«ԱՐԵՎԻԿ» ԱԶԳԱՅԻՆ ՊԱՐԿԸ ՎՏԱՆԳԻ ՏԱԿ Է ՄԵՂՐԱՍԱՐԻ ՀԱՆՔԻ ՇԱՀԱԳՈՐԾՄԱՆ ՊԱՏՃԱՌՈՎ

«ԱՐԵՎԻԿ» ԱԶԳԱՅԻՆ ՊԱՐԿԸ ՎՏԱՆԳԻ ՏԱԿ Է ՄԵՂՐԱՍԱՐԻ ՀԱՆՔԻ ՇԱՀԱԳՈՐԾՄԱՆ ՊԱՏՃԱՌՈՎ

Եթե հանքարդյունաբերողն ասում է, որ իր գործունեության  ազդեցութունը բնության, մարդկանց ու կենդանական աշխարհի վրա զրո է, նշանակում է՝ այդ հանքարդյունաբերողի հետ խոսելու բան կա՝ այսօրվա  մամլո ասուլիսում ասաց բնապահպան, Համահայկական բնապահպանական ճակատի անդամ Աննա Աղլամազյանը`խոսելով Սյունիքում գտնվող Մեղրասարի ոսկու հանքի (Տաշտունի  ֆաբրիկա) շահագործման մասին:

Բնապահպանի խոսքով՝  ՀԲՃ-ն անցյալ տարվանից է այս հանքի շահագործման մասին  տեղեկացել ու բարձրաձայնել, հաղորդում ներկայացրել հանցագործության մասին: «Արդյունքը եղավ այն, որ գրեցին, թե աղջիկը հանրային լսումները  վերածել է թատրոնի»,- հիշում է Ա. Աղլամազյանը:

Բնապահպանի խոսքով՝  հանքի շահագործման համար կազմակերպված հանրային լսումներին ներկա էին նրանք, ովքեր աշխատում են  հանքավայրում:

ՀԲՃ անդամի  տեղեկացմամբ հանքավայրի շահագործման նախագծում որևէ խոսք չկա բացասական ազդեցության ու ռիսկերի մասին՝ մասնավորապես՝ բնության  պահպանվող տարածքների մասին  ևս ոչ մի բառ չի ասվում (հանքի  կողքին գտնվում է «Արեվիկ» ազգային պարկը). «Հանքավայրի պատասխանատուներն ասում են՝ «Արեվիկ» ազգային պարկը չի մտնում  հանքավայրի տարածքի  մեջ: Բայց եթե անգամ չի մտնում, բայց  հանքավայրին հարակից տարածք է, պատասխանատուները պարտավոր  են ազդեցության և ռիսկերի մասին նշել իրենց նախագծում»:

Հիշեցնենք, որ հանքը շահագործում  է  «ԱՏ Մետալս» ՍՊԸ-ը:

«Իրավունքի»  հարցին՝  այս ամենին ինչպես  է արձագանքում Սյունիքի մարզպետ Վահե Հակոբյանը, արդյոք   բնապահպանները փորձել են հանդիպել նրա հետ՝ հարցը բարձրաձայնելու համար: «Ում  հետ խոսենք, Վահե Հակոբյանի՞, ով Մաքսմիկ Հակոբյանի որդին է:   Նրա հետ մենք խոսելու ոչինչ չունենք»,- պատասխանեց  Աննա Աղլամազյանը:

Ինչ վերաբերում է  բնապահպանության նախարար Արամայիս Գրիգորյանից սպասելիքներին այս խնդրի լուծման  առումով, բնապահպանի խոսքով, երբ հիվանդ է  ամբողջ մարմինը, ձեռքը ոչինչ չի կարող անել:

Ասուլիսի մյուս բանախոս, կանաչների միության նախագահ Հակոբ Սանասարյանն էլ ասաց, որ  կան ուրանային  գոտիներ, երբ ընդերքի երկրաբանական  վիճակը խախտվում է  հանք  է  շահագործվում, ուրանը  լինելով ցրված  վիճակում, դուրս է գալիս մակերևույթ:  «Սյունիքում ունենք 11 բաց պոչամբար և 28 մետաղական հանքավայր, որոնք սպասում են շահագործման: Եթե հաշվեք, կհասկանաք` տարիներ անց Սյունիքում  բնակվելու տեղ կլինի,թե ոչ: Սա հանքակերություն է, հանքարդյունաբերության մասին խոսելն ավելորդ է: Օրենքով հարկերից ազատել են բոլոր հանքատերերին եթե այսպես շարունակվի, 10 տարի հետո հայաստանում չի մնա ոչ մի գետ, որի ջուրը հնարավոր կլինի օգտագործել»,-

Սոնա Դավթյան