ՄԵԿՆԱՐԿԵՑ ՆՈՐ ՈՒՍՈՒՄՆԱԿԱՆ ՏԱՐԻՆ

ՄԵԿՆԱՐԿԵՑ ՆՈՐ ՈՒՍՈՒՄՆԱԿԱՆ ՏԱՐԻՆ

Գիտելիքի միջազգային օր՝ Սեպտեմբերի 1, որով այսօր ազդարարվեց նոր ուսումնական տարին: Նոր հույսեր ու սպասումներ, տոնական տրամադրություն՝ համեմված գունագեղ ծաղկեփնջերով, փուչիկներով: Որպես Գիտելիքի օր՝ Սեպտեմբերի 1-ը սկսել է նշվել ԽՍՀՄ-ում։ Մինչ 20-րդ դարի 30-ական թվականները ԽՍՀՄ-ում ուսումնական տարվա սկիզբը պաշտոնապես հաստատված չէր, երբ 1930թ.-ի օգոստոսի 14-ին Ժողովրդական կոմիսարների խորհուրդը որոշեց, որ 8-10 տարեկան բոլոր երեխաները պիտի դպրոց ընդունվեն աշնանը։ 1980թ. հոկտեմբերի 1-ին ԽՍՀՄ Գերագույն խորհրդի որոշման համաձայն` Սեպտեմբերի 1-ը պաշտոնապես հայտարարվեց Գիտելիքի օր։ Տոնի կապակցությամբ ամենքն են շնորհավորում ու բարեմաղթություններ հղում գիտության հետ ուղղակի կապ ունեցողներին:

Այսօր գիտելիքի օրվա կապակցությամբ իր շնորհավորանքներով «Բյուրակն» կրթահամալիրում էր Մանկավարժական նախաձեռնություն հայկական ասոցիացիայի նախագահ ԱՐԱ ԻՍՊԻՐՅԱՆԸ: « «Բյուրակն» կրթահամալիրն այն եզակի ուսումնական հաստատություններից է, որտեղ ուսումանական գործընթացը կազմակերպվում է համագործակցային գաղափարախոսության հիման վրա, որը լավագույն հնարավորությունն է ընձեռում լուծելու ներկայումս հանրության առջև ծառացած կրթական հիմնախնդիրները: Շնորհավորում եմ բոլորիդ, մաղթում անսպառ ուժ ու եռանդ, հաջող ուսումնական տարի»,- ասաց պարոն ԻՍՊԻՐՅԱՆԸ:

Կրթահամալիրի սաներին իր ողջույնի խոսքն ուղղեց նաև տնօրեն Սպարտակ Մկրտչյանը, այնուհետև, ավանդույթի համաձայն, առ աշակերտները մաղթանքի խոսքով հանդես եկավ Տեր Սմբատ քահանա Սարգսյանը: Նախորդ տարվա ընթացքում գերազանց առաջադիմություն ցուցաբերած աշակերտներն էլ պարգևատրվեցին գովասանագրերով՝ տոնն առավել ոգևորիչ դարձնելով:

ԱՊՀ գրեթե բոլոր երկրներում Գիտելիքի օրը պետական տոն է համարվում:

ԷԹԵՐԻ ՄԱՄՈՒԼՅԱՆ