Չէ, այսպես չեղավ`

Չէ, այսպես չեղավ` օլիգարխացված այս աշխարհում ունեի զարմանալու մենաշնորհը, այն էլ ՀՀԿ երիտասարդական կառույցի ղեկավար ԿԱՐԵՆ ԱՎԱԳՅԱՆԸ ձեռքիցս խլեց. ՙԶարմանալի է, որ այս ամենից հետո, որոշ հայ քաղաքական գործիչներ ու վայ-փորձագետներ քննարկում են, թե ինչու Հայաստանը ստորագրեց ՆԱՏՕ-ի կողմից ընդունված փաստաթուղթը: Առավել ամոթալին այն է, որ նման քննարկումներով զբաղվում են մարդիկ, ում կենսափորձը պետք է որ բավարար լիներ կատարյալ անգրագիտությունն իրականությունից տարբերելու համար: Վերջիններս, չգիտենք` գիտակցաբար, թե` ոչ, կերել են ադրբեջանական քարոզչության խայծը, որը միայն ստի ու կեղծիքի վրա է կառուցված: Այդ նույն փորձագետներն ու մասնագետները պետք է իմանային, որ Հայաստանը ՆԱՏՕ-ի անդամ չէ, ուստի չի կարող ստորագրել ՆԱՏՕ-ի գագաթաժողովի կողմից ընդունված փաստաթղթի տակ՚: Բայց եթե լուրջ` ինչո±ւ է պատգամավորը զարմանում, որ ՙկենսափորձ ունեցողները՚ հավատում ու քննարկում են կատարյալ անգրագիտությունը եւ ադրբեջանական ստերը: Ախր, նրանց ձեռնտու է դրան հավատալ ու դրա վրա կառուցել կատարյալ մարազմի հասնող քարոզչական ՙվերլուծությունները՚, հենց դրանով են վաստակում իրենց հացը:  
Եզրափակելով ինտերնետային թեման` չենք կարող չհիշատակել Երեւանի նախկին քաղաքապետ ՎԱՀԱԳՆ ԽԱՉԱՏՐՅԱՆԻ զարմանալի տրտունջը. ՙՄենք մի խնդիր ունենք` իշխանությունը երբեք մեզ չի ասում` ինչ է կատարվում: Թող գաղտնիք չասեն, բայց գոնե տեղեկություն պետք է տան: Մեր իշխանությունը սովորություն ունի խաբել մեզ՚: Բայց պետք է հիասթափեցնենք բոլորին սեփական արշինով չափող Խաչատրյանին` համացանցի դարում ամենահեշտ հայթայթվողը հենց տեղեկությունն է: Ինչ վերաբերում է խաբելուն, ապա ինչքան էլ քըխ լինի նախկին վարչապետ Տիգրան Սարգսյանը, սակայն նա սեւեռուն ձեւով մի բան արել է` ապահովել է, որպեսզի իշխանության ամբողջ գործունեությունը շատ օպերատիվորեն զետեղվի համացանցում: Այնպես որ, խաբելու ամենամեծ ցանկության դեպքում իսկ, դա հիմա չի ստացվի, մնում է միայն տեղեկատվություն փնտրողը չալարի ու փնտրի: Ինչպես կասեր ժողովուրդը` ով ալարի, ոչ դալարի:  
Իսկ պետական մեղադրող ԳԵՎՈՐԳ ԳԵՎՈՐԳՅԱՆԸ վերջապես հրապարակեց իր ճառը եւ անցյալ տարվա նոյեմբերի 5-ին զանգվածային անկարգություններ կազմակերպած Շանթ Հարությունյանի համար պահանջեց 7 տարվա ազատազրկում: Անշուշտ, Շանթը պետք է պատժվի, միգուցե ավելի մեծ ժամկետն էլ արդար լինի, բայց այդ գործում զարմանալի ու տարօրինակ բաներ շատ կան: Այսպես, այդպես էլ դատարանի դահլիճում չհայտնվեցին ոստիկանների դեմ ռեալ բռնություն գործադրած ՀԱԿ երիտասարդ լկտի ակտիվիստները (համացանցում լիքն են այդ անկարգությունների տեսանյութերը, եւ տեսնողը կտեսնի): Ինչո±ւ այդպես եղավ` որովհետեւ հենց առաջին իսկ օրը Լյովիկ Զուրաբյանը ու Նիկոլ Փաշինյանը եկան ու ոստիկանությունից տարան իրենց խուլիգաններին, եւ զարմանալիորեն ստացվեց, որ ՀԱԿ-ի ակտիվիստը արտոնյալ խուլիգան է, եւ կարող է անպատիժ շարունակել լկտիությունները ոստիկանության դեմ: Չգիտեմ ինչեր են գրված քննիչների ու դատախազի թղթերում, սակայն զարմանալի էր տեսնել, որ համենայնդեպս, ըստ տեսանյութերի, ռեալ ոչինչ չարած Ավետիս Ավետիսյանի համար դատախազը պահանջեց 6,5 տարի, Տիգրան Պետրոսյանի եւ իր մարմնով ընկերոջը ոստիկանի հարվածներից ծածկած Սեւակ Մնացականյանի համար` 4-ական տարի ազատազրկում... Կրկնակի չափանիշ:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