ՆԱԽԿԻՆ ԿԱՌԱՎԱՐՈՒԹՅՈՒՆԸ, ՈՐ ԼԱՎ ԱՇԽԱՏԵՐ ԱՇԽԱՏԱՎԱՐՁԵՐԸ ԲԱՐՁՐ ԿԼԻՆԵՐ, ՊԵՏԲՅՈՒՋԵՆ ԷԼ` ԼԻՔԸ. ՌԱՖԻԿ ՊԵՏՐՈ

ՆԱԽԿԻՆ ԿԱՌԱՎԱՐՈՒԹՅՈՒՆԸ, ՈՐ ԼԱՎ ԱՇԽԱՏԵՐ ԱՇԽԱՏԱՎԱՐՁԵՐԸ ԲԱՐՁՐ ԿԼԻՆԵՐ,

ՊԵՏԲՅՈՒՋԵՆ ԷԼ` ԼԻՔԸ. ՌԱՖԻԿ ՊԵՏՐՈՍՅԱՆ

ՀՀԿ անդամ  Ռաֆիկ Պետրոսյանից «Իրավունքը» պարզեց՝ որպես  քաղաքացի ավելի լավ ապրում է հիմա, թե նախկին նախագահ Ռոբերտ Քոչարյանի  ժամանակ: «Դա կախված է աշխատանքի բնույթից»,- ասաց  ՀՀԿ անդամը, ապա  հիշեցրեց՝ Քոչարյանի ղեկավարման տարիներին պատգամավոր էր, ստանում էր աշխատավարձ, իսկ հիմա ապրում է ընդամենը 52.000 դրամ թոշակով:

Ըստ պատգամավորի՝ լավ ապրելը կապ չունի Սերժ Սարգսյանի ու Ռոբերտ Քոչարյանի հետ: «Պետք է տնտեսությունը զարգացած լինի, իսկ այսօր մենք դոփում ենք տեղում»,- ասաց նախկին պատգամավորը:

«Ո՞վ է պատասխանատու ստեղծված իրավիճակի համար» հարցին՝  Ռաֆիկ Պետրոսյանը պնդում է նախկին կառավարությունը: «Եթե նա լավ աշխատեր, ապա  բժիշկների, ուսուցիչների աշխատավարձն էլ բարձր կլիներ, պետական բյուջեն էլ լիքը»,- հիմնավորում է  քաղաքական գործիչը:

ՀՀԿ անդամի համար անսպասելի  չէ, որ  նախկին  վարչապետը  ԱՄՆ-ում դեսպան է նշանակվել: «Դե էսքան տարիներ վարչապետի պաշտոն է զբաղեցրել, ուրեմն էսօր կարող է նաեւ դեսպան աշխատել, որը ես չեմ ընդունում, բայց իմ ընդունելով չէ»,- անկեղծանում է մեր զրուցակիցը:

- Պրն Պետրոսյան, ինչպես եք արձագանքում նախկին նախագահ Ռոբերտ Քոչարյանի վերջին հարցազրույցում հնչեցված քննադատություններին իշխանության  հասցեին, մասնավորապես  պետք է պաշտոնյաներն անձնական շահերը մի կողմ թողնեն հանուն երկրի բարգավաճման:

-Դա ճիշտ է ասում, բայց  երբ ասում է՝եղած սահմանադրությունը բավարար է, պետք չէ սահմանադրությունը փոխել, հարց եմ տալիս՝ բա՞ երբ է պետք փոխել: Սահմանադրական թերությունները   խոչընդոտում են մեր առաջընթացին:

-Նախկին նախագահը կարողացա՞վ իր անձնական շահերը մոռանալ՝ հանուն պետության զարգացման:

-Չեմ կարող ասել: Ժողովուրդը մի բան է խոսում, իրականությունը՝  այլ…

- Քոչարյանն իր վերջին հարցազրույցում խոսել է նաեւ իր ղեկավարման տարիներին տնտեսական մեծ ցուցանիշների, զարգացած տնտեսության  մասին…

-Դա փաստ է, որ տնտեսական նվաճումներ կային, բայց տնտեսական ցուցանիշները բարձր էին միայն շինարարության ոլորտում: Մնացած հարցերում առաջընթաց չենք ունեցել: Արտադրության մեջ   նա առաջընթաց չի ապահովել: Իսկ շինարարության  ոլորտում արձանագրված ցուցանիշներով միայն ժողովուրդը չի կարող ապրել:

- Քոչարյանը վերադարձի հնարավորություն ունի՞:

-Չեմ կարծում, սահմանադրական փոփոխությունները  կատարվեն… գուցե ցանկություն ունենա, գուցե ոչ: Վերադառնալու հնարավորությունը կերեւա, երբ նա հայտարարի՝ մտնում  է քաղաքական ասպարեզ,  թեկնածությունը դնում է նախագահի  աթոռի համար, եթե իհարկե, կառավարման համակարգը փոխվի: Իսկ եթե կառավարման համակարգը փոխվի, Քոչարյանը կարող է դառնալ ԱԺ պատգամավոր, ԱԺ նախագահ եւ այլն:

- Քառյակի միջոցո՞վ կարող է Քոչարյանը ետ վերադառնալ:

- Քառյակը երբեք միասնական չի եղել, էսօր էլ միասնական չէ: Հետագայում էլ միասնական կարծիքի չի գա:

- Իսկ ԱԺ  ոչ իշխանական  չորս ուժերը կարո՞ղ են իրենց  շուրջը ժողովրդին մոբիլիզացնել:

- Մեծ չափով չեն կարող դա անել, քանի որ թույլ են, կայացած չեն, կադրային հնարավորություններ չունեն:

Սոնա Դավթյան