ՀՅՈՒՍԻՍԱՅԻՆ ԻՐԱՔՈՒՄ ՄՆԱՑԵԼ ԵՆ ՄԻԱՅՆ ԵԶԴԻ ԶԻՆՅԱԼՆԵՐԸ ԵՎ ՄԱՐԴԻԿ, ՈՎՔԵՐ ԳԵՐԻ ԵՆ ԱՀԱԲԵԿՉՆԵՐԻ ՄՈՏ

ՀՅՈՒՍԻՍԱՅԻՆ ԻՐԱՔՈՒՄ ՄՆԱՑԵԼ ԵՆ ՄԻԱՅՆ ԵԶԴԻ ԶԻՆՅԱԼՆԵՐԸ  ԵՎ ՄԱՐԴԻԿ, ՈՎՔԵՐ ԳԵՐԻ ԵՆ ԱՀԱԲԵԿՉՆԵՐԻ ՄՈՏ

Հյուսիսային Իրաքի  ծայրահեղ իսլամիստական ահաբեկչական խմբավորումների ոճրագործություններից մազապուրծ փախած եզդիների մի մասը այսօր գտնվում է Իրաք-Թուրքիա սահմանագծում: Նրանց վերջերս այցելել են Հայաստանում գործող «Սինջար» եզդիների ազգային միավորման ներկայացուցիչները: Այս մասին «Իրավունքը» զրուցեց «Սինջար» եզդիների ազգային միավորման նախագահ ԲՈՐԻՍ ՄՈՒՐԱԶԻԻ հետ:

- Ի՞նչ էին պատմում փախստականները այսօր դեռեւս շարունակվո՞ւմ են Հյուսիսային Իրաքում ոճրագործությունները:

-Այնտեղ գրեթե բնակչություն չկա, որ շարունակվեն ոճրագործությունները: Այսինքն` մարդիկ 99 տոկոսով դուրս են եկել երկրից, մնացել են միայն մարդիկ, ովքեր գերի են ահաբեկչների մոտ եւ եզդի զինյալները եզդի, ովքեր պայքարում են տարածաշրջանի ազատագրման համար:

- Ինչո՞վ կարողացաք աջակցել փախստականներին եւ այս պահին ամենաշատն ինչի՞ կարիք ունեն նրանք:

- Մեր տարած միջոցների հաշվին գնեցինք 25 վրան, որի յուրաքանչյուրի պատրաստումը արժե 370 դոլար: Այդ վրանները  հնարավորություն կտա 150 փախստականի ժամանակավոր ապաստան գտնել, բայց էլի այդ ուղղությամբ աշխատում ենք: Իրենք առաջին հերթին կացարանի խնդիր ունեն, որովհետեւ լավ գիտակցում են, որ հետ վերադառնալ այլեւս չեն կարող:

Նշենք, որ Իրաքում գործող «Իսլամական խալիֆայություն» ահաբեկչական խմբավորումը օրերս հրապարակել է առաջիկա 10 տարում նախատեսված իր գործողությունների քարտեզը: Ըստ դրա, իրենց երազած Իսլամական խալիֆայության տարածքները ընդլայնվելու են մի քանի անգամ` ներառելով նաեւ Ադրբեջանը: Իսկ Հայաստանը որպես պետություն ընդհանրապես գոյություն չի ունենալու: Այնպես որ, անտարբեր պետք չէ մնալ եզդի եղբայրական ժողովրդի հետ տեղի ունեցածին, որովհետեւ վաղը կարող է նույն վտանգը սպառնալ նաեւ հայերին:

ՀՐԱՆՏ ՍԱՐԱՖՅԱՆ