ՔՈՉԱՐՅԱՆՆ ԻՐԱՎՈՒՆՔ ՉՈՒՆԻ ՔՆՆԱԴԱՏԵԼՈՒ ԻՇԽԱՆՈՒԹՅԱՆԸ. ՎԱԶԳԵՆ ԿԱՐԱԽԱՆՅԱՆ

ՔՈՉԱՐՅԱՆՆ  ԻՐԱՎՈՒՆՔ ՉՈՒՆԻ ՔՆՆԱԴԱՏԵԼՈՒ  ԻՇԽԱՆՈՒԹՅԱՆԸ. ՎԱԶԳԵՆ

ԿԱՐԱԽԱՆՅԱՆ

ՀՀ  նախկին վարչապետ Տիգրան Սարգսյանի հրաժարականից ու կառավարության փոփոխությունից հետո փոփոխություններ եղան նաեւ  օրենսդիր մարմնում: Կադաստրի պետ Մարտին Սարգսյանի նշանակվելուց հետո պատգամավոր դառնալու հերթը Վազգեն Կարախանյանինն էր, ով մամուլում շրջանառվող լուրերի համաձայն  չէր ցանկանում թողնել ԱԺ նախագահի խորհրդականի պաշտոնը և զբաղվել օրենսդիր գործունեությամբ: «Իրավունքն» այսօր այս, «Քառյակի» գործողությունների,  նախկին նախագահ Ռոբերտ Քոչարյանի  հավանական վերադարձի, ՀՀԿ-ի ինքնամաքրկան գործընթացի մասին հարցեր ուղղեց  պատգամավորին:

-Պրն Կարախանյան, որպես պատգամավոր ի՞նչ  հարցեր եք բարձրաձայնելու ԱԺ-ում եւ հետամուտ լինելու դրանց լուծմանը: Եվ հավաստի՞ էին այն հրապարակումները, որ չէիք ցանկանում պատգամավոր լինել:

-Մամուլն ինչ ասես գրում է, մեկ-մեկ էլ ճշմարտությունն է գրում, որի  համար շնորհակալ եմ ազնիվ լրագրողներից: Ինչ վերաբերում է  իմ կողմից բարձրացվելիք հարցերին, ասեմ,  որ  պատանի տարիքից մինչ այսօր մի խնդիր կա իմ առջեւ.տեսնել Հայաստանը հզոր, սահմանները՝ ամրակուռ:

-«Քառյակը»  մեղադրում է  իշխանություններին Ձեր և այլ  խնդիրները չլուծելու համար, ավելին՝ պատրաստվում է նաեւ ակտիվ գործողությունների:

-«Քառյակի» հայտարարություններում կան  ճշմարտության հատիկներ, բայց հիմնականում ցեխ շպրտելով, գործին չնվիրվելով, ներողություն եմ խնդրում , նաեւ գլուխ պահելով… նման գործելաոճը հարիր չէ քաղաքական գործչին: «Քառյակը» պետք է  իր համեստ լուման ներդնի երկրի բարգավաճման համար:

- Բացի -«Քառյակից»՝օրեր առաջ քննադատությամբ հանդես եկավ նաեւ նախկին նախագահ Ռոբերտ Քոչարյանը: Իշխանությանն ուղղված քննադատություններին  ինչպե՞ս եք արձագանքում

-Անկեղծ եմ ասում, ծանոթ չեմ: Դժվարանում եմ ասել:

Նախկին նախագահն ինչ դիրքերից և ինչ սկզբունքներով է քննադատում իշխանությանը:

-Չեմ կարծում, որ նա դրա իրավունք ունի, քանի որ որեւէ բան չի փոխվել. ներկա իշխանությունը  հաջորդել է նախկին իշխանությանը:

-Քոչարյանի վերադարձ  հնարավո՞ր է:

-Աշխարհում ամեն ինչ հնարավոր է: Ճիշտն ասած վերադարձի հիմքերը չեմ տեսնում:

-Ինչո՞ւ:

-Նա կատարեց դերը, իր լուման ներդրեց շինաարարության  գործընթացում: Կարծում եմ՝ նորերը պիտի գան, ավելի նվիրյալները, որոնք կնվիրվեն պետության ամրապնդմանը:

Պրն Կարախանյան, ԱԺ ընտրությունների առաջ՝ ՀՀԿ ցուցակի   համամասնական ձեւավորումից հետո հայտարարել էիք. « Ցուցակում ներկայացվեցին մարդիկ, որոնք, մինչև անգամ կասկածում եմ, որ կուսակցության արժեհամակարգը կամ գաղափարախոսությունն ընդունում են, թե չեն ընդունում»: Այդ մարդկանց հետ հիմա ինչպե՞ս եք աշխատում:

-Ճիշտն ասած, պարտադիր չէ, որ բոլորը բոլորի հետ աշխատեն: Ամեն մեկն իր գործն է անում: Վարար գետն իր հետ տանում է ե՛ւ շինարարական, ե՛ւ կենցաղային  եւ տարբեր տեսակի աղբեր: Բայց, ի վերջո,  գետը հասնում է իր նպատակին. ջրում ենք ծառերը և պտուղ ստանում:Մարդու օրգանիզմն էլ իր մեջ  լավ բաներ ունի: ՀՀԿ ցուցակում ընդգրկված այդ մարդիկ այլ ճանապարհով  պետք է գնային: Կարծում եմ՝ կուսակցությունը պետք է լինի շատ անարատ: Ես  սովետական տարիներին ընդհատակում եղել եմ և գիտեմ, որ մինչեւ վերջ պետք  է ուսումնասիրված լիներ  անձը, նոր անդամագրվեր  կուսակցությանը:  Իսկ  կուսակցությանն անդամագրվող  անձը պետք է լինի  ազնիվ ու անկեղծ, նվիրյալ:

-ՀՀԿ-ի ինքնամաքրման գործընթաց տեսնո՞ւմ եք:

-Ճիշտն ասած, ինձ  հուսադրում է այն, որ այս կամ այն մարդն իր աշխատանքը ճիշտ չանելու համար  պատժվել է: Գուցե  բավարար չէ, բայց մաքրման գործընթաց գնում է:

Սոնա Դավթյան