ՇԱՐԱ ՏԱԼՅԱՆԻ ԹՈՌՆՈՒՀՈՒ ԽԼՎԱԾ ԲՆԱԿԱՐԱՆԻ ԱՌՆՉՈՒԹՅԱՄԲ ՀԱՐՈՒՑՎԵԼ Է ՔՐԵԱԿԱՆ ԳՈՐԾ

ՇԱՐԱ ՏԱԼՅԱՆԻ ԹՈՌՆՈՒՀՈՒ ԽԼՎԱԾ ԲՆԱԿԱՐԱՆԻ ԱՌՆՉՈՒԹՅԱՄԲ ՀԱՐՈՒՑՎԵԼ Է

ՔՐԵԱԿԱՆ ԳՈՐԾ

Արդեն մի քանի տարի է՝ սիրված երգիչ Շարա Տալյանի թոռնուհին՝Ռուզաննա Բաբաջանյանը,  ապրում է  փողոցում՝ մուրացիկի և անօգնականի կարգավիճակում: Նա երբեմն հայտնվում է «Հանս Քրիստան Կոֆոեդ» բարեգործական հիմնադրամում: Այս մասին «Իրավունքին» հայտնեց  հիմնադրամի հոգեբան Համլետ Հովհաննիսյանը: «Վերջին անգամ նա այստեղ եղել է մոտ տասն օր առաջ: Գալիս է, գրեթե ոչ ոքի հետ չի շփվում: Մեկ էլ տեսար՝ անհետացել է»,- ասաց պրն Հովհաննիսյանը:

Հիշեցնենք, որ  հեռավոր ազգականն օգտվել է անկողնային հիվանդ Շարա Տալյանի դուստր Լուսյա Տալյանի անօգնական վիճակից ու խլել նրա բնակարանը: Արդյունքում՝ 80-ամյա հիվանդ կինն իր միակ բնակարանը 2007 մարտի 2-ին նվիրել է ոչ թե մոտ 60 տարեկան իր հարազատ դստերը, այլ հեռավոր ազգականին և 2008թ. փետրվարի 1-ին մահացել:

Ռ.Բաբաջանյանի փաստաբան Մելանյա Առուստամյան էլ  մեզ հետ զրույցում ասաց, որ իր պաշտպանյալը տառապում  է «շիզոֆրենիա» հիվանդությամբ, բայց չի սիրում, երբ նրան այդ մասին հիշեցնում են:

Տեղեկացնենք, որ Կենտրոն և Նորք -Մարաշ վարչական շրջանների ընդհանուր իրավասության դատարանը մերժել էր Ռ, Բաբաջանյանի փաստաբանի՝այդ կասկածելի նվիրատվությունն անվավեր ճանաչելու մասին հայցը: Փաստաբանները՝ Մելանյա Առուստամյանն ու Մոնիկա Հակոբյանը, դատական  վճիռը բողոքարկել են վերաքննիչ դատարան: Դատական նիստը տեղի կունենա սեպտեմբերի իննին, ժամը՝ 11:45-ին:

Բնակարանը խլելու առնչությամբ  փաստաբանի տեղեկացմամբ  հարուցվել է  նաև քրեական գործ. «Քրեական գործը հարուցվել էր  Շարա Տալյանի ընտանիքի բարեկամ, ՀՀ ԳԱԱ անդամ Ռեմ Ղազանչյանի պահանջով, որը, սակայն մերժվել էր:  Ռեմ Ղազանչյանը  բաց էր թողել դատախազին յոթնօրյա ժամկետում  բողոքարկելու իրավունքը: Մենք դիմեցինք դատարան, որն էլ  գտավ, որ քննիչի կողմից խախտվել է Ռեմ Ղազանչյանին բողոքարկման կարգի բացատրման  իրավունքը:  Դիմեցինք  կենտրոնի դատախազին, նա էլ մեր դիմումը մակագրեց քննիչին, որպեսզի վերջինս  դատախազի բողոքարկման  ժամկետը հարգելի համարի: Քննիչը հարգելի չհամարեց: Մենք նորից բողոքարկեցինք.կենտրոնի դատախազն էլ քրեական գործ  հարուցելու մասին քննիչի մերժման որոշումը չեղյալ համարեց և հարուցեց նոր քրգործ: Իսկ թե ինչ է  պարզել նախաքննական մարմինը քրեական գործի շրջանակներում, դեռ չգիտենք»:

Ըստ  փաստաբանի՝քրեական գործ պետք է հարուցվի, քանի որ կասկածներ կան, որ  բնակարանը  խլվել է խաբեությամբ, բռնությամբ և սպառնալիքների  միջոցով:

Ռ. Բաբաջանյանի փաստաբանը նաև ասաց, որ իրենք  վերաքննիչ դատարանում պահանջելու են կասեցնել բնակարանի խլման առնչությամբ հարուցված  քաղաքացիական գործը, որպեսզի քրեական գործի շրջանակներում կարողանան հասնել արդյունքի:

Սոնա Դավթյան