ՀԱՅ ԸՄԲԻՇՆԵՐԻ ԱՆՍՊԱՍԵԼԻ ՍԱՅԹԱՔՈՒՄԸ

ՀԱՅ ԸՄԲԻՇՆԵՐԻ ԱՆՍՊԱՍԵԼԻ ՍԱՅԹԱՔՈՒՄԸ

Ուզբեկստանի մայրաքաղաք Տաշքենդում ավարտվեց ազատ ոճի ըմբշամարտի աշխարհի առաջնությունը: Այս մրցաշարում Հայաստանը` Արայիկ Բաղդադյանի ղեկավարությամբ ներկայացրին 5 ըմբիշներª 2013 թ. աշխարհի ու Եվրոպայի չեմպիոն Դավիթ Սաֆարյանը (65 կգ), Գարիկ Բարսեղյանը (57 կգ), Վոլոդյա Ֆրանգուլյանը (61 կգ), Գրիգոր Գրիգորյանը (70 կգ) եւ Մուսա Մուրթազալիեւը (86 կգ):
Հայ ըմբիշները անսպասելիորեն չկարողացան սպասված մրցակցություն ցույց տալ եւ մնացին առանց մեդալների: Մրցումային առաջին օրը պայքարի մեջ մտան Եվրոպայի առաջնության բրոնզե մեդալակիր Գարիկ Բարսեղյանը, Եվրոպայի փոխչեմպիոն Գրիգոր Գրիգորյանը եւ Մուսա Մուրթազալիեւը: Բարսեղյանը մեկնարկային գոտեմարտում պարտվեց Ուկրաինան ներկայացնող Միկոլա Այվազյանին, Մուրթազալիեւը 1/16 եզրափակիչում ճանապարհը զիջեց բուլղարացի Պետրով Գանեւին, իսկ Գրիգոր Գրիգորյանը չինացի Յունտեյ Գուին հաղթելուց հետո 1/8 եզրափակիչում պարտվեց ամերիկացի Թոմաս Մարաբլեին: Մրցումների երկրորդ օրը առաջին գոտեմարտում Վոլոդյա Ֆրանգուլյանը 0:5 հաշվով պարտվեց ռուսաստանցի Ալեքսանդր Բոգոմոեւին: 2013թ. աշխարհի եւ Եվրոպայի չեմպիոն Դավիթ Սաֆարյանը չկարողացավ պաշտպանել տիտղոսը. առաջին գոտեմարտում նա հաղթեց կանադացի Հայսլան Վերանեսին, սակայն 1/8 եզրափակիչում 1:12 հաշվով պարտվեց Մոնղոլիայի ներկայացուցիչ Մանդախնարան Գանզորիգին: Դավիթ Սաֆարյանից թերեւս հույսերը շատ էին, վերջինս վնասվածքից ապաքինվելուց հետո լրջորեն նախապատրաստվում էր աշխարհի առաջնությանը: Ինչպես երեւում է, հայ ըմբիշին դեռ լավագույն մարզավիճակին հասնել չի հաջողվել:
Դավիթ Սաֆարյանն ու Վոլոդյա Ֆրանգուլյանը հնարավորություն չստացան մասնակցելու սփոփիչ գոտեմարտերին, քանի որ հայ ըմբիշներին հաղթած մրցակիցները չհասան եզրափակիչ: Արդյունքում ազատ ոճի Հայաստանի հավաքականը մնաց առանց մեդալների:
Ինչեւէ, առջեւում դեռ հունահռոմեական ոճի ըմբիշների պայքարն է, Հայաստանի հունահռոմեական ոճի ըմբշամարտի հավաքականը մրցաշարին մասնակցելու է հետեւյալ կազմով` Ռոման Ամոյան (59 կգ), Միհրան Հարությունյան (66 կգ), Վարշամ Բորանյան (71 կգ), Արսեն Ջուլֆալակյան (75 կգ), Հրաչ Հովհաննիսյան (80 կգ), Արթուր Շահինյան (85 կգ), Արթուր Ալեքսանյան (96 կգ), Վաչիկ Եղիազարյան (130 կգ):

ՔՐԻՍՏԻՆԵ ՊԵՏՐՈՍՅԱՆ