ԼԵՎՈՆ ՏԵՐ-ՊԵՏՐՈՍՅԱՆԻ ԲԻԶՆԵՍԸ ՙԲԱՐԳԱՎԱՃՈՒՄ՚ Է

ԼԵՎՈՆ ՏԵՐ-ՊԵՏՐՈՍՅԱՆԻ ԲԻԶՆԵՍԸ ՙԲԱՐԳԱՎԱՃՈՒՄ՚ Է

Մամուլում բազմիցս գրվել է (եւ չի հերքվել), որ հայտնի ՙքաղաքագիտական վերլուծությունից՚ եւ ՙհրաշալի քառյակի՚ ձեւավորումից հետո ՀԱԿԿ-ի ու ԲՀԿ-ի միջեւ առաջացել են բարիդրացիական ու փոխշահավետ հարաբերություններ: Մասնավորապես` Լեւոն Տեր-Պետրոսյանի ՙքաղաքագիտական վերլուծությունների՚ արդյունքում ԲՀԿ-ն աստիճանաբար մաքրվեց ՙմարտի 1-ի՚ թեմայից, ներկայացվեց որպես գաղափարական քաղաքական ուժ, իսկ ԲՀԿ առաջնորդից կերտվեց ՙբուրժուա-դեմոկրատական հեղափոխության՚ առաջամարտիկի կերպար:
Իր նախկին դիրքորոշումներից կտրուկ հրաժարվելու արդյունքում Լ. Տեր-Պետրոսյանը մամուլի կողմից կնքվեց որպես ՙԲՀԿ-ի փաստաբան՚, իսկ ինչպես հայտնի է` լավ փաստաբանները լավ են վարձատրվում, հատկապես այն դեպքում, երբ փաստաբանը, ոչ ավելի, ոչ պակաս, երկրի առաջին նախագահն է:
Ասում են, թե ԲՀԿ-ի առատաձեռնության շնորհիվ է, որ ՀԱԿԿ-ն կարողանում է հոգալ գրասենյակային ծախսերը, իր կայքի աշխատակիցներին ապահովել աշխատավարձով եւ այլն: Սակայն տրամադրվող գումարն այնքան մեծ է, որ կոնգրեսականները մի պահ չեն կողմնորոշվել, թե ինչ անել ավելցուկ գումարով, բայց Լ. Տեր-Պետրոսյանը ելք է գտել նաեւ այս իրավիճակից: Այդ գումարներն արդյունավետ տնօրինելու նպատակով նա իր մտերիմներին աստիճանաբար ներգրավում է տարբեր բիզնեսներում եւ առաջնորդվելով ՙսկզբում քո ծառը ջրիր, հետո` ուրիշինը՚ սկզբունքով` առաջին ներդրումը կատարել է որդու` Դավիթ Տեր-Պետրոսյանի բիզնեսում: Վարդանանց 5ա հասցեում Դ. Տեր-Պետրոսյանին պատկանող տարածքում մոտ մեկ ամիս առաջ բացվել է ՙImpresso՚ սրճարանը, որտեղ կոնգրեսականների մի մասը չի հաճախում, քանի որ այն բավական թանկարժեք սրճարան է եւ դասվում է էլիտարների շարքին: Փոխարենը` այցելուների թվում են ՀԱԿԿ վերնախավի մի քանի ներկայացուցիչներ, ինչպես նաեւ բազմաթիվ ՙայլընտրանքային՚ հաճախորդներ: Իսկ Դավիթ Տեր-Պետրոսյանը, ով նախկինում ակտիվորեն մասնակցում էր տարբեր քաղաքական ակցիաների եւ հաճախում ՀԱԿԿ գրասենյակ, նոր բիզնեսի ձեռնարկումից հետո կտրուկ դադարել է հետաքրքրվել քաղաքականությամբ, առավելեւս` ՀԱԿԿ-ով: Այժմ նա փորձում է հարմարվել գործարարի իր նոր կերպարին, օգտակար կապեր ստեղծել բիզնես շրջանակներում եւ կուտակել սեփական կապիտալ` բիզնեսն ընդլայնելու հեռանկարով:
Հավանաբար Լ. Տեր-Պետրոսյանը կատարել է հերթական քաղաքագիտական վերլուծությունը եւ վերջապես ընդունել, որ ՀԱԿԿ-ն դադարել է քաղաքական դաշտում լուրջ դերակատարում ունենալուց եւ վերածվել է բացառապես ԲՀԿ-ի կցորդի, ուստի այժմ փորձում է ստեղծված իրավիճակից քաղել առավել հնարավորը: Իր մտերիմների մի մասին նա կամաց-կամաց տեղավորում է բիզնեսի ոլորտում, իսկ քաղաքական թիմակիցներից ոմանց էլ պատրաստվում է 2017թ. խորհրդարանական ընտրությունների ժամանակ տեղավորել ԲՀԿ համամասնական ցուցակում, որպեսզի նրանք եւս 5 տարի կարողանան օգտվել պատգամավորական մանդատի շնորհած հնարավորություններից: Լ. Տեր-Պետրոսյանն այս որոշմանն է հանգել այն պարզ պատճառով, որ լինելով պրագմատիկ քաղաքական գործիչ` հասկացել է, որ 2017թ. ՀԱԿԿ-ն որեւէ պարագայում չի կարող հաղթահարել 5%-անոց շեմը, իսկ որեւէ քաղաքական ուժի, հատկապես ԲՀԿ-ի հետ դաշինք կազմելու մասին մտածելն իսկ ավելորդ է: Առավելագույնը, որ նա կարող է պոկել ԲՀԿ-ից, ԲՀԿ համամասնական ցուցակի անցողիկ տեղերում իր մի քանի մերձավորներին տեղավորելն է:
Նման դեպքերի համար են ասում` ինչ էիք, ինչ դարձաք...

ՍԱՐԳԻՍ ԲԱԼԱՅԱՆ