ԲՀԿ ԵՐԻՏԱՍԱՐԴՆԵՐԸ ԿՈՉ ԵՆ ԱՆՈՒՄ ԶՈՅԱ ԹԱԴԵՎՈՍՅԱՆԻՆ ԿՈՌԵԿՏ ԼԻՆԵԼ

ԲՀԿ ԵՐԻՏԱՍԱՐԴՆԵՐԸ ԿՈՉ ԵՆ ԱՆՈՒՄ ԶՈՅԱ ԹԱԴԵՎՈՍՅԱՆԻՆ ԿՈՌԵԿՏ ԼԻՆԵԼ

ՀԱԿ վարչության անդամ ԶՈՅԱ ԹԱԴԵՎՈՍՅԱՆԸ` առաջ ընկնելով իր կուսակից գործընկերներից, սեպ է խրել ՀԱԿ-ԲՀԿ հարաբերությունների մեջ: Վերջինս լրատվամիջոցներից մեկի հետ զրույցում ասել է, ավելի ճիշտ փակել է աչքերն ու բացել բերանը. «Գուցե փորձենք, գուցե տեսենք` Գագիկ Ծառուկյանն իրո՞ք այն չէ, ինչ-որ մենք մտածում ենք, գուցե` Ծառուկյանը շատ ավելի լավ բան կանի պետության, իր ժողովրդի համար: Եկեք փորձենք, Ծառուկյանին տանք հնարավորություն, եթե լավն է` բրավո, եթե այդպիսին չէ, դե ԱԽՔանոցը միշտ էլ կա»:

Վերոնշյալ հայտարարության վերաբերյալ «Իրավունքը» փորձեց պարզել ԱԺ ԲՀԿ խմբակցության պատգամավորների տեսակետը, սակայն, տիկին Թադեւոսյանի «մտքի գոհարներն» արհամարվեցին նրանց կողմից: Մինչդեռ ԲՀԿ երիտասարդների միության Երեւանի խորհրդի համակարգող ԴԱՎԻԹ ՈՐՍԿԱՆՅԱՆԸ ի լուր հանրության տվել է սպառիչ պատասխան. «Խորհուրդ կտայի այն քաղաքական գործիչներին, ովքեր իրենց համարում են ժողովրդի, այսպես ասած, չակերտավոր սրտացավ պահապանները, իրենց քաղաքական գործունեության ընթացքում մեր ժողովրդի մատից փուշ անգամ հանած չկան, սկսում են ակտիվանալ ու գնահատականներ հնչեցնել` անցնելով կոռեկտության եւ սթափ դատելու սահմանները: Չի կարելի ուժեղ մարդկանց ֆոնին ինքնադրսեւորվել: Խոսքս մասնավորապես վերաբերվում է Զոյա Թադեւոսյանին»: Ապա հավելել. «Տկն. Թադեւոսյան, Ձեր դիտարկումները տեղին չեն ու ոչ կոռեկտ են: Գագիկ Ծառուկյանի գործունեությանը Դուք չեք, որ պետք է գնահատան տաք եւ հանդես գաք ժողովրդի անունից: Մեր ժողովուրդը լավ գիտի Ձեր տեղն էլ, ախքերի տեղն էլ»:

ՀՐԱՆՏ ՍԱՐԱՖՅԱՆ