Թույլ չտալ որոշ պատգամավորների օգտագործել ԱԺ ամբիոնը իրենց նեղ կուսակցական ճղճիմ շահերը պաշտպանելու համար

Թույլ չտալ որոշ պատգամավորների օգտագործել ԱԺ ամբիոնը իրենց նեղ

կուսակցական ճղճիմ շահերը պաշտպանելու համար

Ագրարային համալսարանի կոլեկտիվը դիմել է ԱԺ պատգամավորներին:  Դիմումում ասված է.

Դիմում ենք Ձեզ` հայցելով Ձեր անաչառ գնահատականը ՙՕրինաց երկիր՚ կուսակցության անդամ պատգամավորների պահվածքի վերաբերյալ:

Արդեն ծանոթ լինելով նրանց աշխատաոճին և իրողությունը խեղաթյուրելու հատկությանը՝ուզում ենք հակիրճ Ձեզ ներկայացնել վերջին մի քանի ամիսներին հասարակական հնչեղություն ստացած Ագրարային համալսարան-ՕԵԿ ՙտարածքային՚ վեճին:

2006թ.ՕԵԿ-ը այդ տարածքում իրականացրել է ապօրինի շինարարություն, որը ճանաչվել է պետական սեփականություն և հանձնվել ագրարային համալսարանին:Գյուղատնտեսական ինստիտուտին համալսարանի ներկայիս զբաղեցրած տարածքը դեռևս 1933թ. հատկացվել է Աղասի Խանջյանի հրամանով՝ և բոլոր վերակազմավորումների ժամանակ այն անհատույց և անժամկետ ամրակցված է եղել համալսարանին:

Այդ կապակցությամբ համալսարանը դիմեց դատարան, որը հաշվի առնելով բերված փաստերը՝ կայացրեց  որոշում, որի համաձայն պետք է դադարացվեին բոլոր շինարարական աշխատանքները, բացի իրենց կողմից ապամոնտաժված տանիքի վերականգնումից, սակայն ՕԵ կուսակցությունը շարունակում է շինարարական աշխատանքները:

Քրեական գործ հարուցելը մերժվել է, քանի որ համալսարանականների կողմից ամեն ինչ կատարվել է օրենքի սահմաններում:

2014թ. մայիսի 23-ին ՙՕրինաց երկիր՚ կուսակցությունն անսպասելիորեն սկսեց ապամոնտաժել համալսարանի կողմից կառուցված պետական սեփականություն հանդիսացող ավտոտեխսպասարկման կետի տանիքը:Միջադեպի կապակցությամբ ԱԺ պատգամավորներ Հեղինե Բիշարյանը, Հովհաննես Մարգարյանը և Մհեր Շահգելդյանը դիմումներ են ներկայացրել ՀՀ ոստիկանության պետին և գլխավոր դատախազին` որակելով համալսարանի աշխատակիցների՝ կառավարության որոշմամբ իրենց հատկացված տարածքի ապօրինի ցանկապատումը վերացնելը որպես խուլիգանություն:

Բացի վիճահարույց տարածքից, ՕԵԿ-ը օգտագործում է ևս 190քմ տարածք, որի ցանկապատը համալսարանի աշխատակիցները տարածքի բարեկարգման ժամանակ քանդել են:

Հարգելի պատգամավորներ, մենք չէինք զբաղեցնի Ձեզ այդ կենցաղային հարցերով, եթե  ապօրինությունները չկատարվեին Ազգային ժողովի պատգամավորների անմիջական մասնակցությամբ ու ղեկավարության ներքո, այն էլ բարձրագույն ուսումնական հաստատության տարածքում` բազմահազար ուսանողների ներկայությամբ:

Խնդրում ենք Ձեզ ՙմիշտ օրենքի շրջանակներում գործող՚  կուսակցության հարգարժան անդամներին հարցնել՝ ինչու է Երևանի քաղաքապետարանը երկու անգամ տուգանել ՙօրինապաշտներին՚ ապօրինի շինարարության համար:

Ինչպես կարող են բացատրել Ձեզ, հասարակությանը և մանավանդ ուսանողներին, թե ինչպես երկու ամսվա ընթացքում կառուցվեց երկու հարկանի տձև շենք` չունենալով շինարարական թույլտվություն:

Հարգելի պատգամավորներ, կոչ ենք անում Ձեզ կանգնել կրթության և գիտության մշակներիս կողքին, պաշտպանել պետության ունեցվածքը, թույլ չտալ որոշ պատգամավորների օգտագործել ԱԺ ամբիոնը իրենց նեղ կուսակցական ճղճիմ շահերը պաշտպանելու համար: