«ԿԱՆ ՄԱՐԴԻԿ, ՈՒՄ ՁԵՌՆՏՈՒ Է, ՈՐ ՇԱՐՈՒՆԱԿՎԻ ՀԱՅ-ԱԴՐԲԵՋԱՆԱԿԱՆ ԿՈՆՖԼԻԿՏԸ»

«ԿԱՆ ՄԱՐԴԻԿ, ՈՒՄ ՁԵՌՆՏՈՒ Է,
ՈՐ ՇԱՐՈՒՆԱԿՎԻ ՀԱՅ-ԱԴՐԲԵՋԱՆԱԿԱՆ ԿՈՆՖԼԻԿՏԸ»

Երեկ Հայաստանում ՌԴ դեսպանությունում տեղի ունեցավ «Ռոսսոտրուդնիչեստվո» դաշնային գործակալության նախաձեռնությամբ լույս տեսած ռուսաց լեզվի ու գրականության 10-ից ավելի ձեռնարկների շնորհանդեսը: Նշենք, որ ձեռնարկները նախատեսված են ռուսերենի խորացված ուսուցմամբ դպրոցների համար: Ի դեպ, 5 հազար այբբենարաններն ու այլ դասարանների համար նախատեսված 7500 կտոր դասագրքերը եւս լույս են տեսել ռուսերենի խորացված ուսուցմամբ դպրոցների նույնքան թվով աշակերտների համար, որը նրանց տրամադրվելու են բացառապես անվճար:
Շնորհանդեսի ժամանակ Հայաստանում ՌԴ արտակարգ եւ լիազոր դեսպան ԻՎԱՆ ՎՈԼՆԻԿԻՆԸ ողջունելով ներկաներին` նշեց, որ ուսումնական ձեռնարկների լույսընծայումը սպասված եւ ուրախալի իրադարձություն էր.

«Շուտով աշակերտները դպրոց կգնան եւ հաճելիորեն կզարմանան` հինը փոխարինվել է համալրված եւ արդիականացված նոր դասագրքով, ինչը շատ մասնագետների քրտնաջան ու լուրջ աշխատանքի արդյունք է»: ՌԴ դեսպանատան հյուրընկալության ընթացքում «Իրավունքը» հնարավորություն ունեցավ զրուցել դեսպանի հետ քաղաքական թեմաների շուրջ` անդրադառնալով ՀՀ` ՄՄ եւ ԵՏՄ անդամակցմանը, ռուս-վրացական հարաբերություններին, ինչպես նաեւ տարածաշրջանում օգոստոսին տիրող լարված իրավիճակին:

«ՀՀ-Ի ԵՏՄ ԱՆԴԱՄԱԿՑՄԱՆԸ ՈՉԻՆՉ ԽԱՆԳԱՐԵԼ ՉԻ ԿԱՐՈՂ»

-Պարոն դեսպան, ըստ Ձեզ, երբ կիրականանա Հայաստանի` Մաքսային եւ Եվրասիական տնտեսական միությունների լիիրավ անդամակցումը:
- Կարող եմ Ձեզ ասել, որ Հայաստանը միության անդամ կդառնա հունվարի 1-ից, ինչպես մյուս բոլոր Եվրասիական միության անդամները: Այլ հարց է, թե երբ կլինի անդամակցության ստորագրումը: Կարծում եմ, որ այն կլինի շատ մոտ ժամանակներում:
- Իսկ ի՞նչը կարող է խանգարել ստորագրմանը:
- Ոչինչ, քանի որ Եվրասիական միության անդամակցման որոշման կարեւորությունը գիտակցում է ոչ միայն Հայաստանի ղեկավարությունը, այլ հայ ժողովրդի մեծամասնությունը: Այնպես որ, այդ գործընթացին խանգարել չեն կարող:

«ԻՆՁ ԱՅՆՔԱՆ ԷԼ ՏԵՍԱՆԵԼԻ ՉԷ ՎՐԱՍՏԱՆԸ»

