ԹԵԺ ԻՐԱՎԻՃԱԿՆԵՐ ՄԱՆԿԱԿԱՆ ՙԵՎՐԱՏԵՍԻԼՈՒՄ՚

ԹԵԺ ԻՐԱՎԻՃԱԿՆԵՐ ՄԱՆԿԱԿԱՆ ՙԵՎՐԱՏԵՍԻԼՈՒՄ՚

Սեպտեմբերի 14-ին Հանրային հեռուստաընկերության ուղիղ եթերում պարզ կլինի, թե նոյեմբերի 15-ին Մալթայում ով կներկայացնի Հայաստանը Մանկական ՙԵվրատեսիլ- 2014՚ երգի միջազգային հեղինակավոր մրցույթում: Մանկական ՙԵվրատեսիլ-2014՚ երգի մրցույթի հայաստանյան ընտրական փուլում կպայքարեն տասը մասնակիցներ: Այս տարի մրցույթի քվեարկության կանոններում փոփոխություններ չեն սպասվում. հաղթողը կընտրվի sms քվեարկությամբ եւ պրոֆեսիոնալ ժյուրիի ընտրության արդյունքում` 50/50 հարաբերակցությամբ:
Այս տարի Մանկական ՙԵվրատեսիլ- 2014՚ երգի միջազգային հեղինակավոր մրցույթին մասնակցության համար Մալթա կմեկնեն Հայաստանի, Վրաստանի, Բելառուսի, Բուլղարիայի, Կիպրոսի, Իտալիայի, Մալթայի, Մոնտենեգրոյի, Ռուսաստանի, Սերբիայի, Շվեդիայի, Սլովենիայի, Նիդերլանդների եւ Ուկրաինայի ներկայացուցիչները: Սակայն, կարծես թե, այս տարի Մանկական ՙԵվրատեսիլի՚ նախընտրական փուլը թեժ է ընթանալու, այնքան թեժ, որ նույնիսկ երիտասարդ կատարողների ՙԵվրատեսիլի՚ հայաստանյան փուլում նման թեժ իրավիճակներ չի եղել: Չնայած` մրցակիցները փոքրիկներ են, սակայն, արդեն սկսվել է պայքար, որի կիզակետում երգիչ Կարեն Օհանյանն ու Միկան են, իրենց ՙShine out՚ երգով: Բարության մասին դրական երգով ու տեսահոլովակով արդեն հայտնի է, որ Կարենն ու Միկան պատրաստվում են մասնակցել Մանկական ՙԵվրատեսիլ-2014՚ երգի միջազգային մրցույթի հայաստանյան նախընտրական փուլին:
Ի դեպ, երգն ունի երկու տարբերակ` տեսահոլովակը նկարահանվել է անգլերեն, իսկ Մանկական ՙԵվրատեսիլի՚ նախընտրական փուլում` անգլերեն կլինի միայն ռեփի հատվածը, երգն ամբողջությամբ կհնչի հայերեն տարբերակով, քանի որ ըստ մրցույթի կանոնների` թույլատրվում է, որ երգը 30 տոկոսով լինի անգլերեն: Երգի տեսահոլովակի պրեմիերայից հետո համացանցում սկսվեց մեկնաբանություններով հակահարվածը, բայց այս անգամ մեկնաբանությունների հեղինակները բացելով իրենց գարշելի բերանները` մի պահ գուցե մոռացել էին, որ երգողները ոչ թե շոուբիզնեսյան կայացած աստղիկներ են` որոնք արդեն սովոր են նման վիրավորական մեկնաբանությունների, այլ սկսնակ փոքրիկներ, որոնց համեմատել էին համասեռամոլների ու կենդանական աշխարհի ամենագեր ներկայացուցչի հետ: Ինչեւէ, ՙԻրավունքն՚ այդ թեմայի շուրջ զրուցեց Կարեն Օհանյանի հայրիկի` պրոդյուսեր ԱՐՄԵՆ ՕՀԱՆՅԱՆԻ հետ, ով վրդովված` այդ մեկնաբանությունների հեղինակներին խորհուրդ տվեց մի պահ կանգ առնեն ու պատկերացնեն, որ նրանց փոխարեն` իրենց եղբայրն է կամ որդին. ՙԻնչպե±ս կարող է մարդ փոքր երեխայի հասցեին նման արտահայտություններ անել ու վիրավորել: Անկախ ամեն ինչից, թեկուզ եւ երգը կամ տեսահոլովակը վատն էր, նրանք պիտի միայն ողջունեին հենց նրա համար, որ երեխաները զբաղվածություն ունեն, ինչ-որ գործ են անում՚,- ասաց պրոդյուսեր հայրիկն ու հավելեց, որ մի կողմից` դա իրենց համար PR է եղել. ՙՑանկանում էին մեզ սեւ PR անել, բայց ստացվեց ճիշտ հակառակը, որովհետեւ եթե նրանք 50 հոգի էին, հիմա արդեն 200 հոգի հակահարված սկսեցին նրանց դեմ, ու բոլորը Կարեն Օհանյանին ու Միկային սկսեցին գովել՚:
ՙԻրավունքի՚ այն հետաքրքրությանը, թե հիմա ինչ հոգեկան վիճակում են երեխաները եւ ինչ տրամադրվածությամբ են մասնակցելու հայաստանյան նախընտրական փուլին, Ա. Օհանյանը տեղեկացրեց. ՙԲնականաբար, երեխաները սկզբում մի քիչ վատ ընդունեցին, վիրավորվեցին, թե ինչու են նման բաներ գրել, բայց հետո հասկացան, որ ավելի շատ նախանձն է նրանց մեջ խոսում: Ես իրենց բացատրեցի, որ դուք ավելի լավն եք դրա համար էլ նման բաներ են անում: Հիմա  նրանց մոտ անցավ այդ խուճապը, եւ ասեմ, որ հաստատ ավելի լավ վերջաբան կունենա ամեն ինչ, քան սկզբում կարծում էինք՚:

ԼԻԼԻԹ ԵՂԻԱԶԱՐՅԱՆ