ԱՆԳՅԱԼՆԵՐԻՆ ԱՄԵՆԱՇԱՏՆ ԵՆ ՎՃԱՐՈՒՄ.ԱԶԱՏԱՄԱՐՏԻԿԸ ԹՈՇԱԿԻՑ ԶՐԿՎԵԼՈՒ ՎՏԱՆԳԻ ԱՌԱՋ Է

ԱՆԳՅԱԼՆԵՐԻՆ ԱՄԵՆԱՇԱՏՆ ԵՆ ՎՃԱՐՈՒՄ.ԱԶԱՏԱՄԱՐՏԻԿԸ ԹՈՇԱԿԻՑ ԶՐԿՎԵԼՈՒ ՎՏԱՆԳԻ ԱՌԱՋ Է

«Կոռնիձոր» ջոկատի հրամանատար, ազատամարտիկ Արա Խուդավերդյանը իր հաշմանդամության թոշակից զրկվելու վտանգի առջեւ է: «Իրավունքի» հետ զրույցում  ազատամարտիկն ասաց, որ իրեն տուգանել են ՃՈ կանոնները խախտելու համար: Ի սկզբանե  մեր զրուցակիցը, շատ այլ վարորդների նման, դեմ լինելով  տեսանկարահանող սարքերի ու արագաչափերի  տեղադրմանը, իր բողոքի ու ընդվզման ձայնն է բարձրացրել և չի մուծել  տուգանքը: Չվճարելու հետեւանքով  տուգանքը բազմապատկվել է՝ վերածվելով մոտավորապես 140-150.000 դրամի: «Կոնկրետ չգիտեմ՝ ինչքան պետք  է վճարեմ, բայց մի բան հաստատ է՝  վճարվելիք տուգանքը 79.000 հաշմանդության թոշակիցս ավելի է»,- մանրամասնեց Խուդավերդյանը:

Ազատամարտիկի խոսքով՝ անհնար է մեր երկրում՝հատկապես մայրաքաղաքում, առանց խախտումների մեքենա վարել: «Ռոբոտ էլ լինես, չես կարող առանց խախտումների երթեւեկես»,- զայրացած ասաց  արցախյան ազատամարտի մասնակիցը:

«Կոռնիձոր» ջոկատի հրամանատարն ու մի շարք քաղաքացիներ, որոնք եւս այս խնդրի առաջ են կանգնած, ԴԱՀԿ-ի աշխատակիցների միջոցով կարողացել են համոզել բանկին, որ ընդամենը մի փոքր գումար պահի իրենց օգոստոս ամսվա թոշակից, որպեսզի թոշակի մնացած մասով ազատամարտիկը կարողանա դեղեր գնել:

Արա Խուդավերդյանը, սակայն, չի պատրաստվում ձեռքերը ծալած  նստել. «Դիմելու եմ «Նախախորհրդարան»  նախաձեռնության վարորդների դիմում- բողոքներն ընդունող իրավաբաններին, հակառակ դեպքում չի բացառվում մինչեւ հաջորդ ամիս տուգանքը չվճարելու դեպքում գուցե ամբողջ թոշակս կալանքի տակ մնա»:

Մեր դիտարկմանը, որ ՃՈ կանոնների խախտման համար  նախատեսված տուգանքի չափերը օրենքով են հաստատված, հետեւաբար, պետք է դրանք ստիպված վճարել, ազատամարտիկն այսպես պատասխանեց. «Մեր պետությունը  անգյալներին է ամենաշատը վճարում. պատգամավորների, նախարարների աշխատավարձը բարձրացրեց  մեծ չափով, իսկ ազատամարտիկինը՝ միայն 5000 դրամով: Ես տուգանքը կվճարեմ այն դեպքում, երբ ազատամարտիկի  թոշակը հավասարվի դատավորի ու դատախազի աշխատավարձի չափին»:

Սոնա Դավթյան