ՔՈՉԱՐՅԱՆՆ ԱՆԳԱՄ ԲՀԿ-Ի ՄՈՏ ՎԵՐԱԴԱՌՆԱԼՈՒ ՀՆԱՐԱՎՈՐՈՒԹՅՈՒՆ ԻՐ ՀԱՄԱՐ ՉԻ ԹՈՂԵԼ. ԶԱՐՈՒՀԻ ՓՈՍՏԱՆՋՅԱՆ

ՔՈՉԱՐՅԱՆՆ ԱՆԳԱՄ ԲՀԿ-Ի ՄՈՏ ՎԵՐԱԴԱՌՆԱԼՈՒ ՀՆԱՐԱՎՈՐՈՒԹՅՈՒՆ  ԻՐ ՀԱՄԱՐ ՉԻ

ԹՈՂԵԼ. ԶԱՐՈՒՀԻ ՓՈՍՏԱՆՋՅԱՆ

Երեկ ԱԺ ՀՅԴ խմբակցությունում ավարտվեց ոչ իշխանական քառյակի քննարկումը: Սակայն ո՛չ հանրահավաքների, ո՛չ  սահմանադրական բարեփոխումների շուրջ  համաձայնության գալ հնարավոր չեղավ: Սակայն միայն երեկվա  քննարկումը չէ, որ ցույց տվեց՝ քառյակի ներսում տարաձայնություններ կան:  Տարաձայնությունները ի հայտ եկան այն պահից, երբ  ՀՅԴ-ն ու ԲՀԿ-ն  կուտակայինի հարցով  որոշեցին  դիմել Սահմանադրական դատարան:  «Իրավունքը» «Ժառանգություն» խմբակցության պատգամավոր Զարուհի Փոստանջյանին հարց ուղղեց՝ արդյոք այս տարաձայնությունները  կհանգեցնեն  քառյակի տրոհմանը: «Քառյակը փոքր համագործակցություն է ԱԺ-ում, որը դեռ չի վերաճել  համագործակցության այնպիսի մակարդակի, որպեսզի սպասարկի հանրության ազգային շահը և իշխանափոխություն իրականացնի»,- պատասխանեց  պատգամավորը:

- Հավանական համարո՞ւմ եք «Քառյակ»-Քոչարյան համագործակցությունը («Ժողովրդավարական հայրենիք» կուսակցության  ղեկավար Պետրոսյանը Մակեյանն «Իրավունքի» հետ զրույցում  չէր բացառել, որ հնարավոր  է Քոչարյան-քառյակ գործողությունների համատեղում-խմբ.):

-Կարծում եմ՝ոչ:

- Ինչո՞ւ

-Քոչարյանը ճանապարհ չունի ետ վերադառնալու քաղաքական այսպիսի գործընթացների  մեջ…

-Եթե անգամ Քառյակի ուժերից մեկը՝ ԲՀԿ-ը, Քոչարյանի արբանյակ կուսակցությունն է…

-Արբանյակ դուք եք ասում: Իհարկե, Քոչարյանը դերակատարություն ունեցել է այդ կուսակցության ստեղծման գործում, որն ապացուցված փաստ է,  բայց անգամ այդտեղ Քոչարյանը  վերադառնալու հնարավորություն  իր համար չի թողել: ԲՀԿ-ում ընդգրկված մարդիկ  ներկայացնում են հասարակությունը: Իսկ վերջինս չի մոռացել Ռ.Քոչարյանի  կատարած ոճիրները:

-Այդ դեպքում  նախկին նախագահն իր հարցազրույցներով ի՞նչ մեսիջ է հղում հանրությանը, եթե ինչպես Դուք եք ասում, նա վերադառնալու հնարավորություն չունի:

-Մարդը ցանկություն ունի լինել ակտիվ քաղաքականության մեջ: Այդ ցանկությունը պետք է մի  ձեւով բավարարի: Դրա համար էլ հարցազրույցներ է տալիս:

Սոնա Դավթյան