ԱՎԻԱԸՆԿԵՐՈՒԹՅՈՒՆՆԵՐՆ ԱՅՍ ՍԵԶՈՆԻՆ ՓՈՐՁՈՒՄ ԵՆ ԳՈՒՄԱՐ ՎԱՍՏԱԿԵԼ, ՀԱԿԱՌԱԿ ԴԵՊՔՈՒՄ ԿՍՆԱՆԿԱՆԱՆ

ԱՎԻԱԸՆԿԵՐՈՒԹՅՈՒՆՆԵՐՆ ԱՅՍ ՍԵԶՈՆԻՆ  ՓՈՐՁՈՒՄ ԵՆ ԳՈՒՄԱՐ  ՎԱՍՏԱԿԵԼ, ՀԱԿԱՌԱԿ

ԴԵՊՔՈՒՄ ԿՍՆԱՆԿԱՆԱՆ

Վերջին օրերին «Իրավունքի» խմբագրություն էին զանգահարել  մի խումբ քաղաքացիներ, որոնք դժգոհում էին Հայաստան-Ռուսաստան ինքնաթիռի տոմսերի  գների  բարձրացումից: Քաղաքացիներից մեկի  տեղեկացմամբ  70.000 դրամ արժողությամբ տոմսը մի քանի օր առաջ ինքը ստիպված է եղել  գնել 180.000 դրամով: Ինչո՞վ է  պայմանավորված տոմսերի այսպիսի գնաճը, արդյոք Վերին Լարսի անցակետի փակ լինելը հնարավորություն է ընձեռել  որոշ ավիաընկերությունների՝ տոմսերի գինը կրկնակի  բարձրացնելու:

Քաղավիացիայի գլխավոր  վարչության  մամլո քարտուղար Ռուբեն Գրձելյանն «Իրավունքի» հետ զրույցում ասաց, որ  քաղավիացիայի վարչությունը չի  զբաղվում և չի վերահսկում   ավիատոմսերի գնագոյացման հարցերով: «Մենք միայն տրամադրում ենք լիցենզիաներն ու թույլտվությունները: Իսկ ավիատոմսերի գները որոշում է շուկան»,- ասաց մամլո քարտուղարը:

Մամլո քարտուղարի խոսքով՝ գնագոյացման հարցը բարց գործընթաց է .«Ցանկացած ավիաընկերություն սկզբում վաճառում է էժան տոմսերը: Երբ թռիչքին  մնացել է  երեք- չորս օր, արդեն մնում են  տվյալ չվերթի թանկ տոմսերը»:

Փորձեցինք կապ հաստատել  նաև մի քանի ավիաընկերությունների հետ՝պարզելու՝արդյոք վերջին մի քանի օրերին իրենց ընկերությունը  բարձրացրել է տոմսերի գինը: Լսելով, որ իրենց զանգահարել  է լրատվամիջոցի ներկայացուցիչ,  ընկերությունների ներկայացուցիչները խուսափողոկան պատասխան տվեցին՝ասելով, որ տնօրենն այս պահին ժողովի է: Որքան էլ զարմանալի թվա,  պատասխան չստացանք նաև «Աէրոֆլոտ»  ռուսական  ընկերության հայաստանյան մասնաճյուղի  տնօրեն Ալեքսեյ Ռուդիխից, ով խորհուրդ տվեց զանգահարել Մոսկվայում գտնվող  իրենց ընկերության  մամլո ծառայություն:  Պարզաբանում  ստացանք միայն «Էյր Արմենիա» ավիաընկերության կոմերցիոն տնօրեն Սիմոն Ավագյանից: Վերջինիս խոսքով՝  տոմսերի կտրուկ գնաճը  հարաբերական  հասկացություն է. «Կա պահանջարկ և առաջարկ, կա մեծ մրցակցություն շուկայում: ՀՀ կառավարությունը հայտարարել է բաց երկնքի քաղաքականություն, որը հնարավորություն է տալիս ազատականացնել գնագոյացման գործընթացը: Հիմա ավիատոմսերի մեծ  պահանջարկ կա շուկայում: Ավիաընկերությունները փորձում են գումար  վաստակել այս սեզոնին, որպեսզի կարողանան գոյատևել , հակառակ դեպքում կսնանկանան:  Սկզբում ուղեւորները գնում են ցածր արժեք ունեցող տոմսերը, հետո  մնում են թանկ տոմսերը:  Օրինակ, երկու օր առաջ հոկտեմբեր ամսվա Երևան- Մոսկվա ավիատոմսը մեկ անձի համար  վաճառվել է 150.000 դրամով, որը ներառում է մեկնումն ու վերադարձը»:

Սիմոն Ավագյանի խոսքով՝  բնական է, որ  այս սեզոնին ավիատոմսերի գնաճ է արձանագրվում, քանի որ կա պահանջարկ, բայց  ավիատոմսերի բարձր գներն  այդքան էլ կապ  չունի Վերին Լարսի անցակետի հետ, որը բացվել է միայն երկու օր առաջ:

Սոնա Դավթյան