ցուցադրության համար որպես բացառիկ եւ արժեքավոր վկայություն` հավաստելով հայկական մշակույթի մշտառկա դերը եւ նրա ունեցած ազդեցությունը տարածաշրջանի` Ասորեստանի, Արեւմտյան Իրանի եւ խեթական պետությունների արվեստի եւ մշակույթի համատեքստում: Հայաստանի պատմության թանգարանի մասնակցությունն այս ցուցահանդեսին աշխարհի ամենահեղինակավոր հարթակներից մեկում՝ Նյու Յորքի Մետրոպոլիտեն թանգարանում, հայկական բազմադարյան մշակույթի եւ արվեստի արժեւորման եւ հանրահռչակման բացառիկ պատեհություն է»,- ասված է նախարարության տարածած հաղորդագրությունում:

ԼԻԼԻԹ ԵՂԻԱԶԱՐՅԱՆ