ՙԻՆՉ-ՈՐ ՉԱՐԱԳՈՐԾ ՓՈՐՁԵԼ Է ՑԵԽ ՇՊՐՏԵԼ Թ°Ե ԻՄ, Թ°Ե ՊՈԼԻՏԵԽՆԻԿԻ ՀԵՂԻՆԱԿՈՒԹՅԱՆ ՎՐԱ՚

ՙԻՆՉ-ՈՐ ՉԱՐԱԳՈՐԾ ՓՈՐՁԵԼ Է ՑԵԽ ՇՊՐՏԵԼ
Թ°Ե ԻՄ, Թ°Ե ՊՈԼԻՏԵԽՆԻԿԻ ՀԵՂԻՆԱԿՈՒԹՅԱՆ ՎՐԱ՚

Արդեն քանի օր է Հայաստանի պետական ճարտարագիտական համալսարանի ռեկտորի պաշտոնակատար, Երեւանի ավագանու անդամ ՀՈՎՀԱՆՆԵՍ ԹՈՔՄԱՋՅԱՆԸ ողջ համացանցի, ավելին` հանրապետության ուշադրության կենտրոնում է: Հիշեցնենք, որ համացանցում տարածվել էր ռեկտորի եւ բուհի աշխատակցուհու ֆեյսբուքյան նամակագրությունը, որտեղ բացահայտվում էր նրանց սիրային կապը: Մեկ այլ նամակում էլ, ռեկտորի անունից ԿԳ նախարար Արմեն Աշոտյանի հասցեին անբարո խոսքեր էին գրված:
Հովհաննես Թոքմաջյանը հենց սկզբից հերքում էր իր մասնակցությունն այդ պատմությանը` նշելով, որ իր ֆեյսբուքյան էջը կոտրել են, կեղծ նամակագրություն տեղադրել եւ ուղարկել իր բոլոր ֆեյսբուքյան ՙընկերներին՚: Եվ ահա երեկ Հատկապես կարեւոր գործերով քննչական վարչությունում հարուցվել է Քրեական գործ ՔՕ-ի 254-րդ հոդվածի 1-ին մասի հատկանիշներով (համակարգչային տեղեկատվությանն ապօրինի տիրանալը, որը պատժվում է տուգանքով` նվազագույն աշխատավարձի երկուհարյուրապատիկից չորսհարյուրապատիկի չափով, կամ կալանքով` առավելագույնը երկու ամիս ժամկետով, կամ ազատազրկմամբ` առավելագույնը երկու տարի ժամկետով): Գործի շրջանակներում առայժմ ներգրավված անձինք չկան:
Մեզ հետ զրույցում պարոն Թոքմաջյանը փոխանցեց, որ դիմել է իրավապահներին, որպեսզի իրավապահ մարմինները պարզեն այդ ՙստոր խաղը խաղացողի ինքնությունը՚:
- Ում մասին որ խոսվում է, ընդհանրապես նման բան լինել չէր կարող. նա իմ ընկերոջ աղջիկն է: Ու առհասարակ ես երբեք որեւէ կնոջ հետ ինձ թույլ չեմ տա նման գռեհիկ արտահայտություններով խոսել: Ես ասել ու ասում եմ, որ դա մտացածին հերյուրանք է իմ անվան շուրջ, նման կեղտոտ խաղ խաղացողների միակ նպատակը իմ բարի համբավը արատավորելն է, այլ բացատրություն ես չեմ տեսնում: Ինչ-որ չարագործ փորձել է ցեխ շպրտել թե° իմ եւ թե° Պոլիտեխնիկի հեղինակության վրա: Աբսուրդ նյութեր են, այդտեղ նշված բառերի կեսն ինձ համար անծանոթ է, իսկ, առհասարակ, ես կանանց նկատմամբ երբեք հայհոյանք չեմ գրել, չեմ ասել: Աշոտյանն էլ իմ լավագույն ընկերներից է, որին ես շատ գնահատել եմ միշտ: Համալսարանը դուրս է եկել զարգացման ուղի, շատերին դա չի գոհացնում: Ու քանի որ չեն կարող ասելª կաշառակեր եմ, փորձում են անձնապես վիրավորել եւ վարկաբեկել: Սա ներսից է արվում, նույն ձեռագիրն է: Սա իմ վրա չի ազդելու, շարունակելու եմ տանել իմ կուրսը. մեր համալսարանը պետք է դառնա կոռուպցիոն ռիսկերից դուրս, ուսանողներին ծառայող մաքուր բուհ, որեւէ մեկին չի հաջողվելու ինձ շեղել այս ուղղությունից: Ափսոս, ես այս պահին ֆեյսբուքյան իմ էջ մտնել չեմ կարողանում, քանի որ այն գտնվում է իրավապահների հսկողության տակ, սակայն երբ արդեն կարողանամ մտնել, ի ցույց աշխարհի կներկայացնեմ, թե ինչպիսի երկխոսություն է եղել իմ եւ ընկերոջս աղջկա միջեւ: Ռուզաննա Հայրապետյանի հետ իմ խոսակցությունը եղել է զուտ աշխատանքային բնույթի: Ամեն դեպքում, էդ անողը կամ կազմակերպողը թող լավ իմանա, որ ես հետամուտ եմ լինելու, որպեսզի այս ամենը բացահայտվի, քանի որ իրականությանը չի համապատասխանում: Շատերին եմ կասկածում այս ամենում, սակայն անուններ նշել չեմ կարող, քննություն է գնում, վաղ թե ուշ ամեն ինչ կպարզվի:

ԻԼՈՆԱ ԱԶԱՐՅԱՆ