«ԼԵՎՈ՜Ն, ԼԵՎՈ՜Ն» ՎԱՆԿԱՐԿՈՂ ՈՍՏԻԿԱՆՆԵՐԸ ԽՈՑԵՑԻՆ ԶՈՒՐԱԲՅԱՆ ԼԵՎՈՆԻ ՍԻՐՏԸ

«ԼԵՎՈ՜Ն, ԼԵՎՈ՜Ն» ՎԱՆԿԱՐԿՈՂ ՈՍՏԻԿԱՆՆԵՐԸ
ԽՈՑԵՑԻՆ ԶՈՒՐԱԲՅԱՆ ԼԵՎՈՆԻ ՍԻՐՏԸ

Վերջերս «Արզնի» օդանավակայանում ոստիկանության զորքերի զորավարժություններ էին իրականացվում: Բեմադրված սցենարի համաձայն` քաղաքացիական հագուստով ոստիկանները վերածվել էին «ակտիվիստների» ու վանկարկում էին. «Լեւո՜ն, Լեւո՜ն»: Իսկ զորավարժությունից հետո լրագրողների հետ զրույցում ՀՀ ոստիկանապետ Վլադիմիր Գասպարյանը կես կատակ-կես լուրջ ոչ իշխանական քառյակի խոստացած հանրահավաքին ընդառաջ` ասել էր. «Թեժ աշնան համար կան սառը ցնցուղներ, իսկ երբ ցնցուղը չի օգնում, շատ ավելի թեժ աշուն կարող ենք կազմակերպել»: Վերոնշյալ հայտարարության վերաբերյալ փորձեցինք պարզել ԱԺ ՀԱԿ խմբակցության ղեկավար ԼԵՎՈՆ ԶՈՒՐԱԲՅԱՆԻ տեսակետը.
-Ես չգիտեմ` ինչ է ինքը ուզում հուշել, բայց սառը ցնցուղի կարիք ունի Վլադիմիր Գասպարյանը` մի քանի պատճառով: Պատճառ համար առաջին` չգիտեմ ինքը ինչի է ուզում հասնել այդ շոուով, ինքը հասավ միայն մեկ բանի` բոլորը տեսան իշխանության վախը, սարսափը` գալիք այս հանրավաքին ընդառաջ: Իրենց անհանգստությունն են ցույց տվել: Փաստորեն, եթե կազմակերպում ես նման բան ու լրագրողների ես հրավիրում, ավելի շատ փորձում ես հոգեբանորեն ազդել: Երկրորդ` սրանով նա ցույց տվեց, որ բացարձակապես պատկերացում չունի տարրական ժողովրդավարական կանոների, օրենքների, Սահմանադրության մասին, որովհետեւ եթե դու հայտարարում ես քո կեղծ ցուցարարաների միջոցով, որ քո հիմնական թշնամին Լեւոնն է, դա նշանակում է, որ ոստիկանությունը վերածում ես հասարակական կարգը պահպանող գործիքից իշխանությանը սպասարկող գործիքի:
- Ի դեպ, պարոն Զուրաբյան, օրերս լրատվամիջոցներից մեկին տված հարցազրույցում ՀԱԿ վարչության անդամ Զոյա Թադեւոսյանը ասել է. ՙԵկեք փորձենք, Ծառուկյանին տանք հնարավորություն, եթե լավն է` բրավո, եթե այդպիսին չէ, դե ԱԽՔանոցը միշտ էլ կա՚: Ինչպե±ս եք վերաբերվում, որ Ձեր վարչության անդամը այս կերպ է արտահայտվում գործընկեր կուսակցության ղեկավարի հասցեին:
- Լավ, լավ, չէ-չէ, չարժի մանր բաներից խոսել:
- Այսինքն` Զոյա Թադեւոսյանին անլուրջ եք համարում:
- Լուրջ չեմ համարում այս խոսակցությունը...

ՀՐԱՆՏ ՍԱՐԱՖՅԱՆ