ԱՐԵՎԱԾԱՂԻԿԻ ԿԵՂԵՎՆԵՐ, ՖԱՍՏՖՈՒԴ... ՀԱՄԱԼԻՐԸ ԴԱՀԿ-Ի ԱՇԽԱՏԱԿԻՑՆԵՐԸ ՎԵՐԱԾԵԼ ԵՆ ԽՈԶԱՆՈՑԻ. ՄՀՀ ԱՇԽԱՏԱԿԻՑ

ԱՐԵՎԱԾԱՂԻԿԻ ԿԵՂԵՎՆԵՐ, ՖԱՍՏՖՈՒԴ... ՀԱՄԱԼԻՐԸ  ԴԱՀԿ-Ի ԱՇԽԱՏԱԿԻՑՆԵՐԸ ՎԵՐԱԾԵԼ  ԵՆ ԽՈԶԱՆՈՑԻ. ՄՀՀ ԱՇԽԱՏԱԿԻՑ

Մարզահամերգային համալիրը թեև հանձնվել է պաշտպանության նախարարությանը, սակայն կառույցի հետագա ճակատագիրը  կարծես թե անորոշ է:  ՄՀՀ հասարակայնության հետ կապերի և լրատվության պատասխանատու Կորյուն Գրիգորյանն «Իրավունքի» հետ զրույցում  ասաց, որ համալիրը վերածվել է  խոզանոցի. «Սարսափելի վիճակ է համալիրում: Մենք ասել էինք, որ համալիրի բուսականությունն ու դեկորատիվ  ծաղիկներն ավերվում են, մտնենք ջրենք: ՊՆ-ը, իհարկե, թույլ տվեց, բայց  նախարարության աշխատակիցները կանգնում են մարդկանց գլխին՝ասելով, որ արագ պրծեք, շուտ  արեք»:

Կորյուն Գրիգորյանի խոսքով՝ համալիրի աջ և ձախ կողմերում գտնվող բուսականությունը վառել են: «Երեւի մի տավարի հոտ որ մտներ համալիր, ավելի մաքուր վիճակում այն կլիներ քան ԴԱՀԿ  աշխատակիցների ժամանակ է: Արևածաղիկի կեղևներ, ֆաստֆուդ, իսկական խոզանոց: Մարդիկ տարրական կուլտուրա ու դաստիարակություն կարծես թե  չունեն, ընտանիքից դուրս չեն եկել: Ու նման մարդկանց թողել են մտնել համալիր»,- մանրամասնեց Գրիգորյանը:

Ինչ վերաբերում է համալիրի ներսում  մնացած աշխատակիցների գույքին, Կորյուն Գրիգորյանի խոսքով՝  դեռ ոչինչ չեն կարողացել իրենք վերցնել: «Դեռ պետք է գույքագրենք իբր թե առանց մեզ, բայց  ինչ են գույքագրելու, չգիտենք»,- ասաց

Համալիրի տնօրենը՝ Հարություն Մուրադյանը  ևս չի կարողանում համալիրի ներսում տիրող իրավիճակին անտարբեր նայել. «Օրվա մի կեսը հիասթափվում է, ուզում է այս ամենը թողնել, օրվա մյուս կեսին բորբոքվում է՝հիշելով  համալիրի  վերականգնման համար արված չարչարանքները»:

Հիշեցնենք, որ  համալիրի հետ կապված այս ողջ պատմությունն առնչվում է ԲԱՄՕ ընկերության հետ, որին  համալիրի շենքը  2005 թվականին վաճառվել էր ԲԱՄՕ ընկերությանը 5,7 միլիոն դոլարով: Հետագայում, սակայն ընկերությունը  ֆինանսական խնդիրներ է ունեցել. 20 մլն դոլար վերցրած վարկի հետ կապված խնդիրներ էին առաջացել, որոնց պատճառով 2009-ից «Կարեն Դեմիրճյանի անվան մարզահամերգային համալիր» ՓԲԸ-ի բաժնետոմսերի 75 տոկոսը գտնվում էր  ՀՀ պաշտպանության նախարարության ենթակայության տակ: Վարկը մարել չկարողանալու պատճառով  ԴԱՀԿ-ը համալիրի շենքը մի քանի անգամ հանեց աճուրդի, սակայն գնորդ այդպես էլ չգտնվեց և ՀՀ կառավարության որոշման համաձայն՝ համալիրի շենքը պարտքի դիմաց տրվեց պաշտպանության նախարարությանը:

Սոնա Դավթյան