ՙՙՔՐԵԱԿԱՆ ՀԵՂԻՆԱԿՈՒԹՅԱՆ ԵՂԲՈՐ ՍՊԱՆՈՒԹՅԱՆ ԳՈՐԾԸ ԿԿԱՐՃՎԻ

ՔՐԵԱԿԱՆ ՀԵՂԻՆԱԿՈՒԹՅԱՆ ԵՂԲՈՐ ՍՊԱՆՈՒԹՅԱՆ ԳՈՐԾԸ ԿԿԱՐՃՎԻ

Քրեական հեղինակություն Կայարանցի Թեւոսիկի եղբոր` Արթուր Սաֆարյանի սպանության գործը շատ հնարավոր է` կարճվի: Նման կարծիք մեզ հետ զրույցում  արտահայտեց երկու սպանությունների մեջ մեղադրվող Իսրայել Սարգսյանի պաշտպան ԱՐՍԵՆ ՍԱՐԴԱՐՅԱՆԸ: Փաստաբանի խոսքով.
-Ես հավատում եմ ՀՀ-ի իրավական համակարգին, եւ այդ իսկ պատճառով չեմ բացառում, որ սույն քրեական գործը շատ հնարավոր է` կարճվի: Համենայնդեպս, ես ավելի հակված եմ այդ մտքին, որ հենց այդ ճանապարհով Իսրայելը ազատ կարձակվի: Դա ավելի խելամիտ է, քան նրա մեղադրանքը պահելն ու խափանման միջոցը փոխելը,  քանի որ Իսրայելի մասով, ում մեղադրում են սպանությունների մեջ, նախաքննական մարմինը մեղադրանքը ապացուցող փաստեր չունի: Մինչ օրս նախաքննությունն իրականացնող մարմինը չունի հստակ ապացույց, որը փաստում է Իսրայել Սարգսյանին առաջադրված մեղադրանքի իսկությունը: Ընդհակառակը` կան հստակ ապացույցներ, որոնք լիովին բացառում են Իսրայել Սարգսյանի մասնակցությունը սպանության գործին: Առկա ապացույցները, որոնք մեր պաշտպանական կողմի համար բաց են, թույլ են տալիս ասել, որ Իսրայել Սարգսյանը կապ չունի այդ երկու սպանությունների հետ, որում իրեն մեղադրում են: Ինչ վերաբերում է նախաքննական մարմնի ընդունած` Իսրայել Սարգսյանին կալանավորելու որոշմանը, մենք արդեն իսկ պատրաստվում ենք Եվրադատարանում բողոքարկել այն: Հիմա սպասում ենք վճռաբեկ դատարանի որոշմանը, որից դրական ակնկալիքներ չունենք, հետո կալանքի որոշման դեմ բողոքը կուղարկենք ՄԻԵԴ:


ԼԵԴԻ ՀԱԿՈԲԻ ԵՂԲՈՐՈՐԴԻՆ ՙՈՒՆԻ  ԼՈՒՐՋ ԱՌՈՂՋԱԿԱՆ ԽՆԴԻՐՆԵՐ՚

Զատիկյանների որդու` Սեդրակ Զատիկյանի սպանության գործով որպես պատվիրատու տասնհինգ տարով ազատազրկված Ստեփան Հակոբյանի առողջական վիճակը բավարար է, բայց` ոչ կայուն: Այս մասին մեզ հետ զրույցում ասաց ՀՀ ԱՆ ՔԿՀ լրատվական վարչության պետ ԳՈՌ ՂԼԵՉՅԱՆԸ:
-Ստեփան Հակոբյանը արդեն մի քանի ամիս է, ինչ գտնվում է ՙԴատապարտյալների հիվանդանոցում՚: Նրա առողջական վիճակը նորմալ չէ, ունի մի քանի առողջական լուրջ խնդիրներ:
Հարցին` հնարավոր է, որ առողջական վիճակից ելնելով` ազատվի պատժի կրումից, պարոն Ղլեչյանը պատասխանեց.
- Համենայնդեպս, այս պահի դրությամբ նրա մոտ առաջացած առողջական խնդիրները չեն համընկնում այն հիվանդությունների շարքին, որոնցով կարող է ազատվել պատժի կրումից:

ԻԼՈՆԱ ԱԶԱՐՅԱՆ