ՖՐԱՆՍԻԱՅԻ ԴԵՍՊԱՆԱՏԱՆ ՀԱՄԱՌՈՒԹՅՈՒՆԸ ԽՈՉԸՆԴՈՏՈՒՄ Է ՓՈՔՐԻԿ ԻԳՈՐԻ ՎԻՐԱՀԱՏՈՒԹՅԱՆԸ

ՖՐԱՆՍԻԱՅԻ ԴԵՍՊԱՆԱՏԱՆ ՀԱՄԱՌՈՒԹՅՈՒՆԸ ԽՈՉԸՆԴՈՏՈՒՄ Է

ՓՈՔՐԻԿ ԻԳՈՐԻ ՎԻՐԱՀԱՏՈՒԹՅԱՆԸ

Փոքրիկ ԻԳՈՐ ԶԱՔԻՅԱՆԻ պատմությանը համացանցում շատերն են ծանոթ: Բավական երկար ժամանակ Զաքիյանների ընտանիքը գումար էր հանգանակում, որպեսզի կարողանար Ֆրանսիայում իրականացնել փոքրիկի աչքի վիրահատությունը: Հիշեցնենք, որ երեքուկես տարեկան Իգորին բժիշկներն ախտորոշել էին աչքի խնձորակի սուբատրոֆիա, որը աչքի դանդաղ մահն է, այսինքն` աչքի չափն աստիճանաբար նվազում է եւ քայքայվում: Այժմ արդեն ֆրանսիական կլինիկայում նշանակված է վիրահատության օրը, որը պետք է տեղի ունենա սույն թվականի հոկտեմբերի 3-ին եւ ստուգումներն իրականացնելու համար Զաքյանները պետք է Ֆրանսիայում լինեն արդեն սեպտեմբերի 26-ին: Սակայն, կրկին Զաքիյանների ընտանիքը խոչընդոտի առաջ է կանգնել: Հայաստանում Ֆրանսիայի դեսպանատունը երեխային ուղեկցելու թույլտվություն տալիս է ծնողներից միայն մեկին: Այս մասին «Իրավունքը» զրուցեց Իգորի հոր` ՌՈՄԱՆ ԶԱՔԻՅԱՆԻ հետ. «Մարտին եմ որդուս հետ վերադարձել Ֆրանսիայից, այնտեղ մեզ խորհուրդ տվեցին պրոթեզավորել երեխայի աչքը, մինչդեռ Հայաստանում առաջարկում էին հեռացնել այն։ Առաջին վիզան էլ այսպիսի մեծ դժվարությամբ ենք ձեռք բերել, քանի որ դեսպանատունը ձգձգում էր: Ես երկու տարի անընդհատ դիմել եմ իրենց, եւ միայն չորրորդ անգամ եմ ստացել վիզա, եւ այդ ժամանակ էլ թողել են ծնողներից միայն մեկին: Տարել եմ Իգորիս Փարիզի «Adolphe de Rothschild» հոսպիտալը եւ հետազոտելուց հետո ասել են, որ արդեն շատ ուշ է: Չէ՞ որ երկու տարին քիչ ժամկետ չէ, գուցե մի օր էլ շուտ հասցնեինք երեխային Ֆրանսիա, աչքը հնարավոր լիներ բուժել»: Այժմ Ռ. Զաքիյանն առավել դժվար իրավիճակում է հայտնվել, քանի որ նախորդ անգամ Ֆրանսիա մեկնելը ու երեխայի ստուգումներն իրականացնելը գրեթե անհնար էր դարձել, քանի որ երեքուկես տարեկան երեխան առանց մոր պարզապես չի մնում, իսկ միայն մոր հետ մեկնելն էլ անհնար էր: «Հետազոտությունների ողջ ընթացքում տղաս անընդհատ լաց էր լինում ու մոր անունը տալիս: Մինչդեռ աչքի խնձորակի սուբատրոֆիայի դեպքում լաց լինելը խստիվ արգելվում է: Արդյունքում ստիպված եղանք ժամանակից շուտ վերադառնալ, որովհետեւ երեխան այլեւս չէր դիմանում առանց մոր: Ես էլ չէի կարող կնոջս ու երեխային ուղարկել, որովհետեւ կինս ոչ մի լեզվի չի տիրապետում: Այս անգամ նորից դիմել եմ դեսպանատուն, որպեսզի մեզ երկուսիս թողնեն գնալ Ֆրանսիա: Սակայն ինձ կրկին մերժել են եւ ասել, որ ծնողներից միայն մեկը կարող է երեխայի հետ մեկնել»,- ասում է Ռ. Զաքիյանը: Փոքրիկի հոր համար առավել վիրավորական է այն, որ Հայաստանում Ֆրանսիայի դեսպանատանը մերժում են ծնողներից երկուսին թույլտվություն տալ, քանի որ կարծում են, թե իրենք կլքեն երկիրը ընդմիշտ: Մինչդեռ, ըստ Ռ. Զաքիյանի. «Ես իրենց էլ եմ խոստացել, որ մենք կվերադառնանք, քանի որ հիվանդ ծնողներ ունեմ, որոնց ես եմ պահում: Հայրս երեք անգամ ինսուլտ է տարել, թոշակառու է, ինչպե՞ս կարող եմ նրանց թողնել ու գնալ ընդմիշտ: Ընդամենն ուզում եմ, որ հավատան`ես Ֆրանսիա գնում եմ երեխայիս բուժելու, ոչ թե հանգստանալու կամ ապաստան գտնելու»:

Ի դեպ, հենց մեր զրույցի ընթացքում պարզվեց, որ այսօր փոքրիկ Իգորի հոր` Ռոման Զաքիյանի ծննդյան օրն է, սակայն մեր շնորհավորանքներին ի պատասխան վերջինս նշեց. «Ամեն ինչ սուտ է, քանի դեռ տղայիս երկրորդ աչքը գոնե չենք փրկել, ոչ մեկից նվեր չեմ ուզում, միայն թե կարողանանք ժամանակին գնալ, վիրահատությունն անել երեխայի ու վերադառնալ: Հավանաբար, ՀՀ-ում Ֆրանսիայի արտակարգ եւ լիազոր դեսպանն էլ երեխաներ ունի, հուսով եմ, որ գոնե մի անգամ իր սրտի թելադրանքով կառաջնորդվի ու որպես հայր` կհասկանա մեր ապրումները: Ոչ մեկի չեմ ցանկանում անցնել այն ամենի միջով, ինչով ես ու կինս ենք անցել այս տարիների ընթացքում: Մեծ երազանքներ չունեմ, պարզապես ուզում եմ երեխայիս աչքի լույսը չմարի…»

ՀՐԱՆՏ ՍԱՐԱՖՅԱՆ