ՕՊԵՐԱՅԻ ԵՎ ԲԱԼԵՏԻ ԱԶԳԱՅԻՆ ԱԿԱԴԵՄԻԱԿԱՆ ԹԱՏՐՈՆԻ 81-ՐԴ ԹԱՏԵՐԱՇՐՋԱՆԸ ԿԲԱՑԻ Ջ. ՎԵՐԴԻԻ «ԱԻԴԱ» ՕՊԵՐԱՆ

Արխիվ 12-16 27 Օգոստոս, 2014 21:39

ՕՊԵՐԱՅԻ ԵՎ ԲԱԼԵՏԻ ԱԶԳԱՅԻՆ ԱԿԱԴԵՄԻԱԿԱՆ ԹԱՏՐՈՆԻ 81-ՐԴ ԹԱՏԵՐԱՇՐՋԱՆԸ ԿԲԱՑԻ Ջ. ՎԵՐԴԻԻ «ԱԻԴԱ» ՕՊԵՐԱՆ

Ա. Սպենդիարյանի անվան օպերայի և բալետի ազգային ակադեմիական թատրոնի 81-րդ թատերաշրջանի մեկնարկը կտրվի Ջ. Վերդիի «Աիդա» օպերայով: Սեպտեմբերի 8-ին «Աիդա» օպերան կներկայացվի՝ ՀՀ վաստակավոր արտիստ, դիրիժոր Կարեն Դուրգարյանի ղեկավարությամբ, իսկ 10-ին թատրոնի սիմֆոնիկ նվագախումբը կղեկավարի հրավիրյալ դիրիժոր Վան-Յու Նին (Թայվան):

Թատրոնի տեղեկատվության և հասարակայնության հետ կապերի բաժինը տեղեկացնում է, որ թատերաշրջանի բացման ներկայացումները նվիրվում են օպերային երգիչ, տենոր Սերգեյ Դանիելյանի ծննդյան 85-ամյակին: Նոր թատերաշրջանի բացման ներկայացմանը հանդես կգան Ս. Դանիելյանի ուսանողները՝ օպերային երգիչներ Գևորգ Հակոբյանն ու Հովհաննես Այվազյանը:

Սերգեյ Դանիելյանը ծնվել է 1929 թվականին: Սովորել է Երևանի գեղարվեստա-թատերական ինստիտուտում: 1957 թվականից աշխատել է Երևանի Ա. Սպենդիարյանի անվան օպերայի և բալետի թատրոնում: Տասնամյակներ շարունակ արտիստը կերտել է դրամատիկ տենորի այնպիսի կերպարներ, ինչպիսիք են Օթելլո, Ռադամես, Կանիո, Կավարադոսի, Խոզե, Տոնիո, Էդիպ արքա, Գերման և այլ դերերգեր: 1967 թվականին Ս. Դանիելյանն արժանացել է ՀԽՍՀ ժողովրդական արտիստի կոչմանը: 1968 թվականից դասավանդել է Երևանի Կոմիտասի անվան պետական կոնսերվատորիայում:

Վ. ՄՈՒՐԱԴՅԱՆ