ՙՙՉԵՄ ՀԱՎԱՏՈՒՄ՚

ՙՉԵՄ ՀԱՎԱՏՈՒՄ՚

Ինչպիսի երանգով կհնչեր Ստանիսլավսկու հանրահայտ ՙՉեմ հավատում՚ մասնագիտական բացականչությունը, եթե բոլոր ժամանակների մեծագույն ռեժիսորներից մեկը իր կենդանության օրոք տեղեկացվեր, որ այն թատրոնում, որտեղ սկիզբ էր առել նրա փառավոր ճանապահը, ՙբեմադրվելու՚ է ... խմբակային սեքս:
Մոսկվայում, Նիժնի Կիսլովսկի նրբանցքի 10 շենքում վաղ անցյալում գործում էր ռուս արվեստագետների համար սրբավայր համարվող Սեկրետարյովի թատրոնը: Պրեսնյայի շրջանի պատգամավոր, ՙՄոսկվայի պաշտպանության միություն՚ հասարակական կազմակերպության համակարգող Ելենա Տկաչը ահազանգել էր, որ վերը նշված հասցեում հայտնաբերվել է էլիտար պոռնիկանոց, որի հեռախոսահամարները անգամ գրանցված են ՙՀատուկ հետաքրքրությունների ակումբների՚ ցուցակում: Ավելին` ՙհետախուզական՚ զանգի արդյունքում Ելենա Տկաչին ներկայացրել են նաեւ մատուցվող սեքսուալ ծառայությունների ցանկը:


ՄՈՍԿՎԱՅԻ ԻՐԱՎԱՊԱՀՆԵՐԸ ԲԱՎԱՐԱՐՎԱԾ
ՉԵՆ ՔՆՆՈՒԹՅԱՆ ԱՐԴՅՈՒՆՔՆԵՐՈՎ

Օգոստոսի կեսերին Ռուսաստանի Դաշնության Տոմսկ քաղաքում առեւանգվել, բռնաբարվել եւ սպանվել էր երեքամյա մի աղջնակ: Ըստ տեղական իրավապահների կողմից իրականացված քննությանª երեխային մանկապարտեզից տարել էր անհայտ մի տղամարդ: Հինգ օր անց երեխայի դին հայտնաբերվել էր քաղաքի ծայրամասում գտնվող մի շինության նկուղում...
Մարզային քննիչները զեկուցել էին, թե հանցագործությունը կատարելու մեջ կասկածվողը ոչ միայն ձերբակալվել էր, այլեւ հասցրել էր ինքնասպան լինել: Անցկացված ԴՆԹ հետազոտություններն էլ հիմք էին հանդիսացել հանցագործությունը բացահայտված համարելու համար...
Սակայն երեկ, ՌԴ Քննչական կոմիտեի պաշտոնական ներկայացուցիչ Մարկինը հայտարարել էր, որ քննությունը ավարտված չէ, եւ որ դրանով ներկայումս զբաղվելու է Կոմիտեի կենտրոնական ապարատի փորձառու քննիչը: Ըստ Մարկինիª քննությունը չի համարվի ավարտված այնքան ժամանակ, մինչեւ պատասխանատվության չենթարկվեն բոլոր մեղավորները, այդ թվումª Տոմսկի այն պաշտոնյաները, որոնք պարտավոր են ապահովել երեխաների անվտանգությունը, մանկապարտեզի աշխատակիցներն ու այլք...  


ՙԿԵՆՑԱՂԱՅԻՆ՚ ԻՆՏԵՐՆԵՏ ԿԱՊԸ ՀԱՆՑԱԳՈՐԾՈՒԹՅԱՆ ԴԵՄ

Պետության կողմից քաղաքացիներին մատուցվող ծառայությունների որակը բարձրացնելու ծրագրերի շրջանակներում շեշտակի առաջընթաց է գրանցվել ՌԴ Կալուգայի մարզում: Ներքին գործերի մարզային վարչությունում տեղադրվել են համապատասխան սարքավորումներ, որոնք թույլ կտան քաղաքացիներին ներկայացնել հաղորդումներ` հանցագործությունների մասին... Skype ինտերնետային տեսակապի միջոցով: Նորամուծությունը հավանություն է ստացել կառավարության կողմից եւ մոտ ապագայում այն կգործի նաեւ Դաշնության այլ մարզերում ու քաղաքներում:


ՙԷԼ ՉԵՄ ԱՆԻ...՚

ՙԵս ցանկանում եմ ներողություն խնդրել իմ բոլոր մտերիմներից ու ազգականներից կատարվածի համար: Ես խնդրում եմ դատարանից ինձ խիստ չպատժել, թույլ տալ ապրել նոր կյանքով...՚:
Այսպիսին էր 19-ամյա Ալյոնա Իպատովայի վերջին խոսքը Սանկտ-Պետերբուրգի դատարանում:
Երիտասարդ այդ կնոջ համար պետական մեղադրողը պահանջել էր 19,5 տարի ազատազրկում այն բանի համար, որ նա սովամահ էր արել իր 5-ամսական աղջնակին: ՙՈչ դիտավորյալ՚. մանկիկը 2 շաբաթ մենակ մնացել էր բնակարանում, իսկ մայրը այդ ժամանակահատվածում հարբում էր ծանոթների շրջապատում...

Ա. ԱԲԳԱՐՅԱՆ