-Վրաստանի գյուղատնտեսության նախարարը` պատասխանելով Եվրահանձնաժողովի ներկայացուցչին, ասել է, որ Վրաստանը չի միանում Ռուսաստանի դեմ տնտեսական պատժամիջոցներին: Արդյո՞ք սա նշանակում է, որ Վրաստանը վերանայում է իր հարաբերությունները Ռուսաստանի հետ:
- Գիտեք, ինձ այնքան էլ տեսանելի չէ Վրաստանն այստեղից, քանի որ այն սարերի հետեւում է գտնվում` «թունելից» այն կողմ: Բայց ես ակնկալում եմ, որ ռուս-վրացական հարաբերությունները կզարգանան ու կլավանան:
- Հետաքրքիր է, կա՞ հավանականություն, որ կվերականգնվի Ռուսաստան-Վրաստան-Հայաստան երկաթուղային գիծը:
- Ինձ թվում է, որպեսզի սկսենք այդ գծի վերականգնումը, հարկավոր է լուրջ նախագիծ մշակել` ցույց տալով դրա ե՛ւ տնտեսական, ե՛ւ տեխնիկական, ե°ւ ֆինանսական կողմերը: Միայն դրանից հետո կարելի է խոսել, թե որքանով է արդյունավետ այդ ուղու վերաբացումը: Երբեմն պատահում է, որ նմանատիպ նախագծերը ավելի թանկ են նստում եւ շահութաբեր չեն: Մինչդեռ, իմ ներքին համոզմամբ` այս նախագիծը ե՛ւ քաղաքական, ե՛ւ տնտեսական տեսանկյունից տարածաշրջանի բոլոր երկրների համար արդյունավետ կլինի:

«ՈՂՋԱԽՈՀ ՄԱՐԴԻԿ ԵՆՔ ՈՒ ԳԻՏԵՆՔ
ՄԵՐ ԳՈՒՄԱՐՆԵՐԸ ՀԱՇՎԵԼ»

-Ինչ եք կարծում` Վրաստանը կհամաձայնի՞:
- Վրաստանի փոխարեն պատասխան չեմ կարող տալ: Չգիտեմ, կհամաձայնեն, թե` ոչ, բայց կարծում եմ, որ բոլորս էլ ողջախոհ մարդիկ ենք ու գիտենք մեր գումարները հաշվել: Նրանք ամեն ինչ ճիշտ կհաշվեն եւ կկայացնեն համապատասխան որոշումներ:
- Վերջերս Աբխազիայում նախագահական ընտրություններ են կայացել, ի՞նչ կասեք այս մասին:
- Ընդհանրապես, չեմ անդրադառնում այդ հարցին, քանի որ ինձ դժվար է հեռվից որեւէ մեկնաբանություն տալ:

«ՄԵՆՔ ԿՈՂՄՆԱԿԻՑ ԵՆՔ, ՈՐ ՀԱՅ-ԱԴՐԲԵՋԱՆԱԿԱՆ
ԿՈՆՖԼԻԿՏՆ ԱՎԱՐՏՎԻ ԽԱՂԱՂ ՃԱՆԱՊԱՐՀՈՎ»

-Հայ-ադրբեջանական սահմանում գրեթե ողջ օգոստոս ամսին իրավիճակը լարված էր: Ըստ Ձեզ, ո՞ւմ կամ ո՞ր երկրին էր ձեռնտու դա:
- Գիտեք, չկամեցող մարդիկ աշխարհում շատ են: Միշտ էլ կան մարդիկ, ում ձեռնտու է, որ շարունակվի հայ-ադրբեջանական կոնֆլիկտը: Մենք կողմնակից ենք, որպեսզի այդ կոնֆլիկտը ավարտվի խաղաղ ճանապարհով` առանց ուժի եւ զենքի գործադրման: Այլ տարբերակ ես այստեղ չեմ տեսնում:

ՀՐԱՆՏ ՍԱՐԱՖՅԱՆ