ՔԱՌՅԱԿԸ Ո՛Չ ՍԱՀՄԱՆԱԴՐԱԿԱՆ ԲԱՐԵՓՈԽՈՒՄՆԵՐԻ, Ո՛Չ ՀԱՄԱՏԵՂ ՀԱՆՐԱՀԱՎԱՔ ԱՆԵԼՈՒ ՀԱՐՑՈՒՄ ՀԱՄԱՁԱՅՆՈՒԹՅԱՆ ՉԵԿԱՎ

ՔԱՌՅԱԿԸ Ո՛Չ ՍԱՀՄԱՆԱԴՐԱԿԱՆ ԲԱՐԵՓՈԽՈՒՄՆԵՐԻ, Ո՛Չ ՀԱՄԱՏԵՂ ՀԱՆՐԱՀԱՎԱՔ ԱՆԵԼՈՒ ՀԱՐՑՈՒՄ ՀԱՄԱՁԱՅՆՈՒԹՅԱՆ ՉԵԿԱՎ

ԱԺ ՀՅԴ խմբակցությունում ավարտվեց ոչ իշխանական քառյակի քննարկումը: Վերջիններս ձեւավորեցին իրենց առաջիկա քայլերի օրակարգը, որը ինչպես նախորդները, նույնպես խոստումնալից չէր: Ինչպես նշեց  ԱԺ ՀՅԴ խմբակցության ղեկավար ԱՐՄԵՆ ՌՈՒՍՏԱՄՅԱՆԸ, սահմանադրական բարեփոխումների հարցում որեւէ համաձայնության չեն եկել քառյակը ներկայացնող խմբակցությունները եւ յուրաքանչյուրը կմնա իր տեսակետին: Ավելին այսօր միայն յոթ կետի շուրջ են համակարծիք ոչ իշխանական ներկայացուցիչները: Ինչ վերաբերում է քառյակի խոստացած հանրահավաքին, պարզվում է` այս հարցում էլ վերջիններս դանդաղում են ու միմյանց հետ «լեզու չեն գտնում»: Այս մասին Ա. Ռուստամյանը ասաց. «Հանրահավաքի անցկացման հարցի հետ կապված մեր պայմանավորվածությունները ուժի մեջ է, պարզապես ժամկետների հարցի հետ կապված խնդիր կա»: Ի դեպ, պարտադիր կուտակայինի հարցով, ՀՅԴ-ի ու ԲՀԿ-ի առաջարկին, որ կրկին դիմեն Սահմանադրական դատարան, «Ժառանգությունն» ու ՀԱԿ-ը դժկամությամբ, բայց «օդոլժենի» են արել իրենց գործընկերներին ու համաձայնվել գոնե այդ հարցում լինել միասնական: Ինչ խոսք, քառյակի կետերը նվազում են` նրանց հետ կապված հանրության հույսերին զուգահեռ:

ՀՐԱՆՏ ՍԱՐԱՖՅԱՆ