ԲՌՆՈՒՄ ԵՆ ԱՅՆ ԿՐՊԱԿԱՏԵՐԵՐԻՆ, ՈՐՈՆՔ «ԱԴԱՄՍԻՑ» ՉԵՆ ՕԳՏՎՈՒՄ .«ՌԵՔՈ ՌԵՔՈՐԴՍՆ ՈՒ «ԱԴԱՄՍԸ» ՄԵՂԱԴՐՈՒՄ ԵՆ ՄԻ

ԲՌՆՈՒՄ ԵՆ ԱՅՆ ԿՐՊԱԿԱՏԵՐԵՐԻՆ, ՈՐՈՆՔ «ԱԴԱՄՍԻՑ» ՉԵՆ ՕԳՏՎՈՒՄ .«ՌԵՔՈ

ՌԵՔՈՐԴՍՆ ՈՒ «ԱԴԱՄՍԸ» ՄԵՂԱԴՐՈՒՄ ԵՆ ՄԻՄՅԱՆՑ

Օրեր առաջ մի քանի տեսա և ձայնասկավառակներ  վաճառող կրպակատերեր իրենց փաստաբան Տիգրան Մուրադյանի հետ  հրապարակավ բարձրաձայնել էին «Ադամս» ընկերության կողմից կատարվող ապօրինությունների մասին: Նրանք պնդում են, որ ամեն կերպ այդ ընկերությունն փորձում է շուկայում  մենաշնորհային դիրք զբաղեցնել:

Կրպակատերերը գրավոր բողոք են ներկայացրել  դատախազություն՝ պահանջելով պարզել՝ Արաբկիրի և Մալաթիայի բաժինների աշխատակիցների կողմից «Ադամս» ընկերության  աշխատակցի ցուցումով կրպակներից քանի սկավառակներ են վերցրել, որոնք չեն պատկանում «Ադամս» ընկերությանը:

«Իրավունքի» հետ զրույցում «Ադամս» ընկերության տնօրեն Արշավիր Առաքելյանը, ով կրպակատերերի շրջանում հայտնի է Նվեր անունով (ինչպես ինքն է ասում՝ծնողներն ու հարազատներն իրեն նաև Նվեր են ասել և ավելի շատ այդ անունով են իրեն  ճանաչում) ասաց, որ  կրպակատերերի մեղադրանքներն իրականությանը չեն համապատասխանում. «Մեր ընկերությունը պայքարում է իր հեղինակային իրավունքների, ոչ թե մենաշնորհային դիրք հաստատելու համար: Մի քանի անգամ կրպակատերերի զգուշացրել եմ, որ մի վաճառեք այն արտադրանքը, որը բացառիկ հեղինակային իրավունքով  պատկանում է մեզ: Մեր ընկերությունը  պայմանագիր  է կնքել « Paramount Pictures», «Warner Bros», «Soni Pictures», ինչպես նաև «Կարեն» ստուդիոյի հետ, որի հայկական արտադրանքի վաճառքի բացառիկ իրավունքը թե՛ ՀՀ-ում, թե՛ ԼՂՀ-ում պատկանում է մեզ: Ավելին ասեմ՝ այդ ստուդիայի արտադրանքը ստվարաթղթով է փաթաթված, ավելի թանկ է՝արժե 1000 դրամ, իսկ կրպակատերերի ապրանքը՝ 700-1000 դրամ»:

Մեղավոր է « Ռեքո Ռեքորդսը»

Ինչ վերաբերում է Առնոլդ Շվարցենեգերի հետ կնքած  պայմանագրին,   «Ադամս» ընկերության տնօրենի խոսքով՝ ոչ թե Շվարցենեգերի, այլ  նրա ֆիլմերն արտադրող   կինոընկերության հետ է պայմանագիր կնքել: «Կոնկրետ «Տերմինատոր» ֆիլմերի վաճառքը մեզ է պատկանում»,- մանրամասնեց պրն Առաքելյանը:

