«ՕԵԿ-Ի ՊԱՀՎԱԾՔԸ ՀԱՐԻՐ Է ՇՈՈՒԲԻԶՆԵՍԻՆ, ՈՉ ԹԵ ԿՈՒՍԱԿՑՈՒԹՅԱՆԸ. ԱԳՐԱՐԱՅԻՆ ՀԱՄԱԼՍԱՐԱՆԻ ՊՐՈՌԵԿՏՈՐ

«ՕԵԿ-Ի ՊԱՀՎԱԾՔԸ ՀԱՐԻՐ Է ՇՈՈՒԲԻԶՆԵՍԻՆ, ՈՉ ԹԵ ԿՈՒՍԱԿՑՈՒԹՅԱՆԸ». ԱԳՐԱՐԱՅԻՆ ՀԱՄԱԼՍԱՐԱՆԻ ՊՐՈՌԵԿՏՈՐ

Ագրարային համալսարանի պրոռեկտոր Պարույր Էֆենդյանը «Իրավունքի» հետ զրույցում անդրադառնալով  Ագրարարային համալսարան-ՕԵԿ  խնդրին,  ասաց, որ իր համար որպես Երեւանի բնակչի, վիրավորական է,որ կարող են ապօրինի շինարարություն իրականացնել մայրաքաղաքում:

Պրոռեկտորը հիշեցնում է  Ագրարային համալսարան-ՕԵԿ պատմությունը. Երևանի նախկին քաղաքապետ Երվանդ Զախարյանը 2008-ին  «Օրինաց երկիր» կուսակցությանը տվել է  մի փաստաթուղթ,  ըստ որի՝ Ագրարային համալսարանի տարածքից   262  քմ  տրվում է իրենց: Զավեշտալին այն  է, որ նույն քաղաքապետը 2006 թ-ի մայիսի 6-ի  որոշմամբ ՕԵԿ-ի կողմից ապօրինի կառուցված կաթսայատունն ու ավտոտնակը  ճանաչում է  որպես ապօրինի կառույց և որոշում   կայացնում այն քանդել: Նույն քաղաքապետը 2006-ի օգոստոսի 15-ին չեղյալ է համարում իր նախորդ որոշումը: Հաջորդ օրը՝ օգոստոսի 16-ին, քաղաքապետը որոշում է այդ ապօրինի կառույցները  ճանաչել պետական սեփականություն եւ հանձնել Ագրարային համալսարանին:  Դրա հիման վրա ՀՀ կառավարությունը  2006 թ-ի դեկտեմբերի 28-ին 1900 Ա որոշմամբ  որոշում է պետական սեփականություն ճանաչված  կառույցն անժամկետ եւ անհատույց   հանձնել  Ագրարարային համալսարանին հողի հետ:  Թվաց՝ ամեն ինչ ավարտվեց, սակայն ութ տարի անց՝ 2014-ին,  ՕԵԿ-ի հանձնարարությամբ բանվորները սկսեցին տանիքը քանդել:

-Պրն Էֆենդյան, Ձեր կարծիքով ինչու հիմա՝ութ տարի անց, ՕԵԿ-ն այդ քայլին դիմեց: Որեւէ պատճառ տեսնո՞ւմ եք:

-Իհարկե տեսնում եմ: Իրենք ութ տարի իշխանության մեջ  էին: Եթե ապօրինի գործողություն անեին, միանշանակ կասեին, որ  իշխանության մաս կազմող կուսակցությունն է ապօրինի քայլ անում: Հենց իրենք հերթական անգամ դարձան ընդդիմադիր, սկսեցին քանդել: Իրենց հիմա ձեռնտու է, որ իրենց  կպնեն, իրենց ցույց տան, իրենք էլ ասեն՝տեսեք, մենք ընդդիմադիր ենք,  դրա  համար  մեզ հետ այդպես են վարվում:

-Այսինքն՝ ՕԵԿ-ը «զոհի» կերպարո՞վ է հանդես գալիս:

-Իհարկե, այլապես  նման քայլ կաներ անցյալ տարի: Երկրորդ՝ շրջանառվող  լուրերի համաձայն՝ իրենցից ինչ-որ մեկը կամ կուսակցությունը ձեռք է բերել «Երեւան tv» հեռուստաընկերությունը և  պետք է ունենալ տեսագրությունների համար դահլիճ:

-Այս պահին որեւէ շինաշխատանք կատարվո՞ւմ է, թե ոչ:

-Դե հիմա, երբ շենքը  պատրաստ է, չգիտեմ՝ ներսում ինչ են անում: Երեւի ներքին հարդարման աշխատանքներ են կատարվում: Գիտեք, վիրավորական է, որպես Երեւանի բնակչի, որ չունենալով շինթույլտվություն, կարելի է կառուցել  շենք մայրաքաղաքում: Նման արտոնությունից,  կարծում եմ, ոչ ոք չի կարող օգտվել: Զոռբայությամբ  օրը ցերեկով, նաեւ գիշերը  կառուցեցին  շենք՝ չունենալով ոչ մի փաստաթուղթ: Քաղաքապետարանը երկու անգամ տուգանել է ՕԵԿ-ին ապօրինի շինարարություն անելու համար: Ես ուղղակի մարդկային առումով չեմ հասկանում՝ ինչ հաճույք ստացան դրանից: Միայն նրա համար, որ խոսե՞ն  իրենցից, թեկուզ բացասական, բայց  խոսե՞ն: Կներեք, դա հարիր է շոուբիզնեսին, ոչ թե կուսակցությանը:

Մանրամասները՝տեսանյութերում

Համալսարանի հատակագիծը, որով երևում է, որ  համալսարանի տարածքի միայն 262 քմ-ն է պատկանում ՕԵԿ-ին:

Ագրարարային համալսարանի բակում օգոստոսի 13-ի բողոքի ակցիաներից մեկ օր առաջ՝օգոստոսի 12-ին, պրոռեկտորը Հովհաննես Մարգարյանին նամակ է գրում:

Օգոսստոսի 12-ին պրոռեկտորը  նամակ է գրել նաեւ ՀՀ ոստիկանապետին

Սոնա Դավթյան