Արցախյան հարցի շուրջ տեղի ունեցած վերջին եռակողմ հանդիպմանը...

Արցախյան հարցի շուրջ տեղի ունեցած վերջին եռակողմ հանդիպմանը Ադրբեջանի նախագահ ԻԼՀԱՄ ԱԼԻԵՎԸ հայտնվել էր ծիծաղելի իրավիճակում, հանդիպման ընթացքում նա ՙանտեսվեց՚ Ջոն Քերիի կողմից: Վերջինս Հայաստանի նախագահ  Սերժ Սարգսյանին եւ ՀՀ արտգործնախարարին ողջունելուց հետո, ՙմոռացավ՚ Ալիեւին: Ծիծաղելի իրավիճակից դուրս գալու համար Ալիեւն անձամբ է մոտենում եւ բարեւում Ջ. Քերիին: Ադրբեջանագետ Սարգիս Ասատրյանի խոսքով` դժվար է ասել, թե Քերիի այս քայլը դիտավորություն էր, թե` պատահականություն: Դեպքի վերաբերյալ նա ոչ մի տեսակետ չբացառեց. ՙՀետաքրքիր է, բայց ադրբեջանական ԶԼՄ-ը այս դեպքին ընդհանրապես չանդրադարձան: Քերիի այդ արարքի ամբողջ ճշմարտության բացահայտումը պետք է թողնել ժամանակի վրա, որպեսզի հասկանանք, թե այդ քայլը կանխամտածված էր, թե ոչ՚,- ասաց թուրքագետը: Հիշեցնենք, որ Քերին արդարացել էր, թե Ալիեւին Սարգսյանի թիկնապահի տեղ էր դրել: Չգիտենք` այդ զարմանալի դրվագը կանխամտածված էր, թե ոչ, բայց մի բան հաստատ է` ադրբեջանական պետության լիկվիդացիայից հետո Ալիեւին ոչ միայն թիկնապահություն, այլեւ դռնապանություն չի կարելի վստահել: Երբ հայրը` արձան դարձած Հեյդարը ողջ էր, նա հաջողացնում էր խաղատներում պետբյուջեի զգալի մասը տանուլ տալ, այնպես որ, եթե դռնապան լինի, հաստատ դռան բռնակը տանուլ կտա: Խասյաթ է, չէ:
Երեկ մեկնարկեց ԱԺ 5-րդ գումարման 6-րդ նստաշրջանը: Գրանցվել են 122 պատգամավոր, ԱԺ նախագահը քվորում ապահովելու կապակցությամբ նիստը հայտարարեց բացված: Սակայն մինչ այդ, աղմուկն այնքան շատ էր, որ  ԳԱԼՈՒՍՏ ՍԱՀԱԿՅԱՆԸ դիմելով պատգամավորներին` ասաց. ՙԱղմուկը շատ է, երեւում է` լավ եք հանգստացել՚: Վարման կարգի վերաբերյալ հարց էր ուզում ուղղել ԱԺ ՙԺառանգություն՚ խմբակցության պատգամավոր Զարուհի Փոստանջյանը, սակայն պարզվեց, որ իր պատգամավորական կոճակը չի աշխատում: Այս մասին ԱԺ փոխնախագահ ԷԴՈՒԱՐԴ ՇԱՐՄԱԶԱՆՈՎԸ դիմեց աշխատակիցներին. ՙԱյնպես արեք, որ Զարուհի Փոստանջյանի բոլոր սարքերը աշխատեն՚: ԱԺ նախագահն էլ հավելեց. ՙՄիգուցե, Զարուհի Փոստանջյանի քա±րտն է վառվել՚: Մնացյալ քվեարկությունների ժամանակ շարունակեց տիկին Փոստանջյանի ՙկոճակը՚ անսարք մնալ: Այնպես որ, միգուցե սա պատիժն է այն բանի, որ նախորդ նստաշրջանի ժամանակ Զ. Փոստանջյանը աչքի ընկավ մի շարք պատգամավորների քվեարկության քարտերը ՙգողանալով՚: Դե լավ է, գոնե այդ զարմանալի իրադարձության ժամանակ կոճակից ծուխ չէր բարձրացել, չէ որ ծուխը գողին է սիրում:
Պատգամավորները նոր ուժերով, լիցքերով  պատրաստ են զբաղվել օրենսդիր  գործունեությամբ: Սակայն ՀՀԿ պատգամավոր ՄՀԵՐ ՍԵԴՐԱԿՅԱՆԸ բավական անտրամադիր էր:  Լրագրողների  հարցերից ոչ մեկին չպատասխանեց, միայն ասաց, որ խռովել է լրագրողներից: ՙԻնչո±ւ՚,- հարցրին լրատվամիջոցների ներկայացուցիչները: ՙՍտից բաներ եք  գրում՚,- ասաց պատգամավորն ու ներս մտավ դահլիճ: Հիշեցնենք, որ մամուլը երկար ժամանակ գրում էր Էրեբունիում` ՙլավ տղերքի՚ շրջանում, բունտ է հասունանում տարածքի ՙնայողներից՚ ԱԺ ՀՀԿ-ական պատգամավոր Մհեր Սեդրակյանի դեմ ու ամեն կերպ փորձում են Սեդրակյանին ՙգծերից քցել՚: Պատգամավորը, սակայն, հերքել էր այդ  լուրերը` ասելով, որ իրենց ոչ ոք գծերից չի կարող գցել: Հերքել է, լավ է արել, բայց նեղանալս ո±րն է, առավել եւս` պատգամավորի պարագայում: Զարմանալի է, մարդը հազիվ սովորել էր շփվել լրագրողների հետ, ու հանկարծ այդքան կարճ ժամանակ անց շփումը վերջացավ նեղանալով:
Մեզ անզարմանք չթողեց եւ ՙԺառանգության՚ հավերժական պիոներ ՍՏՅՈՊԻԿ ՍԱՖԱՐՅԱՆԸ` հայտարարելով. ՙԱպշած եմ, որ ՀՀ ԱԳ նախարար Էդվարդ Նալբանդյանը դժգոհություն է հայտնել ՆԱՏՕ-ի գագաթաժողովի հռչակագրից: Հիշեցնեմ, որ ՆԱՏՕ-ն 30-րդ կետում գրել էր, որ ճանաչում է Արեւելյան գործընկերության անդամ պետությունների` Մոլդովայի, Հայաստանի, Վրաստանի ու Ադրբեջանի անկախությունը, ինքնիշխանությունը եւ տարածքային ամբողջականությունը` ղրիմանման ոտնձգություններից ու իրենց ինքնուրույն արտաքին/անվտանգության քաղաքականությունը վարելիս: Այսինքն, ասել է, որ եթե Ռուսաստանը այդ պետությունների հետ վարվի այնպես, ինչպես Ուկրաինայի հետ վարվեց, ապա ՆԱՏՕ-ն` որպես քաղաքական դիրքորոշում, բռնելու է ՙճշտի՚ կողմը՚: Դե ինչ, Ստյոպիկի համար երեւի թե ՆԱՏՕ-ն տեր Աստծու տեղ է, իսկ ՆԱՏՕ-ի հռչակագրերը` Ավետարանի: Ինչեւէ, զարմանալով հանդերձ, առաջարկում ենք Ս. Սաֆարյանին պատվիրել սրբապատկեր` ՆԱՏՕ-ի խորհրդանիշով եւ դժվարին պահերին դեմը չոքել եւ աղոթել:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