«ԳՐԻԳՈՐ ԼՈՒՍԱՎՈՐԻՉ» Բ/Կ-ՈՒՄ ՄԱՀԱՑԱԾ ՍՅՈՒԶԱՆՆԱ ԻՍՐԱՅԵԼՅԱՆԻ ԲԺԻՇԿԸ ԽՈՒՍԱՓՈՒՄ Է ՆԵՐԿԱՅԱՆԱԼ ՔՆՆԻՉԻՆ

«ԳՐԻԳՈՐ ԼՈՒՍԱՎՈՐԻՉ» Բ/Կ-ՈՒՄ ՄԱՀԱՑԱԾ ՍՅՈՒԶԱՆՆԱ ԻՍՐԱՅԵԼՅԱՆԻ ԲԺԻՇԿԸ ԽՈՒՍԱՓՈՒՄ Է ՆԵՐԿԱՅԱՆԱԼ ՔՆՆԻՉԻՆ

Ինչպես հայտնի է օգոստոսի  երկուսին «Գրիգոր Լուսավորիչ» բժշկական կենտրոնում մահացել էր 28-ամյա Սյուզաննա Իսրայելյանը 4-րդ երեխան ծննդաբերելիս: Դատաբժշկական փորձաքննության համաձայն՝ կինը մահացել է պտղաջրային էմբոլիայից, նրա մոտ եղել է նաեւ սակավարյունություն: «Իրավունքի» հետ զրույցում Սյուզաննա Իսրայելյանի մայրը՝ Հասմիկ Հովհաննիսյանը, ասաց, որ երեխան դեռ «Գրիգոր Լուսավորիչ» բժշկական կենտրոնում է. «Երեխան չի կարողանում նորմալ սնունդը կուլ տալ: Զոնդով են կերակրում: Մնացած ամեն ինչը՝ քաշը, մյուս օրգանները նորմալ են»:

Հասմիկ Հովհաննիսյանի խոսքով՝  եթե դստեր մոտ սակավարյունություն է եղել, բժիշկները նրան արյուն ներարկել են, թե՞ ոչ:

Սյուզաննա Իսրայելյանի մահվան գործով հարուցվել է քրեական գործ, սակայն  մեր զրուցակցի խոսքով՝բժիշկը՝ Արեն Գյոզալյանը,  քննիչին  չգիտես ինչու չի ներկայանում. «Քննիչն ինձ ասաց, որ պետք է ես արդեն գնամ բժշկի մոտ»:

Փորձեցինք կապ հաստատել նաեւ Արեն Գյոզալյանի հետ, սակայն   հեռախոսազանգերն անպատասխան մնացին:

Հիշեցնենք՝ Հասմիկ Հովհաննիսյանը պնդում է՝ իր դստեր մահվան համար  պատասխանատու «Գրիգոր Լուսավորիչ» բժշկական կենտրոնի ծննդաբերական բաժանմունքի վարիչ Արեն Գյոզալյանն է, ով ընդունել է  Սյուզաննայի երեխայի ծնունդը, կատարել համապատասխան բժշկական միջամտություն:

Սոնա  Դավթյան