ԶԱՎԵՆ ՄԻՔԱՅԵԼՅԱՆՆ ՈՒԶՈՒՄ Է ՆՎԱՃԵԼ ԲՈԼՈՐ ՀՆԱՐԱՎՈՐ ԵՎ ԱՆՀՆԱՐ ՏԻՏՂՈՍՆԵՐԸ

ԶԱՎԵՆ ՄԻՔԱՅԵԼՅԱՆՆ ՈՒԶՈՒՄ Է ՆՎԱՃԵԼ ԲՈԼՈՐ ՀՆԱՐԱՎՈՐ ԵՎ ԱՆՀՆԱՐ ՏԻՏՂՈՍՆԵՐԸ

Ամառային պատանեկան Օլիմպիական խաղերում Հայաստանի նվաճած 2 արծաթե մեդալներից մեկը իր եւ թիմի հաշվին գրանցել էր հունահռոմեական ոճի ըմբիշ Զավեն Միքայելյանը: Եզրափակիչի ճանապարհին հայ ըմբիշը հաղթել էր Դոմինիկյան Հանրապետության, Թունիսի եւ Արգենտինայի ներկայացուցիչներին: Եվ միայն 58 կգ քաշային կարգի եզրափակիչում Միքայելյանը 10 միավորի տարբերությամբ պարտվեց ռուսաստանցի Արսլան Զուբաիրովին` 4:14: Առաջին մրցափուլում Զավեն Միքայելյանը հաղթել էր  4:1 հաշվով, սակայն երկրորդում ռուսաստանցին հավաքել է 13 միավոր` ժամանակից շուտ արժանանալով հաղթանակի:

Օլիմպիադայում իր ցուցադրած ելույթների, մրցակիցների եւ առաջիկա ծրագրերի մասին ՙԻրավունքի՚ հետ խոսեց պատանեկան Օլիմպիական խաղերի արծաթե մեդալակիր ԶԱՎԵՆ ՄԻՔԱՅԵԼՅԱՆԸ:

-Ինչպե՞ս կգնահատեք Ձեր ելույթները օլիմպիական խաղերում:
- Ելույթներս մի փոքր լավ եմ գնահատում, քանի որ հասա եզրափակիչ, մի քանի լավ գոտեմարտ անցկացրի, մեծ առավելությամբ հաղթելով մրցակիցներիս: Իմ ելույթներն ու հաղթանակները նվիրում եմ մայրիկիս:
- Ի դեպ, հենց այդ ելույթների մասին. փայլուն հաղթանակներ տարաք Դոմինիկյան Հանրապետության, Թունիսի եւ Արգենտինայի ներկայացուցիչների նկատմամբ: Ի՞նչը չհերիքեց ռուս մրցակցի հետ պայքարում:
- Մի քիչ շտապեցի... Կարող էի հաղթել, բայց չստացվեց: Կար փորձի պակասի խնդիր:
- Մինչ Նանջինգ մեկնելը մրցակիցներից առանձնացրել էիք Արսլան Զուբաիրովին, փաստորեն, ձեր հաշվարկներում չէիք սխալվել: Բացի Ռուսաստանի ներկայացուցչից, ում կառանձնացնեք:
- Կառանձնացնեմ Իրանի եւ Ղազախստանի ներկայացուցիչներին:
- Ի՞նչ ծրագրեր ունեք առաջիկայում: Եվ գտել եք արդյոք այն սխալները, որոնց վրա պետք է աշխատել:
- Ուսումնամարզական հավաք, միջազգային մրցաշար, ինչից հետո արդեն կսկսեմ պատրաստվել Հայաստանի երիտասարդական առաջնությանը: Ես իմ բոլոր մրցաշարերից առաջ դիտում եմ ելույթներս, որ հասկանամ, թե որտեղ եմ սխալվել ու փորձում եմ շտկել թերություններս: Այս ելույթներիս տեսագրությունը դեռ չեմ դիտել:
- Որպես մարզիկ` որն է ձեր գլխավոր նպատակը:
- Նվաճել բոլոր հնարավոր եւ անհնար տիտղոսները:
- Իսկ ո՞վ է հայ ըմբիշներից օրինակ ծառայում Ձեզ:
- Բացարձակ չեմպիոն Արթուր Ալեքսանյանը, շատ լավ մարզիկ է...

ՔՐԻՍՏԻՆԵ ՊԵՏՐՈՍՅԱՆ