ՀԱԿՈԲ ՄԿՐՏՉՅԱՆԸ ՌԻՈ-2016 ԿՄԵԿՆԻ ՈՍԿՈՒ ՀԱՄԱՐ ԿՌԻՎ ՏԱԼՈՒ

ՀԱԿՈԲ ՄԿՐՏՉՅԱՆԸ ՌԻՈ-2016 ԿՄԵԿՆԻ ՈՍԿՈՒ ՀԱՄԱՐ ԿՌԻՎ ՏԱԼՈՒ

Նանջինգում կայացած 2-րդ պատանեկան օլիմպիական խաղերից Հայաստանի թիմը վերադարձավ 2 ոսկե, 2 արծաթե  եւ 3 բրոնզե մեդալներով: 77 կգ քաշային Հակոբ Մկրտչյանը եւ +85 կգ քաշային կարգում հանդես եկած Սիմոն Մարտիրոսյանը ոսկե մեդալների արժանացան ծանրամարտի մրցաշարում, հրաձիգ Հրաչյա Բաբայանը եւ հունահռոմեական ոճի ըմբիշ Զավեն Միքայելյանը (58 կգ) դարձան օլիմպիական փոխչեմպիոններ, իսկ 81 կգ քաշային բռնցքամարտիկ Նարեկ Մանասյանը եւ ազատ ոճի ըմբիշներ Սարգիս Հովսեփյանը (76 կգ) ու Վաղինակ Մաթեւոսյանը (54 կգ) նվաճեցին բրոնզե մեդալներ: Ոչ պաշտոնական թիմային հաշվարկում Հայաստանը Սլովենիայի հետ կիսեց 29-րդ տեղը: Օլիմպիական տպավորություններով ՙԻրավունքի՚ հետ կիսվեց 2-րդ պատանեկան օլիմպիական խաղերի ոսկե մեդալակիր, 77 կգ քաշային ծանրորդ ՀԱԿՈԲ ՄԿՐՏՉՅԱՆԸ:

-Տարիքային սահմանափակման համար յուրաքանչյուր մարզիկի ընդամենը մեկ անգամ է վիճակվում մասնակցել պատանեկան օլիմպիական խաղերին, պատասխանատվությունն այս պարագայում ավելի է մեծանում...
- Այո, պատասխանատվությունը շատ մեծ էր, երբ 4 մարզիկներից ընտրվում են 2-ը, եւ պետք է գնալ ու անել ամեն հնարավոր բան: Շատ մեծ պատասխանատվություն էր մեզ վրա դրված:
- Այլ խոշոր մրցաշարերի էլ եք մասնակցել. որն է օլիմպիադայի առանձնահատկությունը: Ընդհանուր մթնոլորտի մասին ինչ կասեք:
- Ամենամեծ առավելությունը հենց այն է, որ օլիմպիական խաղերն իրենցից ավելի մեծ բան են ներկայացնում, քան, օրինակ, Եվրոպայի կամ աշխարհի առաջնությունը: Իսկ մթնոլորտից շատ գոհ եմ, ամեն բան  շատ լավ էր:
- Մեկ անչափ կարեւոր նվաճում արդեն ունեք այս տարվա համար: Էլ ինչ խնդիր եք դրել Ձեր առաջ:
- Լավ հանդես գալ Եվրոպայի առաջնությունում եւ պատրաստվել  Ռիո-2016-ին:
- Ի դեպ, Ռիո-2016-ի մասին, ի՞նչն այնտեղ այլ կերպ կանեք:
- Քաշս եմ փոխելու, այլ քաշով եմ հանդես գալու...Դարձյալ պետք է պատրաստվեմ ու կռիվ տամ ոսկու համար:
- Թիմի գլխավոր մարզիչն արդեն նշել է, որ բոլորդ էլ ֆիզիկապես, տակտիկապես  ու հոգեբանորեն լավ պատրաստված եք եղել:  Ձեր դեպքում ինչն ամենաշատն օգնեց նվաճել չեմպիոնի տիտղոսը:
- Առաջինը` լավ պատրաստավածությունը, հետո` արդեն հոգեբանականը...
- Ինչպես եք հաղթահարում հոգեբանական խնդիրները:
- Ուղղակի չպետք է մտածել այն քաշի մասին, որը պետք է բարձրացնես, կարեւորը չլարվելն է...

ՔՐԻՍՏԻՆԵ ՊԵՏՐՈՍՅԱՆ