ՙՖՐԱՆՍԻԱՑԻ ԳԵՂԱՆԿԱՐՉԻՆ ՀԻԱՑՐԵԼ Է ՀԱՅ ԸՆՏԱՆԻՔԻ ՄՈԴԵԼԸ

ՖՐԱՆՍԻԱՑԻ ԳԵՂԱՆԿԱՐՉԻՆ ՀԻԱՑՐԵԼ Է ՀԱՅ ԸՆՏԱՆԻՔԻ ՄՈԴԵԼԸ

Ֆրանսիայում հայտնի գեղանկարիչ եւ լուսանկարիչ Դավիդ Ռոբեսսոնը Հայաստանի ու հայկական մշակույթի մասին լսել է մանկուց:

Ուսումնասիրելով տարբեր երկրների մշակույթներ` նա եկել է այն եզրակացության, որ Հայաստան աշխարհը մշակույթի բնօրրանն է, իսկ Արարատ լեռը` հայ ժողովրդի եւ հայ մշակույթի հավերժության խորհրդանիշ:

ՙԵԹԵ ՏԱՌԱՊՈՒՄ Է ՀԱՅ ԺՈՂՈՎՈՒՐԴԸ, ԱՊԱ ԱՄԲՈՂՋ
ՄԱՐԴԿՈՒԹՅՈՒՆՆ Է ՏԱՌԱՊՈՒՄ՚

Հայտնի գեղանկարիչը շատ է առնչվել հայ արվեստագետների հետ, որոնց համարում է մշակույթի դեսպաններ, ովքեր Հայաստանում եւ Հայաստանի սահմաններից դուրս ստեղծում են մնայուն արժեքներ: Տարիներ անց իրականացել է գեղանկարչի երազանքը` Հայաստանում է եւ նախապատրաստվում է իր անհատական ցուցահանդեսին: Այն տեղի կունենա 2015 թվականի հունիսին: Հայաստան աշխարհը տեսնելուց զատ, նա երազում է բարձրանալ Արարատ լեռան գագաթը, որը նրան հմայել է իր գեղեցկությամբ: ՙԻրավունքի՚ հետ զրույցում գեղանկարիչը նկատեց` գուցե Արարատ լեռան գագաթին իր մտապատկերում հայտնվեն այն կենդանիները, որոնք Նոյն իր հետ տարել էր տապան:

ՙՏԵՂՅԱԿ ԵՄ, ՈՐ ՕՍՄԱՆՅԱՆ ԿԱՅՍՐՈՒԹՅԱՆ ԿՈՂՄԻՑ ՀԱՅԵՐԸ
ԵՆԹԱՐԿՎԵԼ ԵՆ ՑԵՂԱՍՊԱՆՈՒԹՅԱՆ՚

-Ինձ համար կարեւոր է հաղթահարել Արարատի բարձունքը, որը հաղթահարել է  մարդկության մարագեն` Նոյը: Այնտեղ բարձրանալով` ես ավելի խոր բան եմ տեսնում, քան հասարակ լեռնագնացությունը: Մի ազգի ներկայացուցիչ եմ, որն անցել է բազմաթիվ փորձությունների միջով` ես հրեա եմ: Հրեաներն էլ նույն ճակատագիրն են ունեցել, ինչ որ հայերը: Լավ տեղյակ եմ հայ ժողովրդի պատմության բոլոր դրվագներին, հատկապես այն ողբերգական պատմությանը, որը բաժին է հասել նաեւ հրեաներին: Տեղյակ եմ, որ  Օսմանյան կայսրության կողմից հայերը 1915 թվականին ենթարկվել են ցեղսպանության: Իհարկե, այդ ողբերգությունը հնարավոր չէ մոռանալ, սակայն ջանում եմ, որ այդպիսի դեպքեր պատմության մեջ այլեւս չկրկնվեն: Կարծում եմ` հայ ժողովուրդը մարգարե է. եթե տառապում է հայ ժողովուրդը, ապա ամբողջ մարդկությունն է տառապում:

ՙԿՑԱՆԿԱՆԱՅԻ, ՈՐ 1915 ԹՎԱԿԱՆԻ ԿՈՏՈՐԱԾՆԵՐՆ ԱՅԼԵՎՍ ՉԿՐԿՆՎԵԻՆ՚

-2015 թվականին լրանում է Հայոց ցեղասպանության 100-րդ տարելիցը, եւ ես Հայաստանում հանդես կգամ անհատական ցուցահանդեսով եւ այլ ծրագրերով: Դեռ չեմ ուզում դրանց մասին բարձրաձայնել: Միայն մեկ բան կասեմ` կցանկանայի, որ 1915 թվականի կոտորածներն այլեւս չկրկնվեին: Սա է իմ գաղափարը, թե ինչպես այդ ամենը կներկայացնեմ հայ ժողովրդին: Այդ ամենը` արդեն հաջորդ տարի:

ՀԱՅ ԱԶԳԸ ԼԱՎԱԳՈՒՅՆԸ ՓՈԽԱՆՑԵԼՈՒ ՀԱՂՈՐԴԱԳՐՈՒԹՅՈՒՆ ՈՒՆԻ

-Հայ ազգին տված իմ բնորոշումների մեջ համոզվել եմ նաեւ Հայաստանում, երբ մոտիկից շփվել ու ծանոթացել եմ հայերի հետ: Նրանց ազնվությունը, բարությունն ինձ հիացրել են: Հայ ազգը մարդկությանը լավագույնը փոխանցելու հաղորդագրություն ունի, նա այդ ամենն անում է նույնիսկ չգիտակցելով: Հայն անընդհատ այդ գործընթացի մեջ է: Օրինակ ինձ հիացրել է հայկական ընտանիքի մոդելը, որը կրկին փոխանցվում է աշխարհին, այլ հարց է, թե ուրիշ ազգեր այդ ամենը վերցնում են, թե ոչ: Ոչ մի երկրում մարդիկ այնքան մոտ չեն կանգնած մշակույթին, ինչքան որ հայերը: Ֆրանսիա վերադառնալով` իմ երեք երեխաներին պետք է մանրամասն ներկայացնեմ այն ամենը, ինչ տեսա այստեղ, իսկ թե իմ տեսածի արդյունքում ինչ կտավ կստացվի, չեմ կարող ասել:
Դ. Ռոբեսսոնը Հայաստանում կմնա մեկ շաբաթ, Ֆրանսիա մեկնելուց հետո կրկին կվերադառնա Հայաստան: Իր խոսքով` հստակ որոշել է` որոշ ժամանակ կստեղծագործի հայկական մթնոլորտում:

ԶՎԱՐԹ ԽԱՉԱՏՐՅԱՆ