Ընկերության տնօրենը վստահ է՝այս ողջ աղմուկի ետևում կանգնած է «Ռեքո Ռեքորդս» ընկերությունը՝ ի դեմս  ընկերության տնօրենԴավիթ Խանոյանի. «Այդ կրպակատերերը ցանկանում են կեղծ արտադրանք վաճառել, որի իրավունքը չունեն: Իրենք դրոշմապիտակի փաստն են մեջտեղ բերում, բայց դրանք փակցվել են «պիրատ» դիսկերի վրա: Մենք առգրավվել ենք այն ձայնասկավառակները, որոնք ակնհայտ ցույց են տալիս՝ խախտվել են մեր հեղինակային իրավունքները»:

Ո՞վ է  կանգնած «Ադամս» ընկերության ետևում, որի շնորհիվ այս կազմակերպությունը փորձում է  ձայնա ու տեսակավառակների ոլորտում   ավելի կայուն դիրք ունենալ: «Եթե ժամանակ ունենաք, եկեք տեսեք՝ես ինչ պայմաններում եմ ապրում, Դավիթ Խանոյանը՝ ինչ պայմաններում: Ում ապրանքը որ առգրավվել ենք, դա կրպակատեր Աշոտ Մարտիրոսյանը չի արտադրում, այդ ապրանքները գնվել են «Ռեքո Ռեքորդսից»»,- պատասխանեց «Ադամս» ընկերության տնօրենը՝այսպիսով հերքելով այն խոսակցությունները, թե իր ետևում ինչ-որ  պաշտոնյաներ են կանգնած:

Արշավիր Առաքելյանը  մտավախություն չունի, որ դատախազությանն ուղղված կրպակատերերի  բողոքը այնպիսի ընթացք կստանա, որից կտուժի ինքը. ամեն ինչ կատարվել է օրենքի սահմաններում:

ՈՍՏԻԿԱՆԱԿԱՆ ՄԵԹՈԴՆԵՐՈՎ ՀԱՐՑԸ ՉԻ ԼՈՒԾՎԻ

«Ռեքո Ռեքորդս» ընկերության հիմնադիր տնօրեն Դավիթ Խանոյանը, մեզ հետ զրույցում  լսելով իր և իր ընկերության հասցեին հնչեցրած մեղադրանքները, ծիծաղեց, ապա  ասաց, որ «կրպակատերերին իր համար չեն բռնում, այլ «Ադամսի»»: «Ես այդ պատմության հետ ոչ մի կապ չունեմ»,- վստահեցնում է  ընկերության հիմնադիրը:

Դավիթ Խանոյանն էլ  իր հերթին պնդում է, որ  «Ադամս» ընկերությունը փորձում  է դաշտում մենաշնորհային դիրք զբաղեցնել. «Գնում-բռնում են այն կրպակատերերին, որոնք «Ադամսից» չեն օգտվում: Որքանով ես գիտեմ, ոստիկանների հետ «Ադամսի տնօրենը գնում է  ձայնա և տեսասկավառակներ վաճառողների մոտ և ասում ՝ պետք է գաք ինձնից գնեք ձայնասկավառակները 300% ավելի բարձր գնով»:

Ըստ «Ռեքո Ռեքորդս» ընկերության տնօրենի՝  ձայնա ու տեսասկավառակների շուկայում  այս խնդիրները միշտ եղել են, բայց ոստիկանական մեթոդներով հարցը չի լուծվի, կյանքը դա է ցույց տվել.« Պետք է  դատական կարգով այդ խնդիրները լուծել: «Իմ արտադրանքն էլ կեղծում են ու վաճառում շուկայում: Ու դա դժվար է ապացուցել»:

Որպես լուծում Դավիթ Խանոյանն առաջարկում է հետեւյալը. «Դրոշմապիտակներն արժեն 7,5 դրամ, բայց կարելի է դրանք վաճառել ավելի թանկ գնով, միանգամից փոխանցումներն արվեն հեղինակներին. պիրատության հարցն էլ կլուծվի, հեղինակների իրավունքների պաշտպանության խնդիրը եւս»:

Սոնա Դավթյան