ՙԱՅՍ ՊԱՀԻՆ ՀՅԴ-Ի ՕՐԱԿԱՐԳՈՒՄ ՌՈԲԵՐՏ ՔՈՉԱՐՅԱՆԻՆ ՍԱՏԱՐԵԼՈՒ ՀԱՐՑ ՉԿԱ

ԱՅՍ ՊԱՀԻՆ ՀՅԴ-Ի ՕՐԱԿԱՐԳՈՒՄ
ՌՈԲԵՐՏ ՔՈՉԱՐՅԱՆԻՆ ՍԱՏԱՐԵԼՈՒ ՀԱՐՑ ՉԿԱ

Սպասված թեժ քաղաքական աշունը շարունակում է հետարձակուրդային հանգստություն պահպանել, միայն թե այդ թեժությունը խոստացող քաղաքական ուժերի փոխարեն` այս օրերին առավել շատ շրջանառվում է ՀՀ երկրորդ նախագահ Ռոբերտ Քոչարյանի անունը: Վերջինիս ուշագրավ հարցազրույցի ու քոչարյանական տարիների ձոներգի մասին եղան բազմաթիվ կարծիքներ ու հայտարարություններ: Սակայն այս մասին գրեթե չխոսեց ՀՅԴ-ն, ինչի վերաբերյալ էլ ծավալվեց «Իրավունքի» զրույցը ԱԺ ՀՅԴ խմբակցության պատգամավոր ՄԻՔԱՅԵԼ ՄԱՆՈՒԿՅԱՆԻ հետ:
-Գրեթե բոլոր քաղաքական ուժերն անդրադարձան ՀՀ երկրորդ նախագահ Ռոբերտ Քոչարյանի ուշագրավ հարցազրույցին, ինչո՞վ է պայմանավորված, որ ՀՅԴ պատգամավորներն այս մասին որեւէ տեսակետ չեն հայտնել:

- Հետաքրքիր է, որ ՀՅԴ-ի մասով ակնկալում եք պատգամավորների արձագանքը: Ինչ վերաբերում է, նրան, որ մենք չենք արձագանքել այդ հարցազրույցին. իսկ ինչո՞ւ պետք է արձագանքեինք: Ռոբերտ Քոչարյանի հարցազրույցն ունի հասցեատեր, եւ բնական է, որ մյուսները դրան արձագանքել են:
- Դուք անձնապես ինչպե՞ս եք վերաբերվում Ռ. Քոչարյանի այն հայտարարությանը, որ իր ղեկավարած տարիներին երկիրն արձանագրել էր տնտեսական աճ, իսկ հիմա` ճիշտ հակառակն է: Արդյո՞ք Ձեզ համար երանելի էին Ռ. Քոչարյանի ղեկավարած տարիները:
- Նախ սկսեմ հարցադրման վերջից: Անկախության ողջ ժամանակաշրջանի ընթացքում ինձ համար երանելի ժամանակը միայն այն պահն էր, երբ Արցախյան ազատամարտում տոնեցինք հաղթանակներ, ամրագրեցինք մեր հաղթանակը եւ հաստատեցինք խաղաղություն: Այդ տարիները ժողովրդի միասնականության եւ համախմբվածության լավագույն, ինչու չէ, նաեւ երանելի ժամանակներն էին: Եվ երկրորդ` այո, Քոչարյանի ղեկավարման տարիներին արձանագրվել է տնտեսական աճ, եւ այդ մասին ես չէ, որ պետք է ասեմ, որ դուք իմանաք: Ինքներդ կարող եք ուսումնասիրել այդ տարիների վիճակագրությունը:
- ՀՀ երկրորդ նախագահը խոսեց կրկին քաղաքականություն վերադառնալու մասին, այդ դեպքում հնարավո՞ր է, որ ՀՅԴ-ն աջակցի նրան:
- ՀՅԴ-ն նման առաջարկ չի ստացել, եւ այս պահին նման հարց մեր օրակարգում չկա: Մենք ունենք մեր քաղաքական ուղեգիծը, որով եւ առաջնորդվում ենք: Մենք մեկ հոգու կուսակցություն չենք, եւ «եղանակի փոփոխությանբ» մեր դիրքորոշումներն ու մոտեցումները  չեն փոխվում:
- Ռ. Քոչարյանի հարցազրույցը խիստ տարբեր մեկնաբանություն գտավ քառյակի ուժերի կողմից: «Ժառանգությունը» քարկոծում է Ռ. Քոչարյանին, ՀԱԿ-ն ու ԲՀԿ-ն` պաշտպանում: Արդյո՞ք սա կարող է պատճառ դառնալ քառյակի պառակտման:
- Ձեր նշած երեք քաղաքական կուսակցություներն էլ անկախ գործող քաղաքական միավորումներ են: Իրենց իրավունքն է կարծիք հայտնելը: Թե որ քաղաքական ուժը ինչ դիրքորոշում ունի, իրենց գործն է: Մենք ոչ քարկոծող ենք, ոչ էլ` ծափահարող: Թե՛ առաջին, թե՛ երկրորդ եւ թե՛ ապագայում` երրորդ, չորրորդ եւ մնացած բոլոր նախագահները իրավունք ունեն հարցազրույցներ տալ, իրենց մտահոգություններն ու տեսակետները  հայտնել: Աննորմալ կլինի, երբ երկիրը ղեկավարած քաղաքական այրերը ոչինչ չասեն, չխոսեն, թերությունները չմատնանշեն: Ընդամենը պետք է հարցին այլ կերպ նայել: Քաղաքական մշակույթ է ձեւավորվում, եւ կարծում եմ` հաջորդ տասնամյակում, նախորդ նախագահների հարցազրույցները ցավագին չեն ընկալվի: Դա կդառնա սովորական երեւույթ: Ընդամենը պետք է օգտվել նման հարցազրույցներից եւ շտկել թերությունները: Իսկ քառյակի պառակտվել կամ չպառակտվելը չի կարող կապված լինել Քոչարյանի հարցազրույցի հետ:

ՀՐԱՆՏ ՍԱՐԱՖՅԱՆ