Ռ. ՔՈՉԱՐՅԱՆԻՆ ԽՈՐՀՈՒՐԴ ՏԱԼՈՒ ՏՐԱՄԱԴՐՈՒԹՅՈՒՆ ՉՈՒՆԵՄ. ՀՈԳԵՎՈՐԱԿԱՆՆԵՐԻ ԱՐՁԱԳԱՆՔԸ ՆԱԽԿԻՆ ՆԱԽԱԳԱՀԻ ՀԱՅՏԱՐ

Ռ. ՔՈՉԱՐՅԱՆԻՆ ԽՈՐՀՈՒՐԴ ՏԱԼՈՒ ՏՐԱՄԱԴՐՈՒԹՅՈՒՆ ՉՈՒՆԵՄ. ՀՈԳԵՎՈՐԱԿԱՆՆԵՐԻ

ԱՐՁԱԳԱՆՔԸ ՆԱԽԿԻՆ ՆԱԽԱԳԱՀԻ ՀԱՅՏԱՐԱՐՈՒԹՅԱՆԸ

Նախկին նախագահ Ռոբերտ Քոչարյանն իր հարցազրույցում  հայտարարել էր, որ ամենևին չէր խանգարի դադարեցնել աշխատանքային շաբաթվա կազմալուծումը բազմաթիվ մեռելոցներով և վերադառնալ նախկին ժամային գոտի: «Իրավունքը» հոգևորականներից  պարզեց՝ ինչպե՞ս են արձագանքում  երկրորդ նախագահի այս հայտարարությանը

Արցախի թեմի առաջնորդ Պարգեվ սրբազանը մեզ հետ զրույցում հիշեցրեց՝  տարվա կտրվածքով հինգ մեռելոցի օր ունենք: Այդ օրերին մարդուն ժամանակ ենք տալիս ներկա լինել պատարագին, այցելել գերեզմանոց և տաղավար տոնի լուրը փոխանցել: «Ինչ տարբերություն մենք շաբաթ օրն աշխատենք, թե երկուշաբթի: Աշխատանքային ռեժիմն այստեղ չի խափանվում, բայց հոգևոր առումով ազգը շահում է որպես առաջին քրիստոնյա ազգ:  Եթե մենք առաջնորդվենք այդ մտածելակերպով,  դե կներեք, եկեք ապրիլի 24-ն էլ կրճատենք, չգնանք Ծիծեռնակաբերդ»,-ասաց սրբազանը:

Մտահոգիչ չէ՞, որ  մեռելոցների թիվը աշխատանքայի օրերի վերածելու առաջարկությամբ հանդես է գալիս նախկին նախագահը: Դա ընդամենը իր կարծիքն է,  ամեն մարդ իրավունք ունի ազատ արտահայտել իր կարծիքը:

Հայորդաց տների տեսուչ-տնօրեն Կոմիտաս վարդապետ Հովնանյանի կարծիքով էլ  մեռելոցներով մենք հարգում ենք մեր նախնյաց հիշատակը: «Կցանկանայի այդքան չվարկաբեկեին իրենց ազգային դիմագիծը, որովհետև այն անձը, որը  քննադատում է իր ազգային արժեքները, առաջին հերթին քննադատում է ինքն իրեն և ցույց տալիս, որ ազգային առումով ինչ-որ բան իր մոտ տկար է»,- պատասխանեց  վարդապետը:

Նախկին նախագահի մակարդակով հնչեցված  այս հայտարարությունը  մեր զրուցակիցը  մեսիջ հանրությանը չի համարում: «Դա խոսում է այն մասին, որ  70 տարվա անաստվածությունը իր հետքը թողնում  է այս օրերի վրա: Մեր անկախությունը վերականգնելով՝ պետք է վերականգնեիք մեր ազգային ոգին, ազգային սովորույթներն ու ավանդույթները, որոնցից հրաժարվելով՝ մենք հրաժարվում ենք մեզանից»,-պարզաբանում է Կոմիտաս վարդապետը:

Հետաքրքիր է՝ի՞նչ խորհուրդ կտա հոգևորականը Ռոբերտ Քոչարյանին: «Ես  Ռոբերտ Քոչարյանին ոչ մի խորհուրդ տալու տրամադրություն չունեմ, քանի որ ամեն մեկը հայտնում է  իր տեսակետը: Ես հայտնեցի իմ տեսակետը»,- եզրափակեց   Հայորդաց տների տեսուչ-տնօրենը:

Սոնա Դավթյան