Գալուստ Սահակյան. Քառյակը պիտի իր խոսքն ասի սահմանադրական բարեփոխումների մասին

Գալուստ Սահակյան. Քառյակը պիտի իր խոսքն ասի սահմանադրական բարեփոխումների մասին

«Քառյակը որպես քաղաքական կառույց համաձայնեցված չէ, նրանց պայմանավորվածությունը հետևյալն է` առանձին խնդիրների ու հիմնականում նաև օրվա խնդիրներին արձագանքել համատեղ: Նրանք ոչ դաշինք են, ոչ կոալիցիա են, ոչ էլ գաղափարական կամ սկզբունքային միություն»,- ասաց ԱԺ նախագահ Գալուստ Սահակյանը՝ անդրադառնալով խորհրդարանական քառյակի հնարավոր պառակտմանը սպասվելիք սահմանադրական բարեփոխումներով

«Դրանից վատ բան ես չեմ գուշակում, որովհետեւ քաղաքական դաշտը ինչքան ալեկոծվի, այնքան առաջընթաց կլինի։ »,- ասաց ԱԺ նախագահը:

Ըստ Գ. Սահակյանի՝ խորհրդարանական քառյակը խնդիրներ լուծելու հարց չունի, «քառյակը երեւույթը տեսանելի դարձնելու համար միավորվում է։ «Կարծում եմ, քառյակը պետք է իր խոսքն ասի, քանի որ չի կարելի, որ ասեն, «այո, սահմանադրական բարեփոխումներն անհրաժեշտ են, բայց մենք դրանք անենք 2017-2018 թթ.-ին»,- ընդգծեց Գ. Սահակյանը։

Գալուստ Սահակյանն անդրադարձավ նաեւ ՀՀ երկրորդ նախագահ Ռոբերտ Քոչարյանի վերջին հայտարարություններին: Մասնավորապես Ռոբերտ Քոչարյանի այն հայտարարության մասին, որ երկրի տնտեսության լավատեսական գնահատականի համար չկան ո'չ ներքին, ո'չ էլ արտաքին պատճառներ, և Հայաստանը մտել է բացասական սպասումների փուլ, Գալուստ Սահակյանը ասաց. «Եթե տնտեսության զարգացման լավ հիմքեր լինեին, բնականաբար, տնտեսությունը ավելի կզարգանար: Բնական է` լավ հիմքեր չկան, որովհետև Հայաստանը փակ երկիր է, ռիսկային երկիր է, և այն, ինչ մենք ունենք, տարակուսանքի է արժանանում ոչ միայն մեր հասարակության կողմից, այլև` դրսի: Բնական է` տնտեսության զարգացման խնդիրներ ունենք»:

Ռ. Քոչարյանի հնարավոր վերադարձի մասին ԱԺ նախագահն ասաց, որ չի ցանկանում անդրադառնալ այդ հարցին: «Մենք Ռոբերտ Քոչարյանի հետ միասին աշխատել ենք, սատարել ենք, այսինքն` քաղաքական համաձայնությունների ենք եկել, և այդ տարիներին, հանձին կառավարության և Ազգային ժողովի, մենք կարողացանք լուրջ հաջողություններ արձանագրել, որովհետև ժամանակաշրջանի հնարավորությունները այդպիսին էին: Առավել ևս` հանձին Անդրանիկ Մարգարյանի, մենք կարողացանք հաղթահարել հոկտեմբերի 27-ի դեպքերը, ապահովել հանրապետության նախագահի թիկունքը: Դրանից հետո` 2001-ից սկսվեց տնտեսական աճը: Դա մի ժամանակաշրջան էր, երբ Հանրապետականը կարողացավ ամեն ինչ անել, որպեսզի հնարավորինս ժողովրդի վիճակը փոխվի: Եվ մի ժամանակաշրջանը մյուսի հետ չի կարելի համեմատել: Իսկ այս պահին տքնում է ամբողջ աշխարհը, և հնարավոր չէ, որ Հայաստանը որոշակիորեն իր վրա չունենա նաև ծանրություն` բարոյական, տնտեսական ու քաղաքական առումով: Համենայն դեպս, ժամանակը ցույց տվեց, որ երբ ժողովուրդը զգում է վտանգ, ոչ թե արտագաղթում է, ինչպես որոշները մտածում էին, այլ միավորվում է»:

Զ. Բաբուխանյան

{youtube}OKE1TZUlBwM{/youtube}