«ՉԵՄ ԿԱՐԾՈՒՄ, ՈՐ ՊԱՏԵՐԱԶՄԻ ՄԱՍՆԱԿԻՑՆԵՐՆ ԻՐԵՆՑ ԹՈՒՅԼ ԿՏԱՆ ՀԱՅԱՍՏԱՆՈՒՄ ՀԵՂԱՓՈԽՈՒԹՅՈՒՆ ԱՆԵԼ»

«ՉԵՄ ԿԱՐԾՈՒՄ, ՈՐ ՊԱՏԵՐԱԶՄԻ ՄԱՍՆԱԿԻՑՆԵՐՆ
ԻՐԵՆՑ ԹՈՒՅԼ ԿՏԱՆ ՀԱՅԱՍՏԱՆՈՒՄ ՀԵՂԱՓՈԽՈՒԹՅՈՒՆ ԱՆԵԼ»

Արմավիրում իր առաջին հավաքն է արել «Ազատամարտիկների դաշինք» կազմակերպությունը, որին մասնակցել են Արցախյան պատերազմի վետերան 10-12 հրամանատար: Lրատվամիջոցներից մեկին տված հարցազրույցում «Ազատամարտիկների դաշինքի» դիրքորոշումը ներկայացրել է «Արաբո» ջոկատի հրամանատար Մանվել Եղիազարյանը: Նա տեսակետներ է հայտնել` ինչպես ԵԿՄ-ի, այնպես էլ նորաստեղծ միության անելիքների ու որեւէ քաղաքական ուժին հարել-չհարելու հնարավորության վերաբերյալ: Ազատամարտիկների նորաստեղծ կառույցի մասին «Իրավունքը» զրուցեց ԱԺ ՀՀԿ խմբակցության պատգամավոր ԱՇՈՏ ԱՂԱԲԱԲՅԱՆԻ հետ, ով եղել է «Անկախության բանակ» ռազմահայրենասիրական կազմակերպության ռազմական խորհրդի անդամ, շտաբի պետ:

ՆՈՐ ԴԱՇԻՆՔ ԵՆ ՍՏԵՂԾՈՒՄ` «ՈՐ Ի՞ՆՉ ԱՆԵՆ»

-Պարոն Աղաբաբյան, ինչպե՞ս եք վերաբերում, որ մի շարք ազատամարտիկներ համախմբվել են նոր կազմակերպություն ստեղծելու շուրջ, երբ ունենք «Երկրապահ կամավորականների միությունը»:
- Ես, ընդհանրապես, Հայաստանում նոր կազմակերպությունների ստեղծմանը լավ չեմ վերաբերում:
- «Արաբո» ջոկատի հրամանատար Մ. Եղիազարյանը նշել է, որ ԵԿՄ-ն չի հասցնում բոլոր ազատամարտիկներին օգնել, եւ մեծ թվով մարդիկ դուրս են մնացել միությունից: Արդյո՞ք նոր կառույց է անհրաժեշտ` ԵԿՄ-ում չընդգրկված ազատամարտիկների համար:
- Իսկ ինչո՞ւ են դուրս մնացել, որ հիմա էլ զբաղվում են նոր կառույց ստեղծելով: Ո՞ր ինչ անեն:
- Որպեսզի սատար կանգնեն ժողովրդին, հայրենիքին, որոշեն Արցախյան ազատամարտի մասնակիցների վաղվա օրը:
- Այսինքն` նրանց համար պետություն չկա՞ արդեն, ու դրա համար իրե՞նք են որոշելու երկրի խնդիրներն ինչպե՞ս լուծեն...
- Ի դեպ, «Արաբո» ջոկատի հրամանատարը նաեւ անդրադարձել է ներքաղաքական հարցերին եւ նշել է, որ ոչ իշխանական քառյակում մինչեւ սեպտեմբերի վերջ ակտիվության խնդիր կա, եւ թե ինչ դիրքորոշում կունենա քառյակը` հենց դրանից էլ կախված է իրենց հետագա վերաբերմունքը քառյակին եւ մարտավարությունը: Կարելի՞ է ենթադրել, որ այս նոր կառույցը միգուցե քառյակին սատարող ուժ է դառնալու:
- Եթե այդ միության արմատները իրոք տանում են դեպի քառյակ, նշանակում է, որ իրենք պատրաստվում են հեղափոխության: Չեմ կարծում, որ, օրինակ, Մանվել Եղիազարյանը կամ պատերազմի մյուս մասնակիցները իրենց թույլ կտան Հայաստանում հեղափոխություն անել, երբ թշնամին այսօր կրակոցներով անընդհատ փորձում է լարված պահել մեր դիրքերը: Այդպիսի հեղափոխությունն արյունով կավարտվի, որովհետեւ չի կարելի ունենալ ներքին եւ արտաքին ճակատներ: Ես դեմ եմ նման բաների...

