ԽՈՍԵԼՈՎ ՍԱՀՄԱՆՆԵՐԻ ՄԱՍԻՆ

ԽՈՍԵԼՈՎ ՍԱՀՄԱՆՆԵՐԻ ՄԱՍԻՆ

«Խոսելով սահմանների մասին» խորագիրը կրող թատերախաղի միջազգային մրցույթը թատերական-գրական նախագիծ է, որի հեղինակն է Նյուրնբերգի պետական թատրոնը (Գերմանիայի Դաշնային Հանրապետություն): Այս տարվա մրցույթը մտքերի փոխանակման, երկխոսության ու գաղափարների խաչման հրա­վեր է` ուղղված բոլոր հայ գրողներին: Մրցույթին կմասնակցեն գրական և լեզվաբանական բարձր մակարդակի վրա գտնվող թատերախաղեր, որոնք կներկայացնեն 2014թ. Հայաստանի ստեղծագործական և դերասանական կյանքի ընդհանուր պատկերը: Այդ մասին այսօր լրագրողների հետ հանդիպման ժամանակ ասացին մրցույթի կազմակերպիչները:

Ծրագրի նախաձեռնող ՔՐԻՍՏԻԱՆ ՊԱՊԿԵՆԻ խոսքերով`մրցույթի մասնակցության հայտերն ընդունվում են մինչև 2015թ. մարտի 1-ը: «1-ին տեղը զբաղեցրած թատերախաղի համար կազմակերպիչների կողմից սահմանվում է 3500 եվրո պարգևավճար, իսկ ՀՀ մշակույթի նախարարությունը երկրորդ տեղը գրաված թատերախաղի համար սահմանում է 1500 եվրո պարգևավճար, իսկ երրորդ տեղի համար՝ 1000 եվրո»,- ասաց Ք. Պապկենը:

Պարոն Պապկենը նաև տեղեկացրեց, որ մրցանակային տեղերը զբաղեցրած թատերախաղերի անունները կհրապարակվեն մինչև 2015 թ. ապրիլի վերջը՝ Երևանում կայանալիք մամուլի ասուլիսի ընթացքում:

Ք.Պապկենն ընդգծեց, որ միջազգային մրցութային հանձնաժողովն ունի մասնագիտական համապատասխան որակավորում ունեցող հինգ անդամ, որոնցից երկուսը Հայաստանից են: Թատերախաղի բնօրինակը ներկայացվում է հայերենով, որի հետ պետք է ներկայացվի վերջինիս թարգմանությունը՝ անգլերեն կամ գերմաներեն: Հեղինակներից յուրաքանչյուրը կարող է ներկայացնել միայն մեկ թատերախաղ, որը չպետք է նախկինում բեմադրված կամ հրատարակված լինի:

Թատերախաղը պետք է համահունչ լինի մրցույթի թեմային` «Խոսելով սահմանների մասին. կյանքի հանդեպ վերաբերմունքը քաղաքական փոփոխությունների ժամանա­կաշրջանում», գրված լինի 5 դերասանի համար, պետք է լինի առնվազն 70 րոպե և չպետք է ավարտվի մեկ գործողությամբ:

«ՀայՖեստ» միջազգային թատերական փառատոնի նախագահ ԱՐԹՈՒՐ ՂՈՒԿԱՍՅԱՆԸ`կարևորելով այս նախաձեռնությունն ասաց. «Համոզված եմ, որ այս մրցույթը կլինի մեր փառատոնի հերթական հաջողված նախագծերից մեկը: Ուրախալի է այն, որ նախաձեռնող կողմ է  հանդիսանում Գերմանիան: Ինչպես գիտեք, գերմանական թատրոնն աշխարհում համար առաջինն է համարվում: Եթե այլ երկրի կողմից ստացվեր նման առաջարկ, գուցե, այն մեզ անհետաքրքիր թվար: Չեմ կասկածում, որ հայտեր կլինեն»:

Ա. Ղուկասյանը խոստացավ, որ մրցույթն արդար կանցնի:

Վ. ՄՈՒՐԱԴՅԱՆ