ՈՒՍԱՄԱ ԲԵՆ ԼԱԴԵՆԻՆ ՓՈՐՁՈՒՄ ԵՆ ՓՈԽԱՐԻՆԵԼ ԻՍԼԱՄԻՍՏՆԵՐՈՎ. ՔԱՂԱՔԱԳԵՏ

ՈՒՍԱՄԱ ԲԵՆ ԼԱԴԵՆԻՆ ՓՈՐՁՈՒՄ ԵՆ  ՓՈԽԱՐԻՆԵԼ ԻՍԼԱՄԻՍՏՆԵՐՈՎ. ՔԱՂԱՔԱԳԵՏ

Իսլամական պետության ահաբեկիչները  նորից սպառնում են Մոսկվային և խոստանում պատերազմ հրահրել Հյուսիսային Կովկասում: Արդյոք  Մոսկվան ոչնչացնելու ցանկությունը միայն իսլամիստներինն է, թե՞ այս ամենի ետեւում արեւմտյան այլ ուժեր կան: Քաղաքագետ Լեւոն Շիրինյանն  «Իրավունքի» հետ զրույցում ասաց, որ  իսլամիստների  սպառնալիքների ետեւում կանգնած են Ուկրաինային պաշտպանողները: «Մերձավոր  Արեւելքը  անգլոֆրանսիական նախագիծ է, որը քրիստոնեական մշակույթի, քաղաքակրթության  ու քրիստոնեական փոքրամասնությունների դեմ է: Անգլոֆրանսիական այդ նախագծի հեղինակները կցանկանան, որ իսլամիստներն ավերածություններ անեն նաև Հյուսիսային Կովկասում»,- ասաց քաղաքագետը:

Լեւոն Շիրինյանի խոսքով՝  իսլամիստները և նրանց հովանավորող ուժերը ցանկանում են թուլացնել Ռուսաստանին, նրա համար խնդիր ստեղծել:

Ինչ վերաբերում է ԱՄՆ-ի կողմից միջազգային  լիարժեք միջազգային կոալիցիա ձևավորելու փորձերին,  քաղաքագետը  դժվարացավ ասել՝որքանով կոալիցիա ստեղծելու փորձերը հաջողությամբ կպսակվեն և ո՞ր երկրները կմիանան  այդ կոալիցիային:

Իսլամիստների այս սպառնալիքները Հայաստանի համար, ըստ Շիրինյանի, լուրջ խնդիր չեն կարող առաջացնել: «Պարզապես մեր հարեւան երկրներում անհանգստություն կարող է առաջանալ, տարածաշրջանում  անհանգիստ վիճակ կարող է ստեղծվել»,-կարծում է քաղաքագետը:

ԻՍԼԱՄԻՍՏՆԵՐԸ ՀԱՅԱՍՏԱՆԻ ՀԱՄԱՐ ՎՏԱՆԳԱՎՈՐ ՉԵՆ, ԲԱՅՑ  ՌՈՒՍԱՍՏԱՆԸ  ՊԵՏՔ Է ՀԵՏԵՎՈՒԹՅՈՒՆՆԵՐ ԱՆԻ

Իսլամիստները մոտ մեկ ամիս առաջ հայտարարել էին, որ իրենց ազդեցությունը  տարածելու են նաեւ Ադրբեջանում եւ Թուրքիայում:  «Ինչ վատ կլինի որ, եթե իսլամիստներն իրենց ավերածություններն Ադրբեջանում անեն: Բայց մի բան է հայտարարելը, մի բան է իրականացնելը»,- ասաց Լեւոն Շիրինյանը:

Մեր զրուցակիցը, սակայն առաջ է քաշում մեկ այլ վարկած եւս. չի բացառվում՝  իսլամիստների թիկունքում կանգնած ուժերը փորձում են սպանված Ուսամա Բեն Լադենին փոխարինել իսլամիստներով՝ դրանով արհեստական խնդիր ու խոչընդոտներ   առաջացնելով  Մերձավոր Արեւելքի , Ռուսաստանի և իսլամիստների դեմ պայքարող երկրների համար:

Սոնա Դավթյան