«ԲԻԶՆԵՍԻ ՄԵՋ ԵՆ ԱՅԼԸՆՏՐԱՆՔՆԵՐ ՄԱՆ ԳԱԼԻՍ»

-Այնուամենայնիվ, այս նոր միությունը, ըստ Ձեզ, կարո՞ղ է այլընտրանք դառնալ ԵԿՄ-ին:
- Բայց ի՞նչ պետք է, որ ԵԿՄ-ին այլընտրանք լինի: ԵԿՄ-ին ի՞նչ է եղել, որ հիմա էլ ԵԿՄ-ին այլընտրանք է պետք: Ու ես չեմ հասկանում դա, ընդհանրապես, բիզնեսի մեջ են այլընտրանքներ ման գալիս...
- Մինչդեռ նորագույն պատմությունը ցույց է տալիս, որ քաղաքականության մեջ էլ է լինում այլընտրանք...
- Եթե պատմության մեջ կա պատերազմի մասնակից հասկացողությունը, դրա մեջ ընդգրկվում է ե՛ւ ԵԿՄ-ն, ե՛ւ Մանվել Եղիազարյանի ջոկատը, ե՛ւ «Անկախության բանակը», ե՛ւ մյուսները: Դրանք բոլորն էլ այսօր համարվում են պատերազմի մասնակիցներ: Ի՞նչ է, Ձեզ թվում է` ես ԵԿՄ-ին, «Անկախության բանակին» կամ Մանվել Եղիազարյանի ջոկատին կո՞ղմ եմ` առանձին-առանձին: Երբեք կողմ չեմ, Հայաստանը պետք է ունենա միայն ու միայն պատերազմի մասնակից տղաներ, որոնց նկատմամբ պետությունը որոշակի քայլեր է անում` փորձելով իր հնարավորությունների չափով, իր բյուջեի գրպանի չափով կազմակերպել ու զբաղվել ե՛ւ նրանց առողջական, ե՛ւ սոցիալական վիճակով: Այսինքն` առանձին ջոկատներ մեր երկրին արդեն պետք չեն: Մեր երկիրն ունի պետական բանակ եւ ունի պատերազմի մասնակիցներ, վերջ...
- Դուք լավ գիտեք մեր ազատամարտիկներից շատերին, մի՞թե նրանք այնպիսի ծանր վիճակում են գտնվում, որ պետք է այսօր ստեղծել նոր կառույց, որն իրենց խնդիրներով կզբաղվի:
- Ամեն մարդ պետք է ունենա իր «յորղանը» եւ այն իր ոտքերի չափով մեկնի: Սա, ի վերջո, մեր ստեղծած պետությունն է եւ մեր ստեղծած բյուջեն է` մեր իսկ գրպանից: Պետությունն ինչքանով կարողանում է իր բյուջեի, իր գրպանի միջոցներով փորձում է լուծել սոցիալական խնդիրներ: Այլ խնդիրներ են այն որոշակի երեւույթները, որոնք կան ԵԿՄ տղաների, միգուցե, «Արաբո» ջոկատի կամ «Սասունցի Դավթի» միջեւ, մինչդեռ բոլորն էլ  պատերազմի մասնակից տղաներ են: Այդ մարդիկ պետք է հպարտ լինեն, որ իրենք պատերազմի մասնակից են, ոչ թե հպարտ լինեն, որ իրենք ԵԿՄ-ի կամ «Անկախության բանակի» անդամ են, կամ էլ «Արաբոյի» ջոկատից են: Այդ ջոկատային ժամանակներն անցել են, դրսում 21-րդ դարն է: Հարկավոր է վերջ տալ այդ մրցակցությանը:

ՀՐԱՆՏ ՍԱՐԱՖՅԱՆ